అరి రివ్యూ.. ఎలా జీవించాలో చెప్పే చిత్రం

అరి రివ్యూ.. సమాజాన్ని తట్టి లేపే చిత్రం

ఆర్వీ సినిమాస్ పతాకంపై రామిరెడ్డి వెంకటేశ్వర రెడ్డి ( ఆర్ వీ రెడ్డి ) సమర్పణలో శ్రీనివాస్ రామిరెడ్డి, డి, శేషురెడ్డి మారంరెడ్డి, డా. తిమ్మప్ప నాయుడు పురిమెట్ల, బీరం సుధాకర్ రెడ్డి నిర్మించిన చిత్రం ‘అరి’. ‘పేపర్ బాయ్’తో ప్రతిభావంతమైన దర్శకుడుగా పేరు తెచ్చుకున్న జయశంకర్ ఈ సినిమాను రూపొందించారు. లింగ గుణపనేని కో ప్రొడ్యూసర్‌గా వ్యవహరించిన ఈ చిత్రంలో వినోద్ వర్మ, అనసూయ భరద్వాజ్, సాయి కుమార్, శ్రీకాంత్ అయ్యంగార్ కీలక పాత్రల్లో నటించారు. ‘అరి’ సినిమా ఏషియన్ సురేష్ డిస్ట్రిబ్యూషన్ ద్వారా ఈ నెల 10వ తేదీన వరల్డ్ వైడ్ గ్రాండ్ థియేట్రికల్ రిలీజ్ అయింది. మరి ఈ మూవీ ఎలా ఉందో ఓ సారి చూద్దాం.

కథ
అరి షడ్వర్గాలు అయిన కామ, క్రోధ, లోభ, మోహ, మద, మాత్సర్యాల కాన్సెప్ట్‌తో ఈ మూవీని తెరకెక్కించిన సంగతి తెలిసిందే. ఆరు రకాల ఎమోషన్స్‌కు ప్రతీకగా.. ఆరు పాత్రలు కోరికలో రగిలిపోతోంటాయి. కామంతో ఒకరు.. క్రోదంతో ఇంకొకరు.. లోభంతో మరొకరు.. ఇలా ఆరు పాత్రల్ని పరిచయం చేస్తారు. అమూల్ (వైవా హర్ష) సన్నీ లియోన్‌తో ఓ రాత్రి గడపాలని కోరుకుంటాడు. గుంజన్ (శుభలేఖ సుధాకర్) తన కుటుంబ ఆస్తిని కాజేయాలని కోరుకుంటాడు. లక్ష్మీ (సురభి ప్రభావతి) చనిపోయిన తన భర్తను తిరిగి రప్పించమని కోరుకుంటుంది. విప్లవ్ నారాయణ్ (సాయి కుమార్) తన తరతరాలు డబ్బు, హోదాతో తనలానే బతకాలని ఆశిస్తాడు. ఇన్ స్పెక్టర్ చైతన్య (శ్రీకాంత్ అయ్యంగార్) రహస్య నిధి కావాలని కోరుకుంటాడు. ఇక ఆత్రేయి (అనసూయ) తన సహోద్యోగి అవ్య కంటే అందంగా మారాలని కోరుకుంటుంది. ఇలా ఈ అందరూ కూడా ‘ఇచ్చట అన్ని కోరికలు తీర్చబడును’ అనే ఓ ప్రకటన చూసి ఇలాంటి వింత కోరికలు కోరుతారు. తమ తమ కోరికల్ని తీర్చుకునేందుకు ఆ ఆరుగురు ఎలాంటి పనులు చేయడానికి సిద్ద పడ్డారు? మనిషి తన కోరికను తీర్చుకోవడానికి ఎలాంటి పనులైనా చేస్తారా? మరి ఆ అరిషడ్వర్గాలను ఎలా జయించాలి? కోరికలు తీర్చబడును అని ప్రకటన ఇచ్చిన ఆ వ్యక్తి ఎవరు? ఆయన ఒక్కొక్కరికి ఎలాంటి టాస్కులు ఇచ్చారు? చివరకు ఆ ఆరుగురి కథ ఎలా ముగిసింది? అన్నది తెరపై చూడాల్సిందే.

అరి చిత్రంలో భారీ తారాగణమే ఉంది. డైలాగ్ కింగ్ సాయి కుమార్, అనసూయ, సీనియర్ ఆర్టిస్ట్ శుభలేఖ సుధాకర్, వైవా హర్ష, శ్రీకాంత్ అయ్యంగార్ ఇలా అందరూ తమ తమ పాత్రలకు జీవం పోశారు. మరీ ముఖ్యంగా వినోద్ వర్మ అయితే కొన్ని చోట్ల తన హావాభావాల్ని కంటి చూపుతోనే పలికించారు. ఆయన పాత్ర ఈ మూవీకి హైలెట్ అవుతుంది. చతుర, వితుర పాత్రలు అక్కడక్కడా నవ్విస్తాయి. మిగిలిన పాత్రలు కూడా పర్వాలేదనిపిస్తాయి.

అరి షడ్వర్గాలు అనేవి మనుషుల్లో సహజంగానే ఉంటాయి. ఇక ఇప్పుడు అయితే కామం, క్రోధం, లోభం, మోహం ఇలా అన్నీ కూడా మనుషుల్లో ఎక్కువగా పేరుకుపోయాయి. మరి వీటిని జయించాలి? అంటే ఏం చేయాలి.. అసలు కోరికలు లేకుండా, నిస్వార్థంగా మనిషి జీవించాలి అంటే ఏం చేయాలి? ఒకరికి హాని చేయకుండా, తలపెట్టకుండా ఎలా బతకాలి? ఇలాంటి అంశాల్ని చెబితే.. క్లాస్ పీకుతున్నారని అనుకుంటారు. కానీ ఈ చిత్రంలో అలాంటి అంశాలన్నీ కూడా ఎంతో సుత్తిమెత్తంగా టచ్ చేశారు.

ఓ మనిషి ఎలా బతకాలి? పరుల గురించి ఎలా ఆలోచించాలి? అనే విషయాన్ని చక్కగా చూపించారు. ప్రథమార్దం అంతా కూడా పాత్రల పరిచయం, వారి వారి కోరికల చిట్టాలతో సాగుతుంది. చతుర, వితురలతో ప్రారంభమయ్యే సీన్లు ఆసక్తికరంగా సాగుతాయి. ఆ తరువాత ఆరు పాత్రల ఎంట్రీ.. ఇచ్చట కోరికలు తీర్చబడును అనే ప్రకటన.. వారికి టాస్కులు ఇవ్వడం వంటి వాటితో ముందుకు సాగుతుంది. ఇంటర్వెల్‌కు కథలో అసలు ట్విస్ట్ స్టార్ట్ అవుతుంది.

సెకండాఫ్‌లో ఆ ఆరు పాత్రల్లో మార్పులు, మార్పు చెందే ఆ పరిణామక్రమం బాగుంది. అరె అసలు మనుషులంటే ఇలా కదా ఆలోచించాలి? ఇలా కదా జీవించాలి? అనేలా ఆడియెన్స్‌లో ఆలోచనల్ని పుట్టించేస్తాడు దర్శకుడు. అలా తాను చెప్పాలనుకున్న మెసెజ్, సమాజానికి ఇవ్వదల్చుకునే సందేశాన్ని క్లైమాక్స్‌లో గొప్పగా చెప్పేస్తాడు. ప్రీ క్లైమాక్స్, క్లైమాక్స్ చూస్తే ప్రేక్షకుడికి గూస్ బంప్స్ పక్కా వస్తాయి. చివరకు ఓ మంచి సినిమాను చూశామనే ఫీలింగ్‌తో ప్రేక్షకుడు బయటకు వచ్చేస్తాడు. ఇక ఇది యూనివర్సల్ కాన్సెప్ట్. మనిషులందరిలోనూ ఈ అరిషడ్వర్గాలుంటాయి. అందరికీ ఉపయోగపడే చిత్రమిది. ఇలాంటి సినిమాను అన్ని భాషల్లోనూ రీమేక్ చేసుకోవచ్చు

సాంకేతికంగా చూసుకుంటే ఈ మూవీకి సంగీతం, కెమెరా, వీఎఫ్ఎక్స్ ప్రధాన బలం. అనూప్ సంగీతం, ఆర్ఆర్ అదిరిపోతుంది. సినిమాటోగ్రఫీ కూడా అద్భుతంగా అనిపిస్తుంది. లిమిటెడ్ బడ్జెట్‌లో వీఎఫ్ఎక్స్ క్వాలిటీ చూస్తే వావ్ అనాల్సిందే. అసలు ఇలాంటి ఓ కథను అంగీకరించడం, ఇలాంటి సందేశాత్మక చిత్రాన్ని నిర్మించాలనే ఎంతో ధైర్యం ఉండాలి. నిర్మాతలు పెట్టిన ఖర్చుకి మంచి క్వాలిటీతో ఓ గొప్ప సినిమాను ఆడియెన్స్‌కి అందించారని చెప్పుకోవచ్చు.

రేటింగ్ : 3/5