News

ఆది సాయి కుమార్  హీరోగా నటించిన చిత్రం శశి. ఈ సినిమాకి శ్రీనివాస్ నాయుడు నడికట్ల దర్శకత్వం వహించగా, శ్రీ హనుమాన్ మూవీ మేకర్స్ బ్యానర్ పై ఆర్పీ వర్మ, రామాంజనేయులు, చింతలపూడి శ్రీనివాస్ శశి సినిమాని నిర్మించారు. ఎక్స్ప్రెస్ రాజా, నాని జెంటిల్ మన్ సినిమాలలో హీరోయిన్ గా నటించిన సురభి ఈ సినిమాలో హీరోయిన్ గా నటించారు.

శశి సినిమాకి అరుణ్ చిలువేరు పాటలని సమకూర్చారు. ఇటీవల విడుదలైన టీజర్, అలాగే ఒకే ఒక లోకం నువ్వే అనే పాట ప్రేక్షకాదరణ పొందాయి. శశి సినిమా మార్చ్ 19 వ తేదీన థియేటర్లలోకి రాబోతున్నట్టు సినిమా బృందం అధికారికంగా ప్రకటించింది.

2019 లో విడుదలై సంచలనం సృష్టించిన సినిమా కేజిఎఫ్. కన్నడలో రూపొందిన ఈ సినిమా పాన్ ఇండియా సినిమాగా విడుదలయ్యి కేవలం కన్నడ భాషలో మాత్రమే కాకుండా ఇతర భాషల్లో కూడా రికార్డు స్థాయిలో విజయం సాధించింది. రెండున్నర సంవత్సరాల తర్వాత ఇప్పుడు కేజిఎఫ్ 2 ప్రేక్షకుల ముందుకు రాబోతోంది.

ఈ సినిమాకి సంబంధించి యష్ పుట్టిన రోజు సందర్భంగా ఇటీవల విడుదల చేసిన టీజర్ యూట్యూబ్ లో కొత్త రికార్డులు సృష్టించడం మాత్రమే కాకుండా, ప్రేక్షకుల్లో కూడా ఆసక్తి ఇంకా రెట్టింపు అయ్యేలా చేసింది. అయితే, కేజిఎఫ్ 2 జూలై 16 వ తేదీన విడుదల కానున్నట్లు చిత్రబృందం అధికారికంగా ప్రకటించింది.

తమ అభిమాన హీరో సినిమా విడుదల అవుతున్నందుకు యష్ అభిమానులు ప్రధానమంత్రి నరేంద్ర మోడీ గారికి కేజిఎఫ్ 2 విడుదలయ్యే రోజుని నేషనల్ హాలిడే గా ప్రకటించాలని కోరుతూ ఒక లేఖ రాశారు. ప్రస్తుతం ఈ విషయం సోషల్ మీడియాలో వైరల్ అవుతోంది.

విశాల్ హీరోగా నటించిన సినిమా చక్ర. ఈ సినిమాకి ఎం. ఎస్. ఆనందన్ దర్శకత్వం వహించారు. శ్రద్ధ శ్రీనాథ్ హీరోయిన్ గా నటించగా, రెజీనా కసాండ్రా ఒక ముఖ్య పాత్రలో నటించారు. విశాల్ ఫిలిం ఫ్యాక్టరీ బ్యానర్ పై ఈ సినిమాని విశాల్ నిర్మిస్తున్నారు. యువన్ శంకర్ రాజా సంగీత దర్శకత్వం వహించారు.

చక్ర, విశాల్ – యువన్ శంకర్ రాజా కాంబినేషన్ లో వస్తున్న 10వ సినిమా. ఈ సినిమాని తెలుగు, తమిళ, కన్నడ, మలయాళ భాషల్లో విడుదల చేయనున్నట్లు చిత్ర బృందం అధికారికంగా తెలిపింది. డిజిటల్ క్రైమ్స్ నేపథ్యంలో రూపొందిన చక్ర సినిమా ఫిబ్రవరి 19 వ తేదీన థియేటర్లలోకి రానుంది.

ఇటీవలి కాలంలో మిర్చి సినిమాతో నదియా, అజ్ఞాతవాసి సినిమాతో ఖుష్బూతో పాటు ఇంకా చాలా మంది హీరోయిన్లు కం బ్యాక్ ఇచ్చారు. ఇప్పుడు ఈ జాబితాలోకి మరో హీరోయిన్ కూడా చేరబోతున్నట్టు వార్తలు వినిపిస్తున్నాయి. మన్మధుడు సినిమాతో తెలుగు ఇండస్ట్రీకి పరిచయమైన హీరోయిన్ అన్షు ఇప్పుడు ఒక క్రేజీ కాంబినేషన్ లో రూపొందుతున్న సినిమాతో కం బ్యాక్ ఇవ్వబోతున్నారట.

యంగ్ టైగర్ జూనియర్ ఎన్టీఆర్ – త్రివిక్రమ్ శ్రీనివాస్ కలిసి మరొక సినిమా చేయబోతున్నట్టు ప్రకటించారు. హారిక హాసిని క్రియేషన్స్ పై ఎస్ రాధాకృష్ణ (చినబాబు) ఈ సినిమాని నిర్మిస్తున్నారు. ఈ సినిమాకి సంబంధించిన ఇతర వివరాలు ఇంకా తెలియాల్సి ఉన్నాయి. అయితే, ఇందులో ఒక ముఖ్య పాత్రలో అన్షు కనిపించబోతున్నారు అనే వార్తలు వస్తున్నాయి. ఇది నిజమా? లేక పుకారా? అనే విషయం పై క్లారిటీ రావాలంటే అధికారికంగా ప్రకటించేంత వరకు ఆగాల్సిందే

పంజా వైష్ణవ్ తేజ్, కృతి శెట్టి హీరో హీరోయిన్లుగా పరిచయమవుతున్న ఉప్పెన ట్రైలర్ ఫిబ్రవరి 4వ తేదీన 04:05 కి విడుదల అవ్వబోతున్నట్లు చిత్రబృందం ప్రకటించింది. యంగ్ టైగర్ జూనియర్ ఎన్టీఆర్ చేతుల మీదుగా ఈ ట్రైలర్ విడుదల అవ్వబోతోంది.

ఈ సినిమాకి సుకుమార్ శిష్యుడు అయిన బుచ్చిబాబు సానా దర్శకత్వం వహించారు. మైత్రి మూవీ మేకర్స్, సుకుమార్ రైటింగ్స్ బ్యానర్ పై ఈ సినిమాని నిర్మిస్తున్నారు. తమిళ్ స్టార్ హీరో విజయ్ సేతుపతి ఉప్పెన సినిమాలో ఒక ముఖ్య పాత్ర పోషిస్తున్నారు. ఇటీవల ఈ సినిమా టీజర్ విడుదల అయ్యింది.

కొంతకాలం క్రితం దేవి శ్రీ ప్రసాద్ సంగీత దర్శకత్వంలో విడుదలైన ఈ సినిమాలోని మూడు పాటలు ఇప్పటికే ప్రేక్షకాదరణ పొందాయి. ముఖ్యంగా “నీ కన్ను నీలి సముద్రం” పాట అయితే యూట్యూబ్ లో 167 మిలియన్ల వ్యూస్ తో దూసుకుపోతోంది. పాటలతో, టీజర్ తో ప్రేక్షకులకి ఆసక్తి ఇంకా పెంచిన ఉప్పెన సినిమా ఫిబ్రవరి 12వ తేదీన థియేటర్లలో విడుదల అవుతుంది.

రెబెల్ స్టార్ ప్రభాస్, సైఫ్ అలీఖాన్ నటిస్తున్న “ఆదిపురుష్” సినిమా కోసం అభిమానులు ఎంతగానో ఎదురుచూస్తున్న సంగతి తెలిసిందే. అయితే, బాలీవుడ్ డైరెక్టర్ ఓం రౌత్ తెరకెక్కిస్తున్న ఈ సినిమా ఫస్ట్ డే షూట్ లో అగ్ని ప్రమాదం జరిగింది. సాయంత్రం గం.4.15ని.ల సమయంలో ముంబైలోని మలాడ్‌లోని ఇనోర్బిట్ మాల్ సమీపంలోని స్టూడియో లో ఈ అగ్ని ప్రమాదం జరిగింది.

సెట్ లో లెవెల్ 2 లో మంటలు చెలరేగాయని తెలుస్తోంది. అయితే ఈ అగ్ని ప్రమాదం లో ఎవరికీ ఎలాంటి గాయాలు అవ్వలేదు. అయితే, సెట్ లో షూటింగ్ కు సంబంధించి కొన్ని పరికరాలు మాత్రం కాలిపోయాయి. ఈ షూటింగ్ లో ప్రభాస్ కానీ, సైఫ్ అలీఖాన్ గాని పాల్గొనలేదు. సాయంత్రం నాలుగున్నర గంటల సమయం లో అగ్నిమాపక దళానికి సమాచారం అందించగా వారు వెంటనే ఘటనాస్థలానికి వచ్చి మంటలు ఆర్పడానికి ప్రయత్నించారు. మంటలు అంటుకోవడానికి గల కారణాలు మాత్రం తెలియరాలేదు.

 

View this post on Instagram

 

A post shared by PeepingMoon: Bollywood Website (@peeping.moon)

విశ్వక్ సేన్ హీరోగా రూపొందుతున్న పాగల్ సినిమా ఫస్ట్ లుక్ ఇవాళ విడుదలైంది. ఈ సినిమాకి నరేష్ కుప్పిలి దర్శకత్వం వహిస్తున్నారు. శ్రీ వెంకటేశ్వర క్రియేషన్స్ బ్యానర్ పై, దిల్ రాజు తో కలిసి లక్కీ మీడియా అసోసియేషన్ ద్వారా బెక్కెం వేణుగోపాల్ ఈ సినిమాని నిర్మిస్తున్నారు.

ఈ సినిమాకి రథన్ సంగీత దర్శకత్వం వహిస్తున్నారు. ఎస్. మణికందన్ సినిమాటోగ్రఫీ అందిస్తున్నారు. 2020 లో విశ్వక్ సేన్ హీరోగా నటించిన హిట్ సినిమా ప్రేక్షకులను ఆకట్టుకుని హిట్ టాక్ సొంతం చేసుకుంది. ఇప్పుడు ఈ సంవత్సరం పాగల్ సినిమాతో మన ముందుకు రాబోతున్నారు. ఈ సినిమా ఏప్రిల్ 30 వ తేదీన థియేటర్లలోకి రానుంది.

తమిళ్ డైరెక్టర్ శంకర్ పై నాన్ బెయిలబుల్ వారెంట్ జారీ చేసింది ఫిబ్రవరి 1వ తేదీన ఒక వార్త బయటకు వచ్చింది. 2010 లో సూపర్ స్టార్ రజినీకాంత్ గారు హీరోగా నటించిన రోబో సినిమా కథ, తన కథ నుండి కాపీ చేశారు అని అరుర్ అనే ఒక రచయిత శంకర్ మీద కంప్లైంట్ ఫైల్ చేశారు.

ఈ విషయానికి సంబంధించిన విచారణలకి కోర్టు ఆదేశాల తరువాత కూడా హాజరు కాలేదు అనే కారణంగా శంకర్ పై నాన్ బెయిలబుల్ వారెంట్ జారీ చేశారు అని ఆ వార్త సారాంశం. ఈ విషయంపై డైరెక్టర్ శంకర్ స్పందిస్తూ ఒక ప్రెస్ నోట్ విడుదల చేశారు. అందులో, తాను ఇలాంటి వార్త చూసి షాక్ కు గురయ్యానని,

తనపై ఎటువంటి వారెంట్ జారీ అవ్వలేదు అని, రిఫరెన్స్ లో ఏ వారెంట్ అయితే తన పేరుమీద కనిపిస్తుందో, అది ఆన్లైన్ కోర్టు రిపోర్టింగ్ వల్ల జరిగింది అని, అది సరి చేస్తున్నారు అని పేర్కొన్నారు. అంతేకాకుండా ఇటువంటి పుకారు ఇంకా స్ప్రెడ్ అవ్వకుండా ఉండడానికి ఈ ప్రెస్ నోట్ ని మీడియాకి పంపాలని శంకర్ కోరారు.