Anudeep

మనకు భయం వేసినప్పుడు వెంటనే ఎవరిని తలుచుకుంటాం..? ఈ ప్రశ్నను చిన్న పిల్లాడిని అడిగినా ఆంజనేయుడు అంటూ టపీమని సమాధానం ఇస్తాడు. అలాగే.. ఆంజనేయుడు ఆరోగ్య ప్రదాత కూడా.. చాలా హనుమాన్ దేవాలయాల్లో చిన్నపిల్లలకు అంజనం కట్టిస్తూ ఉంటారు. ఏదైనా అనారోగ్యం బారిన పడినవారు తొందరగా కోలుకుంటారని నమ్ముతారు.

ఆంజనేయుడు గుడి లేని ఊరు ఈ భారత్ దేశం లో ఏదీ ఉండదు. చాల దేవాలయాల్లో కూడా ఓ చోట హనుమంతుని కి చిన్న ఉపాలయాన్ని కూడా నిర్మిస్తూ ఉంటారు. ఏ గుడి లో అయినా హనుమంతుడు కండలు తిరిగిన దేహం తో కనిపిస్తూ అభయం ఇస్తూ ఉంటాడు. అయితే.. ప్రపంచం లో ఒకే ఒక్క చోట మాత్రం హనుమంతుడు స్త్రీ రూపం లో దర్శనం ఇస్తూ ఉంటాడు. అదెక్కడో కాదు.. మన భారత్ లోనే.. ఛత్తీస్ ఘర్, రతన్ పూర్ జిల్లాలో గిర్జ బంద్ వద్ద హనుమాన్ దేవాలయం లో హనుమంతుడు స్త్రీ రూపం లో దర్శనమిస్తాడు.

దీని వెనక ఓ స్థల పురాణం కూడా ఉంది. ఈ ప్రాంతాన్ని ఒకప్పుడు దేవ రాజ్ అనే రాజు పరిపాలించేవాడు. ఆయనకు తీవ్రమైన అనారోగ్యం ఉండేదట. అయితే.. అనారోగ్యం నుంచి బయటపడలేక ఆత్మహత్య చేసుకోవాలనుకున్నాడు.. ఆ రోజు రాత్రి రాజుకు కలలో ఆంజనేయ స్వామి కనిపించి తనకు గుడి కట్టించాలని కోరతాడు. దీనితో.. ఆ రాజు ఆత్మహత్య అన్న ఆలోచన మానుకుని గుడి కట్టించడానికి ఏర్పాట్లు చేస్తాడు. నిర్మాణం పూర్తి కావొస్తున్న తరుణం లో రతనపూర్ రాజు పృథ్వి దేవ్ రాజ్ కు హనుమంతుడు మరోసారి కనిపించి మహామాయ కుండ్ వద్ద ఉన్న విగ్రహాన్ని తీసుకు వచ్చి ప్రతిష్టించాలని కోరతాడు.

రాజు అలానే అక్కడకు వెళ్లి చూడగా.. అక్కడ దేవతా రూపం లో ఉన్న హనుమంతుడి విగ్రహం కనబడుతుంది. ఆ విగ్రహాన్ని తీసుకొచ్చి ప్రతిష్టాపన చేస్తారు. అప్పటినుంచి హనుమంతుడు ఈ ఆలయం లో దేవతా రూపం లో పూజలు అందుకుంటున్నాడు. ఇక్కడ దర్శనం చేసుకుని స్వామీ ని ఏ కోరిక కోరుకున్నా కచ్చితం ఆ కోరిక నెరవేరుతుందని చెబుతుంటారు. రాయపూర్ స్వామి వివేకానంద ఎయిర్ పోర్ట్ నుంచి 140 కిలోమీటర్ల దూరం లో బిలాస్ పూర్ ఉంది. అక్కడ నుంచి క్యాబ్ లేదా బస్ ద్వారా 28 కిలోమీటర్ల దూరం లో ఉన్న రతన్ పూర్ కు చేరుకోవచ్చు. రాయపూర్ ఎయిర్ పోర్ట్ నుంచి కనీసం 5 గంటల సమయం పడుతుంది.

ఆ పరమేశ్వరుడు భక్త సులభుడన్న సంగతి తెలిసిందే. చెంబుడు నీళ్లు పోసి.. నోరారా ఆయన్ను పిలుస్తూ నమస్కారం పెడితే మురిసిపోతాడు.. భక్తులు ఏ ఆపదలో ఉన్నా వచ్చి కాపాడతాడు. ఇది ఓ బ్రిటిష్ వ్యక్తికీ కూడా అనుభవమైంది. ఆ పరమశివుడు పై ఉన్న అపార భక్తి తోనే ఆయన బైజ్ నాధ్ మహాదేవ్ ఆలయాన్ని నిర్మించాడు. ప్రపంచం లో బ్రిటిష్ వారు నిర్మించిన ఏకైక దేవాలయం బైజ్ నాధ్ మహాదేవ్ ఆలయం. దీని వెనుక చరిత్రలో వివరం గా చెప్పబడి ఉంది.

1879 వ సంవత్సరం లో బ్రిటిష్ వారు భారత్ ను పాలిస్తున్న కాలం లో బ్రిటిష్ లెఫ్టినెంట్ కల్నల్ మార్టిన్ ఆఫ్ అగర మాల్వా ఆఫ్ఘన్ పఠాన్లతో యుద్ధం చేస్తూ ఉన్నారు. ఆ సమయం లో ఆయన ఇండియా లో ఉన్న తన భార్య కు ఉత్తరాలు రాస్తూ ఉండేవారట. అయితే.. యుద్ధ సమయం కావడంతో.. మార్టిన్ కు తన భర్త గురించి ఆందోళన గా ఉండేదట. ఒకసారి ఉత్తరం రాకపోతే.. ఆమె బెంబేలెత్తిపోతోంది. ఈ సమయం లో ఆమె ఓ రోజు బైజ్ నాధ్ ఆలయాన్ని సందర్శించడం జరుగుతుంది.

ఆ ఆలయం లో పండితులు ఆ మహా శివునికి పూజలు చేస్తూ ఉండడాన్ని గమనిస్తుంది. ఆమె విచార వదనం తో ఉండడం తో ఆమె దగ్గరకు వచ్చిన ఓ పండితుడు ఏమి జరిగిందని ప్రశ్నిస్తాడు. ఆమె జరిగిన సంగతి చెప్పడం తో… ఆయన ఆ శివుడ్ని పూజించమని.. అంతా మంచే జరుగుతుందని హితవు చెప్తాడు. ఆమెకు “ఓం నమః శివాయ” అనే మంత్రాన్ని ఉపదేశించి 11 రోజుల పాటు పఠించమని చెబుతాడు.

ఆమె ఆ మంత్రాన్నే స్మరించుకుంటూ ఆ పరమేశ్వరుడిని కొలుస్తూ ఉంటుంది. 11 వ రోజు నాటికి ఆమెకు ఓ ఉత్తరం వస్తుంది. యుద్ధం పూర్తి అయిందని, ఈ యుద్ధం లో గెలిచామని చెబుతాడు. అసలు తాను చనిపోయేవాడినని.. అంతలా తన చుట్టూ పఠాన్లు చుట్టుముట్టారని.. ఆ సమయం లో జటాజూటాలు కలిగిన ఓ యోగి వచ్చి వారితో పోరాడి తనను కాపాడి గెలిపించినట్లు ఉత్తరం లో రాస్తాడు. ఆ తరువాత మార్టిన్ కూడా ఇంటికి వచ్చేస్తాడు. ఇంటికి వచ్చాక జరిగినదంతా తెలుసుకుని ఆ యోగి పరమేశ్వరుడే అని గ్రహిస్తాడు.

తన భార్య శివుడికి పూజ చేసుకోవడం, తన భర్త ఇంటికి క్షేమం గా వస్తే.. గుడిని పునర్నిమిస్తామని మొక్కుకోవడం గురించి కూడా మార్టిన్ తెలుసుకుంటాడు. ఆ తరువాత ఇద్దరు కలిసి బైజనాధ్ మహాదేవ్ ఆలయానికి వెళ్లి పూజ చేసుకుని.. పునర్నిర్మాణానికి ఏర్పాట్లు చేస్తారు. ఇప్పటికీ ఆ దేవాలయ గోడలపై కల్నల్ దంపతుల పేర్లు చెక్కబడి ఉండడం మనం గమనించవచ్చు.