మాములుగా ఓ కిరానా షాప్ లో ఉండే వాటర్ బాటిల్ కి, ఓ స్టార్ హోటల్ వాటర్ ప్రైస్ కి ఉండే తేడా మనకి తెలిసిందే. సాధారణం గా ఉండే ఎంఆర్పి రేటు కంటే ఎక్కువ ధర పెంచి అమ్ముతుంటారు. మనలో చాలా మంది గమనించినా పట్టించుకోకుండా వదిలేస్తుంటాం. ఒకవేళ ఎవరైనా అధికారులకు చెప్పినా కూడా పట్టించుకునే వారు ఎవరు ఉండరు. దీనితో హోటల్ వ్యాపారులు ఎక్కువ ధరకు అమ్ముతుంటారు.

తాజాగా, ఇలా ఎక్కువ ధరకు అమ్మిన ఓ హోటల్ పై ఓ కస్టమర్ కేసు వేసి మరీ గెలిచాడు. దాదాపు ఐదేళ్ల పాటు ఈ వాటర్ బాటిల్ కేసు పై అతను తన పోరాటాన్ని కొనసాగించాడు. అందరిలా ..ఎందుకొచ్చిన గొడవలే..అని అతను వదిలేయలేదు. వివరం లోకి వెళితే, గుజరాత్ కు చెందిన రోహిత్‌ పాటిల్ (67) అనే వ్యక్తి అహ్మదాబాద్ లో నివాసం ఉంటారు. 2015 వ సంవత్సరం లో అక్టోబర్ నెలలో, అతను తన స్నేహితులతో కలిసి ఎస్‌జీ జాతీయ రహదారిపై ఉన్న ఓ హోటల్ లో భోజనం చేసాడు. ఓ వాటర్ బాటిల్ ని కూడా కూడా కొనుక్కోగా.. హోటల్ బిల్ పై వాటర్ బాటిల్ కి వేసిన ధరను చూస్తే అతనికి దిమ్మ తిరిగిపోయింది.

ఒక్క వాటర్ బాటిల్ ధరను 164 రూపాయలు అమ్మారు మరి. ఇందులో 150 రూపాయలను బాటిల్ ధర గా సదరు హోటల్ పేర్కొంది. మిగతా 14 రూపాయలను సర్వీస్ ఛార్జ్ కింద పేర్కొంది. అయితే, ఇది అన్యాయమని రోహిత్ భావించాడు. ఆ బిల్లుని ఆధారం గా చేసుకుని వినియోగదారుల ఫోరమ్ లో రోహిత్ ఫిర్యాదు చేసాడు. అంతే కాదు, తనకు పరిహారం కింద లక్ష రూపాయలు ఇప్పించాలని కోరాడు. కోర్టు అతని ఫిర్యాదు స్వీకరించి విచారణ జరిపింది.

విచారణ సమయం లో కూడా సదరు హోటల్ తాము అధిక ధర వసూలు చేయడం సమంజసమే అంటూ సమర్ధించుకుంది. మా హోటల్ సర్వీసుకు తగ్గట్లే ధరలు కూడా ఉంటాయని సమర్ధించుకుంది. అయితే, రెండు పక్షాల వాదనను కోర్టు విన్న తరువాత సదరు హోటల్ ను మందలించింది. ఓ సాదా వాటర్ సీసా ను అంత ధరకు అమ్మడం అన్యాయం గా పేర్కొంది. ఈ కేసు విషయం లో రోహిత్ పాటిల్ ను ఇబ్బందులకు లోను చేసినందుకు గాను 2500 పరిహారం ఇవ్వాలని ఆదేశించింది. అలాగే, ఖర్చులకు మరో మూడు వేలు మొత్తం 5500 ల రూపాయలు ఇవ్వాలని ఆదేశించింది. ఈ తీర్పు పై రోహిత్ సంతోషం వ్యక్తం చేసాడు. ఈ మొత్తాన్ని స్వచ్ఛంద సంస్థ కు ఇస్తానని అన్నాడు. గతం లో కూడా తాను అధిక ధరలకు అమ్మే వారిపై కేసులు వేశానని, ఇదేమి మొదటి కేసు కాదని పేర్కొన్నాడు. చట్టవిరుద్ధం గా తన జేబులోంచి డబ్బులెందుకు చెల్లించాలని ప్రశ్నించాడు.

కొన్ని కొన్ని పొరపాట్లు యాదృచ్చికంగా జరుగుతుంటాయి. కానీ చట్టం ముందు ఎలాంటి పొరపాట్లకు అయినా శిక్ష పడుతూనే ఉంటుంది. ఇలాంటి యాదృచ్ఛిక సంఘటనే ఒకటి ముంబై లో చోటు చేసుకుంది. ఓ మహిళ తన కార్ ప్లేట్ కి కేవలం ఒక్క నెంబర్ తీసివేయడం వలన వచ్చిన చిక్కు ఇది. పోలీసులు విచారణ చేపట్టి ఆ మహిళ ఎవరో వెతికి పట్టుకుని మరీ కేసు నమోదు చేసారు. నెంబర్ ప్లేట్ ని మార్చినందుకు గాను ఆమె కి శిక్ష పడే అవకాశం ఉందని తెలుస్తోంది.

పూర్తి వివరాల్లోకి వెళితే, మహారాష్ట్ర కి చెందిన గీతాంజ‌లి సామ్ షా అనే ఓ మహిళ తన కారు నెంబర్ లో చివరి సంఖ్యా అయిన జీరో ను తీసివేసింది. అది రతన్ టాటా కారు నెంబర్. ఆమె రతన్ టాటా కారు నెంబర్ ను ఇన్నాళ్లు వాడుకుంటూ వచ్చింది. అంతే కాకుండా, ట్రాఫిక్ నిబంధనలను కూడా ఉల్లంఘించింది. దీనివలన, ఆమెకు పడాల్సిన ఫైన్ రతన్ టాటా కి పడింది. పోలీసులు ఆమె కట్టాల్సిన ఫైన్ చలానాలకు రతన్ టాటా ఆఫీస్ కు పంపించారు. పోలిసుల వద్ద నుంచి ఈ-చలానా లు రావడం తో టాటా ఆఫీస్ లోని ఉద్యోగులు అప్రమత్తమై పోలీసులకు సమాచారం అందించారు.

దీనితో, వెంటనే రంగం లోకి దిగిన పోలీసులు విచారణ జరిపి ఓ మహిళ ఈ నెంబర్ ను వినియోగిస్తున్నట్లు గుర్తించారు. సదరు మహిళను పట్టుకుని ప్రశ్నించగా, తనకు ఓ న్యూమెరాలజిస్ట్ ఈ నెంబర్ ను వాడాలని సూచించారని, అందుకే తన కారు నెంబర్ లోని చివరి నెంబర్ ను తీసివేసినట్లు తెలిపింది. వాస్తవానికి ఈమె కారు నెంబర్, రతన్ టాటా కారు నెంబర్ చాలా వరకు సేమ్. ఆమె కారు నెంబర్ చివరిలో 1110 ఉంటుంది. అందులోంచి 0 ను తీసివేసి వాడుతోంది. అది రతన్ టాటా కారు నెంబర్ (111). దీనితో, పోలీసులు ఆమె పై కేసు నమోదు చేసారు. రతన్ టాటా కు పంపిన చలనాలను ఆ మహిళకు పంపించారు. అయితే తప్పుడు కారు నెంబర్ వినియోగించిన కేసు లో ఆమె కు శిక్ష పడే అవకాశం ఉందని తెలుస్తోంది.

పశ్చిమగోదావరి జిల్లాలో చోటు చేసుకున్న ఒక ఘటన చర్చలకు దారి తీసింది. సాక్షి కథనం ప్రకారం గర్సికూటి పావని, తాళ్లపూడి మండలం మలకపల్లి గ్రామానికి చెందిన యువతి. పావని కొవ్వూరు ఏబీఎన్‌ అండ్‌ పీఆర్‌ఆర్‌ కళాశాలలో డిగ్రీ చదువుతోంది. తాడేపల్లిగూడెంలో ఇంటర్ చదువుతున్నప్పుడు అంబటి కరుణ తాతాజీ నాయుడు పావనిని ప్రేమిస్తున్నానని చెప్పాడు. తర్వాత వాళ్ళిద్దరూ కొంతకాలం సన్నిహితంగా ఉన్నారు.

పెళ్లి ప్రస్తావన వచ్చినప్పుడు కులాలు వేరు కావడంతో అంబటి కరుణ తాతాజీ నాయుడు పెళ్లికి అంగీకరించలేదు. పావని ఒత్తిడి చేయడంతో, వారిద్దరూ రహస్యంగా పెళ్లి చేసుకొని సహజీవనం చేశారు. తర్వాత తనని అధికారికంగా పెళ్లి చేసుకోమని పావని అడగడంతో అందుకు తాతాజీ నాయుడు అంగీకరించలేదు. పావని పై అనుమానం పెంచుకుని సోషల్ మీడియాలో అసత్య ప్రచారాలు చేశాడు.

అతని వేధింపులు తట్టుకోలేక పావని తన స్వగ్రామం అయిన మలకపల్లి కి వచ్చేసింది. సోమవారం పావని కి కాల్ చేసి మాట్లాడాలని ఐ.పంగిడి జంక్షన్‌కి రమ్మని కోరాడు తాతాజీ నాయుడు. పావని అక్కడికి వెళ్ళింది. వాళ్లిద్దరికీ మధ్య గొడవ జరిగింది. పావని తనని ఇంటి దగ్గర దింపమని అడగడంతో ఇద్దరూ మోటార్ సైకిల్ పై బయలుదేరారు.

అప్పటికే మనస్తాపానికి గురైన పావని ధర్మవరం గ్రామ శివారుకు వచ్చేసరికి తాను అంతకుముందు ఆన్లైన్లో కొన్న చాకుతో తాతాజీ నాయుడు మెడపై పొడిచింది. తర్వాత అతను పడిపోవడంతో చాకుతో పలుచోట్ల దాడి చేసింది. తాతాజీ నాయుడు అక్కడే ప్రాణాలు కోల్పోయాడు. పావని పోలీసులకు సమాచారం ఇచ్చి లొంగిపోయింది. రూరల్‌ ఎస్‌ఐ కె.రామకృష్ణ ఘటనా స్థలానికి చేరుకొని వివరాలు సేకరించి విచారణ చేపట్టారు.

పంటలను కాపాడుకోవడానికి రైతులు నానా తిప్పలు పడుతుంటారు. పంట పండే దాకా ఒక ఇబ్బంది, పండించాక ఒక ఇబ్బంది. ఓ వైపు పంట ను కాపాడుకోవాలి. మరో వైపు దిష్టి కన్ను తగలకుండా చూసుకోవాలి. ఈ బాధ పడలేక, ఓ రైతు ఓ పని చేసాడు. ఎన్ని సార్లు పంట పండించినా, చేతికి రాకపోవడం, దిగుబడి ఉండకపోవడం తో తన పంట కి నర దృష్టి తగులుతోంది అని ఆ రైతు భావిస్తున్నాడు.

దీనితో, ఆ రైతు ఒక పధకం ఆలోచించాడు. అతని ఆలోచనకి అందరు ఫస్ట్ షాక్ అయ్యి, ఆ తరువాత నవ్వుకుంటున్నారు. వివరాల్లోకెళితే, సిద్దిపేట జిల్లా చిన్నకోడూర్ మండ‌లం లో చందలపూర్ గ్రామం లో చంద్రమౌళి రెండు ఎకరాలలో మిర్చి పంట ను సాగు చేస్తున్నాడు. ప్రతి సారి పంట పండించడం, ఎదో ఒక తెగులు సోకి పంట నష్టపోవడం జరుగుతూ వస్తోంది. రెండు, మూడేళ్ళ పాటు పంట ఇలాగే నష్టపోతూ వచ్చాడు. దీనితో, తన పంటకి నరదిష్ఠి తగలడం వల్లే పంట నష్టపోయానని అనుకున్నాడు.

దిష్టిబొమ్మలు పెట్టుకున్నా, పరిస్థితి మారకపోవడం తో.. తమన్నా, కాజల్ ఫ్లెక్సి లను తీసుకుని పంటలో పెట్టాడు. ఆ హీరోయిన్స్ ఫోటోలు చాలా అందం గా ఉన్నాయి. ఆ దారిన పోయే వారంతా.. ఆ ఫోటోలని చూస్తూ వెళ్తున్నారు.. ఆ తోటని ఎవరు పట్టించుకోవడం లేదు. ఆ ఫోటోలను చూసి వెళ్లిపోతున్నారు. తాజాగా, పంట గతం లో కంటే అధికం గా దిగుబడి రావడం తో సంతోషం వ్యక్తం చేస్తున్నాడు. తమన్నా, కాజల్ లు తన పంటలోకి వచ్చాక లాభాలు వస్తున్నాయని హర్షం వ్యక్తం చేస్తున్నాడు.  ఈ ఐడియా ను చూసినవారంతా ఔరా అని ఆశ్చర్యపోతున్నారు. కొంతమంది మాత్రం నవ్వుకుని వెళ్లిపోతున్నారు. ఏది ఏమైనా.. ఈ రైతు ఐడీయా అదిరింది కదా..