Ads
అందం అంటే ఏమిటి ? అందంగా ఉండడం అంటే ఎలా ఉండాలి ? అందమైన కళ్లెలా ఉండాలి ? ముక్కు ఎంత పొడవుండాలి ? పెదాల రంగెలా ఉండాలి ? నుదురు ఎంత విశాలంగా ఉండాలి ? మనం అందంగా ఉన్నామని సర్టిఫై చేయాలంటే ఏ ప్రమాణాల ప్రకారం మనముండాలి . ఈ ప్రశ్నలకు సమాధానాలు చెప్పమంటే ఫెయిర్నెస్ క్రీం తయారు చేసినవాడైనా సరే చెప్పలేడు . ఫెయిర్నెస్ క్రీంని పీకలదాక మింగేసినా కూడా సమాధానం చెప్పలేడు .
Video Advertisement
representative image
ఆసియా వాసుల అందం ప్రమాణాలు యూరప్ వాసులకు ఎక్కవు , ఆఫ్రీకా వాసుల అందం ప్రమాణాలు ఆస్ట్రేలియా వాసులకు ఎక్కవు . ఎవరి అందం వారిదే . కానీ మొన్నటి వరకు జిడ్డుని మాయం చేసి మిమ్మల్ని అందంగా మారుస్తుంది మా క్రీం అంటూ ఊదరగొట్టిన కొన్ని ఫెయిర్నెస్ క్రీం సంస్థలు , ఇప్పుడు ఏకంగా ప్రకాశవంతంగా మెరిసిపోండి , మేలైన చర్మకాంతి అంటూ చావగొడ్తున్నాయి .
representative image
“మొదట్లో తెల్లబడతారని ప్రకటనలు వచ్చేవి . ఇప్పడు దాని స్థానంలో గ్లోయింగ్ మరియు బ్రైటనింగ్ స్కిన్ అంటూ వస్తున్నాయి . దీనికి కారణం అడ్వర్టైజ్‌మెంట్ అసోసియేషన్ గైడ్‌లైన్స్ కఠినంగా మారడమే . నిజంగా ఒక క్రీమ్ వాడడం చేత తెల్లబడినట్టైతే దేశంలో అందరూ దాన్ని వాడుతున్నట్టైతే అందరి రంగూ మారాలి కదా. అయినా విషయం ఇక్కడ అది కాదు . కేవలం మెరిసే చర్మం మాత్రమే ఆత్మవిశ్వాసంతో ముందుకు పోవడానికి ఉపయోగపడుతుంది అనేది శుద్ద తప్పు .
representative image
మన దేశంలో తెల్ల రంగు అంటే మోజు సర్వ సాధారణం. దానికి ప్రత్యక్ష ఉదాహరణ ఐశ్వర్యరాయ్ ప్రపంచ సుందరిగా గెలిచిన ఏడాది పెరిగిన కాస్మోటిక్స్ వ్యాపారమే. అప్పటి నుండి మొదలైంది అందంగా కనపడడం అంటే తెల్లగా కనపడడమే . ఇదే విషయంపైన పైనా బాలివుడ్ నటి నందితాదాస్ మొదటి నుండి ఫైట్ చేస్తూనే ఉన్నారు . బ్లాక్ ఈజ్ బ్యూటిఫుల్ పేరిట ఒక క్యాంపెయిన్ రన్ చేశారు . మీరు గమనిస్తే ఎదుగుతున్న దేశాల వారికే ఈ అందాల కిరీటాలు ఇస్తారనేది పచ్చి నిజం మీకు కళ్లకట్టినట్టు కనపడుతుంది.
representative image
ఒకవైపు మహిళలు అన్ని రంగాల్లో తమని తాము ప్రూవ్ చేసుకోవడానికి ముందుకి వస్తుంటే , మరోవైపు అందంగా ఉంటేనే విజయాలు సాధ్యం అని చెప్పే ఇలాంటి యాడ్స్ మనకి ఏం ఇంజెక్ట్ చేస్తున్నట్టు . అందం అంటే ఆరోగ్యంగా ఉండడం, అందం అంటే ఆత్మవిశ్వాసంతో ముందుకు పోవడం, అందం అంటే ఆత్మాభిమానం కలిగి ఉండడం అని నేర్పించండి . అందం అనే భారాన్ని ఆడవాళ్లే ఎందుకు మోయాలి? అనే ప్రశ్నని మీకు మీరే వేసుకోండి.
representative image
మన అమ్మమ్మల కాలంలో ముత్యమంతా పసుపు ముఖమెంత ఛాయ అని పసుపుని వాడేవాళ్లు . దాని వల్ల అందానికి అందం, ఆరోగ్యం ఉండేది . అవన్ని వదిలేసి మార్కెట్ మాయజాలంలో పడి జంతు కలేభరాలనుండి తయారు చేసిన ఫెయిర్నెస్ క్రీముల వెంట పడుతున్నాము. కెమికల్ ఫెయిర్నెస్ క్రీమ్లు కొన్ని శరీరాలకి పడవు , కొన్ని శరీరాలకు పడతాయి .అందం మాట ఫెయిర్నెస్ క్రీమ్ కంపెనీ వాడెరుగు చర్మసంబంధ వ్యాధులతో మరో కొత్త తలనొప్పి . కొసమెరుపేంటంటే ఈ ఫెయిర్నెస్ క్రీములు మగాళ్లని కూడా వదల్లేదు .
End of Article
