ట్రయాంగిల్ లవ్ స్టోరీలు మనకి కొత్త కాదు కానీ.. ఈ ట్రయాంగిల్ లవ్ స్టోరీ క్లైమాక్స్ ని మాత్రం ఎక్కడా చూసుండరు. ఇంతకీ ఈ ఇంటరెస్టింగ్ స్టోరీ సంగతేంటో చూద్దాం. సాధారణం గా ఏ ట్రయాంగిల్ లవ్ స్టోరీ లో అయినా ఇద్దరు అమ్మాయిలు ఒకబ్బాయినో.. లేక ఒక అబ్బాయి ఇద్దరు అమ్మాయిలనో ఇష్టపడతారు. చివరికో ఒకళ్ళు పెళ్లి చేసుకుంటే మరొకరు త్యాగం చేయాల్సి వస్తుంది.
ఇలాంటి ఘటన ఒకటి కర్నాటకలోని హసన్ జిల్లాలో చోటు చేసుకుంది. ఓ అబ్బాయి ఇద్దరు యువతులను ఒకరికి తెలియకుండా మరొకరిని ప్రేమించాడు. అయితే.. ఆ విషయం కొన్నాళ్ళకి ఇద్దరి అమ్మాయిలకి తెలిసింది. వారిద్దరూ ఆ అబ్బాయిని తిట్టకపోగా నా వాడంటే నా వాడు అంటూ ఒకళ్ళనొకళ్ళు కొట్టుకున్నారు. వీరి సమస్యని ఎలా పరిష్కరించాలో వారి పెద్దలకే అర్ధం కాలేదు.
అంతలోనే ఆ ఇద్దరు యువతుల్లో ఓ అమ్మాయి ఆ అబ్బాయి లేకుండా బతకలేను అంటూ ఆత్మహత్య కు ప్రయత్నించింది. అప్పటికే విషం మింగేసిన ఆమె అతికష్టం మీద ప్రాణాలతో బయటపడింది. దీనితో.. ఈ విషయం తొందరగా తేల్చకపోతే మరిన్ని అనర్ధాలు జరిగే అవకాశం ఉందని పెద్దలు భావించారు. చివరకు టాస్ వేయాలని నిర్ణయించారు. టాస్ గెలిచిన వారితో ఆ అబ్బాయి వివాహం జరుగుతుందని, టాస్ ఓడిన వారు అన్యాయం జరిగింది అంటూ కేసు పెట్టకూడదని షరతు విధించారు.
ఇందుకు ఆ ఇద్దరు అమ్మాయిలు ఒప్పుకున్నారు. టాస్ వేసిన తరువాత ఆత్మహత్య చేసుకుని బయటపడ్డ అమ్మాయి గెలుపొందింది. దీనితో.. ఊరి పెద్దలు, ఇరు కుటుంబాలు కలిసి ఆ అమ్మాయితో అబ్బాయి పెళ్లి జరిపించారు. టాస్ ఓడిపోయిన అమ్మాయి కొంత నిరాశ పడ్డప్పటికీ.. పెళ్లి కూతురుని హగ్ చేసుకుని శుభాకాంక్షలు తెలిపింది. వెళ్ళిపోతూ.. ఆ అబ్బాయి చెంప పై లాగిపెట్టి కొట్టి వెళ్ళిపోయింది. ఇప్పటితో ఇది ముగిసిపోలేదని.. మళ్ళీ వస్తానని చెప్పి వెళ్ళిపోయింది. ప్రస్తుతానికి వీరి కథ సుఖాంతమైంది.
