Featured

అన్న గారు స్వర్గస్తులైన తర్వాత ఆ ఇంటి వారసత్వాన్ని నిలబెట్టడానికి ఎవరొస్తారా అని అభిమానులంతా ఎదురు చూసారు. అలాంటి నటుడు తెలుగు సినీ పరిశ్రమకు మళ్లీ దొరకరేమో అని కొందరు దిగులుచెందారు. కానీ 6 ఏళ్ల తర్వాత పెద్దాయన లాగే రూపురేఖలు, ఆయన లాగే నటన ప్రావీణ్యం ఉన్న ఆయన మనవడు వచ్చాడు. నందమూరి తారక రామా రావు అనే పేరుతో సినీ పరిశ్రమలో తెరంగేట్రం చేసి ఆ పేరుని నిలబెట్టాడు. సాధారణంగా స్టార్ కుటుంభం నుండి వచ్చిన వారికి కెరీర్ చాల సులభంగా ఉంటుంది అనుకుంటారు అందరు. కానీ ఆ వారసత్వాన్ని నిలబెట్టడానికి ఎంతో కష్టపడాల్సి వస్తుంది. ఆ ఇంటి పేరు ఆయనకు అవకాశాన్ని మాత్రమే తెచ్చిపెట్టింది. కానీ ఆ పేరుని నిలబెట్టింది మాత్రం తారక్ లోని కృషి పట్టుదలే.

చిన్నప్పటి నుండే నటన అంటే ఇష్టం. చైల్డ్ ఆర్టిస్ట్ గా “బాలరామాయణం” లో నటించే అందరిని మెప్పించారు. కానీ అప్పటికి తారక్ నందమూరి వారసుడు అని చాలా మందికి తెలీదు. హీరో గా చేసిన తొలిచిత్రం “నిన్ను చూడాలని”. ఆ సినిమా అంతగా ఆడలేదు. అయినా నిరాశ చెందలేదు తారక్.

“నీకు ఓటమా? నీకున్న బలంతోనే నువ్వు అనుకున్నది సాదిస్తావు. నటన నీలోని బలం. నాట్యం నీకున్న వరం, నువ్వు కాలు కదిపితే ఆంధ్ర దేశం విజిలేసి ఎగురుతుంది”

అని తాత గారు అన్నట్టు అనిపించింది అనుకుంట. రెండో సినిమాకే నందమూరి అభిమానులు కాలర్ ఎగిరేసుకునేలా చేసాడు. ఇక “సింహాద్రి” తో 20 ఏళ్ల వయసులోనే రికార్డులు అన్ని బద్దలు కొట్టాడు.

ఎవరైనా ఒక హీరో బాగా డాన్స్ చేయగలరు, లేకుంటే బాగా డైలాగ్ చెప్పగలరు, లేకుంటే ఎమోషన్ బాగా పండించగలరు, లేకుంటే ఆక్షన్ బాగా చేయగలరు. కానీ ఆ టాలెంట్ అంతా ఒకరితోనే ఉంటె ఎలా ఉంటుంది అంటే “తారక్” లాగా ఉంటుంది అనడంలో అతిశయోక్తి ఏమి లేదు.ఆ మాటను ఎందరో సినీ ప్రముఖులు కూడా మాటల సందర్భంలో అన్నారు. ఆక్టర్ మాత్రమే కాదు…తారక్ మంచి సింగర్ కూడా.

సింహాద్రి తో రికార్డ్స్ బద్దలు కొట్టిన తర్వాత కెరీర్ అంత సింపుల్ గా సాగలేదు. ఒకవైపు అభిమానుల అంచనాలు పెరుగుతున్నాయి. మరోవైపు లావుగా ఉన్నాడు అంటూ కొందరు కామెంట్స్ చేయడం మొదలుపెట్టారు. అవే రొటీన్ సినిమాలు చేస్తూ ఉన్నారు అంటూ అపహేళన చేసేవారు ఎక్కువయ్యారు. కానీ నందమూరి అభిమానుల ఆశలను నిలబెట్టడానికి తనను తాను మార్చుకున్నాడు. దాదాపు 20 కిలోల బరువు తగ్గి “యమదొంగ”తో మనముందుకు వచ్చాడు. యముడిని ముప్పుతిప్పలు పెట్టి మూడు చెరువుల నీళ్లు తాగించాడు. అభిమానుల అంచనాలను నిలబెట్టాడు.

ఆ తర్వాత అదుర్స్, బృందావనం తో వరస హిట్లు అందుకున్నాడు. కానీ అంతలోనే మళ్లీ కెరీర్ డౌన్ అయ్యింది. వరస ప్లాప్ లు ఎదురయ్యాయి. “బాద్ షా” ఒక్కటే ఆ మధ్యకాలంలో చెప్పుకోదగ్గ హిట్. కెరీర్ ఇలా అయ్యింది ఏంటి అని నందమూరి అభిమానులు బాధ పడ్డారు. కానీ తారక్ మాత్రం గాయపడిన సింహంలా “టెంపర్” తో తన నటవిశ్వరూపాన్ని చూపించి మరోసారి నందమూరి అభిమానులు కాలర్ ఎగిరేసుకునేలా చేసారు. ఇక అప్పటినుండి కెరీర్ లో వెనక్కి తిరిగి చూడలేదు. టెంపర్ తర్వాత నుండి తారక్ ఎంచుకున్న స్క్రిప్ట్స్ సూపర్ డూపర్ హిట్ లు గా నిలిచాయి. అరవింద సమేత సమయంలో తన జీవితంలో అత్యంత బాధాకరమైన సంఘటన చోటు చేసుకుంది. తన తండ్రిని దూరమయ్యాడు. ఆ కష్టాన్ని దిగమింగి తండ్రిగా తన బాధ్యతను పెంచుకుని కుటుంబాన్ని చూసుకుంటూ. సరైన స్క్రిప్ట్స్ ఎంచుకుంటూ సినిమా కెరీర్ లో దూసుకెళ్తున్నారు.

ఎంత పెద్ద డైలాగ్ ని అయినా సింగల్ టేక్ లో చెప్పగలడు తారక్. అందుకే డైరెక్టర్స్ అందరికి తారక్ తో సినిమా చేయడం అంటే ఇష్టం. “జై లవ కుశ” లో ఒకేసారి స్క్రీన్ మీద మూడు పత్రాలు కనిపించినా, అందరు ఒకే డ్రెస్ వేసినా? జై ఎవరో లవ ఎవరో కుశ ఎవరో? ఇట్టే చెప్పగలం. దానికి కారణం ఎన్టీఆర్ ఎక్స్ప్రెషన్స్. అభిమానులకి తారక్ అంటే ఎంత ఇష్టమో. తారక్ కి తన అభిమానులంటే కూడా అంతే ఇష్టము. కర్నూల్ లో వరదల సమయంలో 20 లక్షలు డొనేట్ చేసారు. తర్వాత హుధుద్ సమయంలో మరో 20 లక్షలు డొనేట్ చేసారు. “సినిమాలు చేస్తా…ప్రతి నందమూరి అభిమాని కలర్ ఎగిరేసుకునేలా చేస్తా” అని చెప్పిన మాటలను నిలబెట్టుకున్నాడు.

ఇటీవలే రాజమౌళి దర్శకత్వంలో వచ్చిన RRR లో ఎన్టీఆర్ నటన గురించి కొత్తగా చెప్పాల్సిన అవసరం లేదు అనుకుంట. ఒకే ఫ్రేమ్ లో కోపం, బాధ, కరుణ, ప్రేమ అన్ని చూపించడం తారక్ కే సొంతం అనుకుంట.

#Happy Birthday Nandamuri Taraka Rama Rao Junior

ఇట్లు,
ఓ తారక్ అభిమాని
Sainath Gopi (facebook.com/saigopi777)

ఎన్నో రోజులు ఎదురు చూసిన తర్వాత మహేష్ బాబు నటించిన సర్కారు వారి పాట సినిమా విడుదల అయ్యింది. ఎప్పుడో విడుదల కావాల్సి ఉన్న ఈ సినిమా కోవిడ్ కారణంగా వాయిదా పడింది.

ఈ సినిమాకి ప్రస్తుతం మిక్స్‌డ్ టాక్ వస్తోంది. కొంత మంది, “మహేష్ బాబు ఈ సినిమాలో చాలా బాగా నటించారు, చాలా కొత్తగా కనిపించారు” అని అంటూ ఉంటే, ఇంకొంతమంది, “కథలో కొత్తదనం లేదు” అంటున్నారు. ఇదిలా ఉండగా, ప్రస్తుతం ఒక వార్త ప్రచారంలో ఉంది. అదేంటంటే టికెట్ల ధరపై ఆంధ్రప్రదేశ్ ముఖ్యమంత్రి జగన్ మోహన్ రెడ్డితో మాట్లాడడానికి అంతకుముందు మహేష్ బాబు, డైరెక్టర్ రాజమౌళి, చిరంజీవి, ప్రభాస్ వెళ్లారు.

వీరితో పాటు ప్రముఖ నటుడు ఆర్.నారాయణమూర్తి కూడా వెళ్లారు. అయితే చిరంజీవి నటించిన ఆచార్య, ప్రభాస్ నటించిన రాధే శ్యామ్ సినిమాలు ప్రేక్షకుల అంచనాలని అందుకోలేకపోయాయి. ఇప్పుడు సర్కారు వారి పాట సినిమాకి కూడా డివైడ్ టాక్ వస్తోంది. దాంతో జగన్ ని కలిసిన సినిమాల రిజల్ట్ ఇలా ఉంది అంటూ ఒక వార్త ప్రచారంలో ఉంది. కానీ ఇలా అనడం ఎంతవరకు కరెక్ట్? అలా అనుకుంటే ఆర్ఆర్ఆర్ సినిమా గురించి మాట్లాడడానికి రాజమౌళి కూడా వారితో పాటు వెళ్లారు. మరి ఆ సినిమా రిజల్ట్ ఎలా ఉందో ప్రత్యేకంగా చెప్పాల్సిన అవసరం లేదు.

సినిమా రిజల్ట్ అటు ఇటు అయితే వేరే వారిని అనడం ఇది మొదటిసారి జరగలేదు. అంతకుముందు హీరోయిన్ల విషయంలో కూడా ఇలాగే జరిగింది. కథలో అలాగే ఒక సినిమా మేకింగ్ లో ముఖ్యపాత్ర పోషించే దర్శకుడిని లేదా ఆ సినిమాకి సంబంధించిన వారికి కాకుండా కేవలం సినిమాలో నటించే హీరోయిన్లని ఒక సినిమా ఫ్లాప్ టాక్ కి కారణం అని అన్నారు. ఇంతకుముందు ఆచార్య, రాధే శ్యామ్, బీస్ట్ నెగిటివ్ టాక్ రావడం విషయంలో పూజా హెగ్డేని, అలాగే గతంలో కొన్ని సినిమాలకు శృతి హాసన్ ని అని కూడా ఇలాగే ట్రోల్ చేశారు.

ఈ సినిమాలు అన్నీ కూడా ఎప్పటినుండో విడుదల కావడానికి సిద్ధంగా ఉన్నాయి. జగన్ మోహన్ రెడ్డిని కలిసిన అంతమాత్రాన సినిమా రిజల్ట్ మారిపోతుంది అని అనడం ఎంతవరకు కరెక్ట్? ఇందులో ఆయన చేసింది ఏముంది? సినిమాకి సంబంధించిన వారు కూడా సినిమా రిజల్ట్ విషయంలో ఏదైనా జరిగితే వారి తప్పు అని ఒప్పుకుంటారు. కానీ చూసే ప్రేక్షకులు మాత్రం ఒకవేళ ఏదైనా సినిమా రిజల్ట్ తేడా వస్తే అసలు ఆ సినిమాకి సంబంధం లేని వారిని, లేదా ఆ సినిమాలో ఏదో ఒక పాత్ర పోషించిన వారిని అనడం చేస్తున్నారు. ఇలా చేయడం ఎంతవరకూ సరైనది అనేది మనకి మాత్రమే తెలియాలి.

చిరంజీవి, రామ్ చరణ్ కలిసి తెరపై కనిపిస్తే చూడాలని చాలా మంది ప్రేక్షకులు ఎదురు చూశారు. అంతకుముందు మగధీర సినిమాలో, ఆ తర్వాత బ్రూస్ లీ సినిమాలో చిరంజీవి చిన్న పాత్రలో కనిపించారు. అలా కాకుండా వారిద్దరూ కలిసి ఒక ఫుల్ లెంత్ సినిమాలో నటించాలి అని అందరూ అనుకున్నారు.

ఆచార్య సినిమాతో అది జరుగుతుంది అని తెలిసాక అసలు సినిమా ఎలా ఉండబోతోంది? ఇద్దరికీ సమానమైన పాత్రలు ఉంటాయా? అని అనుకున్నారు. కానీ సినిమా విషయానికి వచ్చేటప్పటికీ ప్రేక్షకుల అంచనాలను అందుకోవడానికి చేసిన ప్రయత్నం ఫలించలేదు అని చెప్పాలి.

ఈ సినిమాలో పూజా హెగ్డే హీరోయిన్ గా నటించారు. అయితే గత కొంత కాలం నుండి పూజా హెగ్డే నటించిన సినిమాలు ఆశించిన ఫలితాన్ని ఇవ్వడం లేదు. పూజా హెగ్డే ఇటీవల హీరోయిన్ గా నటించిన రాధే శ్యామ్, అలాగే బీస్ట్ సినిమాలు ప్రేక్షకులని నిరాశపరిచాయి. ఇప్పుడు ఈ సినిమా విషయంలో కూడా అలాగే అయ్యింది. దాంతో ఈ సినిమా ఫ్లాప్ అవ్వడానికి కారణం పూజా హెగ్డే అని అనడం మొదలు పెట్టారు. ఇలా పూజా హెగ్డే విషయంలో మాత్రమే కాదు.

అంతకుముందు శృతి హాసన్ విషయంలో కూడా జరిగింది. శృతి హాసన్ హీరోయిన్ గా నటించిన సినిమాలు కొన్ని ఫ్లాప్ అయ్యాయి. దాంతో “శృతి హాసన్ ఏ సినిమాలో నటిస్తే ఆ సినిమా ఫ్లాప్ అవుతుంది” అని అనడం మొదలు పెట్టారు. చాలా మంది హీరోయిన్ల విషయంలో ఇలా జరిగింది. ఒకవేళ ఆ హీరోయిన్ నటించిన సినిమాలు హిట్ అయితే లక్కీ అని, లేదా ఫ్లాపయితే ఐరన్ లెగ్ అని అంటారు. సినిమాలో వీరు కేవలం నటులు మాత్రమే. డైరెక్టర్ ఎలా చెప్తే అలా మీరు నటిస్తారు.

సినిమా కథ అలాగే సినిమా తెరపై చూపించడం అనే విషయాలు దర్శకుడి చేతిలో ఉంటాయి. ఒక వేళ సినిమా హిట్ అయితే హీరోయిన్ వల్ల హిట్ అయ్యింది అని అనరు. కానీ ఫ్లాప్ అయితే మాత్రం ఇలాంటి పదాలు వస్తూ ఉంటాయి. ఇది కేవలం హీరోయిన్లకే ఎందుకు వర్తిస్తుంది? చాలా మంది హీరోలు కూడా వరుసగా కొన్ని ఫ్లాప్ టాక్ తెచ్చుకున్న సినిమాలు చేశారు. ఆ హీరో ఏ సినిమాలో నటిస్తే ఆ సినిమా ఫ్లాప్ అవుతుంది అని ఎక్కడా అనరు.

ఈ హీరోయిన్స్ ఎక్కువగా కమర్షియల్ సినిమాల్లో నటించారు. కమర్షియల్ సినిమాల్లో హీరోయిన్ పై మాత్రమే కథ ఉండడం అనేది చాలా అరుదు. సినిమా అంతా హీరో మీద నడుస్తుంది. హీరోయిన్ కేవలం సినిమాలో కొంత భాగంలో మాత్రమే కనిపిస్తారు. అలాంటప్పుడు సినిమా ఫ్లాప్ అయితే హీరోయిన్లని అనడం ఎంతవరకు కరెక్ట్? దర్శకుడు చెప్పినట్టు నటించిన హీరోయిన్ ఏం తప్పు చేసింది? అసలు ఇలాంటివన్నీ ఎక్కడ నుండి మొదలు అవుతున్నాయి? ఇవన్నీ మనకే తెలియాలి.