చిరుత పులి కళ్ళెదురుగా కనిపిస్తే చాలు ఎవరైనా భయంతో వణికిపోవాల్సిందే. కనబడితేనే చాలు ఎవరికైనా గుండె గుభేలుమంటుంది. కానీ ఈ తల్లి మాత్రం చిరుతని చూసి అస్సలు బెదరలేదు. సరికదా దానిని ఓ పట్టు పట్టింది. తన పిల్లల జోలికి వస్తే తల్లి ఎలా రియాక్ట్ అవుతుందో అనేది కళ్ళకు కట్టినట్లు చూపించింది.
మహారాష్ట్రలో చంద్రాపూర్ ప్రాంతలోని దుర్గాపూర్ కాంప్లెక్స్‌లో జ్యోతి పుపాల్వర్ నివాసం ఉంటోంది. ఆమెకు మూడేళ్ళ పాప ఉంది. ఆ పాప జోలికి వచ్చిన చిరుత పులి పని పట్టింది జ్యోతి.
ఇంట్లో పాప ఆకలి కోసం ఏడుస్తుంటే ఆ తల్లి వంట పని మొదలు పెట్టింది. ఆ పిల్లకి తినడానికి ఏదో ఒకటి పెట్టి తన పనిలో పడిపోయింది. ఇంతలో ఎక్కడ నుంచి వచ్చిందో ఓ చిరుత పులి గుట్టు చప్పుడు కాకుండా ఇంట్లోకి వచ్చింది. అంతే కాదు ఆ పాపను ఎత్తుకుపోవడానికి ప్రయత్నించింది. ఆ పాపను నోట కరుచుకుని బయటకు పోవడానికి ప్రయత్నించింది. అంతలోనే ఆ పాప ఏడుపు లంకించుకోవడంతో ఆ తల్లి కంగారు పడింది.
చిరుత పులి తన పాపని నోట కరుచుకుని పోవడాన్ని చూసిన ఆ తల్లి క్షణం కూడా ఆలోచించలేదు. వెంటనే దుడ్డు కర్ర తీసుకుని ఆ చిరుతని చితకబాదింది. బిడ్డని వదిలే వరకు ఆ పులి వెంట పడి బాదుతూనే ఉంది. చివరకు ఆ పాపను వదిలేసి చిరుత వెనుదిరగాల్సి వచ్చింది. కొద్దీ పాటి గాయాలతో ఆ చిన్నారి పాప ప్రస్తుతం బాగానే ఉంది. చిరుత నుంచి తప్పించిన తరువాత ఆ తల్లి పాపను తీసుకుని స్థానిక ఆసుపత్రికి తీసుకెళ్లింది. ప్రస్తుతం ఆ పాప ఆరోగ్యంగానే ఉంది. ఆ తల్లి స్ఫూర్తిని ఆ గ్రామ ప్రజలు ప్రశంసించారు.
