Human angle

ఈ అమ్మాయి పేరు మానస వారణాసి. అందంగా ఉంది కదూ.. ఈ అమ్మాయి అందమైన అమ్మాయి మాత్రమే కాదు అందమైన మనసు ఉన్న అమ్మాయి కూడా. ఈ ఏడాది డిసెంబర్ 16 న మిస్ వరల్డ్ పోటీలు జరుగుతున్నాయి. ఈ పోటీలలో భారత దేశం తరపున హైదరాబాద్ కు చెందిన అమ్మాయి మానస వారణాసి పాల్గొంటున్నారు.

ఈ పోటీలలో గెలిచి మిస్ వరల్డ్ 2021 టైటిల్ ను సొంతం చేసుకోవడానికి ఆమె సిద్ధంగా ఉన్నారు. ఈ మిస్ వరల్డ్ 2021 పోటీలు ప్యూర్టో రికోలోని శాన్ జువాన్, కోకాకోలా మ్యూజిక్ హాల్‌లో జరగనున్నాయి.

ఈ పోటీలలో భారత్ తరపున పాల్గొనే మానస వారణాసి గురించి తెలుసుకుందాం. ఈమె ఈ ఏడాది ఫిబ్రవరిలో మిస్ ఇండియా 2020 టైటిల్ ను కూడా సొంతం చేసుకుంది. మిస్ వరల్డ్ 2000 పోటీ విజేత, బాలీవుడ్ స్టార్ హీరోయిన్ ప్రియాంక చోప్రా మానస కు ఇన్స్పిరేషన్. ఆమెను ఇన్స్పిరేషన్ గా తీసుకుని మిస్ ఇండియా వరల్డ్ 2020 పోటీల్లో కూడా పార్టిసిపేట్ చేసింది. శాస్త్రీయ నృత్యం భరతనాట్యంలో మానస ప్రావీణ్యత సంపాదించుకుంది.

అంతేకాదు.. ‘బ్యూటీ విత్ ఎ పర్పస్’ ప్రాజెక్ట్ (BWAP) కోసం తెలంగాణ ప్రభుత్వంతో కలిసి పని చేస్తోంది. ఇందులో భాగంగానే మహిళలు, పిల్లల హక్కుల కోసం కొన్ని తక్షణ చర్యలు తీసుకోవాలంటూ ప్రభుత్వానికి విజ్ఞప్తి చేసారు. మానస తండ్రి ఉద్యోగరీత్యా మలేషియా కు వెళ్లడంతో మానస తన గ్రేడ్ 10 చదువును జిఐఐఎస్ మలేషియా క్యాంపస్ నుంచి పూర్తి చేసింది. ఇంటర్ చదువును హైదరాబాద్ లోని ఎఫ్ఐఐటి జెఈఈలో పూర్తి చేసింది. ఆ తరువాత వాసవి కాలేజ్ ఆఫ్ ఇంజనీరింగ్ లో కంప్యూటర్ సైన్స్ ను పూర్తి చేసింది. ప్రస్తుతం ఫైనాన్షియల్ ఇన్ఫర్మేషన్ ఎక్స్ఛేంజ్ అనలిస్ట్‌ గా జాబ్ కూడా చేస్తోంది.

అనేక సోషల్ ఆక్టివిటీస్ లో కూడా మానస చురుకుగా పాల్గొంటారు. మిస్ ఇండియా టైటిల్ ని గెలవడానికి ముందు కూడా ఆమె స్థానికంగా ఉన్న ఎన్జీఓ తో కలిసి పని చేసింది. పేద విద్యార్థులకు ఇంగ్లీష్, మాథెమాటిక్స్ ను బోధించడం ఆమెకు హాబీ. మానస వయసు 23 సంవత్సరాలు. ఆమె తన శరీరాన్ని ఫిట్ గా ఉంచుకోవడం కోసం నిరంతరం యోగ చేస్తారు. చెల్లి, అమ్మ, అమ్మమ్మ తన జీవితంలో తనని అత్యంత ప్రభావితం చేసిన వ్యక్తులు అని మానస చెబుతూ ఉంటుంది. మిస్ వరల్డ్ 2021 టైటిల్‌ను గెలుచుకోవడమే తన కల అని మానస గర్వం గా చెబుతుంది. ఈ పోటీలో దాదాపు 100 మంది పాల్గొంటున్నారు. వారందరిలో మన మానస విజేత అవ్వాలని మనస్ఫూర్తిగా విషెస్ చెప్దామా..

పెళ్లి ఎవరి జీవితంలో అయినా ఎంతో ముఖ్యమైనది. మనం ఎంతో ఇష్టపడి పెళ్లి చేసుకున్న వారు పెళ్లి అయిన తరువాత మునుపటి లా ప్రేమించకపోతే మనసుకు బాధ కలుగుతూ ఉంటుంది. ఇలా చాలా కుటుంబాల్లో జరుగుతూనే ఉంటుంది. కానీ కారణం ఏంటి అనేది ఎవరు ఆలోచించుకోరు. ఓ భార్య.. తన భర్తతో కూర్చుని మాట్లాడుకుని ఈ సమస్యని ఎలా పరిష్కరించుకుందో ఇప్పుడు చూద్దాం.

ఓ సెలవు రోజున ఇంట్లో తన భర్త మొబైల్ లో చూస్తూ ఉన్న సమయంలో పక్కన వెళ్లి కూర్చుంది. మీతో మాట్లాడాలి.. ఈ ఫోన్ ని స్విచ్ ఆఫ్ చేయమని కోరింది. మొదట నిరాకరించినా.. తన భార్య ఫేస్ డల్ గా ఉండడం చూసిన ఆ భర్త ఫోన్ ని స్విచ్ ఆఫ్ చేసాడు. ఆ తరువాత విషయమేమిటని అడగగా.. భార్య చెప్పడం స్టార్ట్ చేసింది.. “మీరు పెళ్ళికి ముందు చాలా సరదాగా ఉండేవారు. నాపై ప్రేమ గా చూసేవారు.. కవ్వించేవారు.. కానీ.. ఇప్పుడు మీరు రోజులో ఎక్కువ సేపు ఆఫీస్ వర్క్ లేదా ఫోన్ ని మాత్రమే చూస్తూ సమయం గడిపేస్తున్నారు..

నన్ను ఇంత దూరం పెట్టడానికి కారణమేంటి..? నాలో నేను ఏదైనా మార్చుకోవాలి అంటే మార్చుకుంటా..” అంటూ ఆ భార్య చెప్పడం ఆపింది. దానికి ఆ భర్త ఒక చిరునవ్వు నవ్వి ఇలా చెప్పాడు. ఇది సహజం గా అందరి కుటుంబాల్లోనూ జరిగేదేనని వివరించాడు. చిన్నప్పుడు తన అంకుల్ తనకు చెప్పిన ఉదాహరణను తన భార్య కి కూడా చెప్పాడు. “ఇప్పుడు మనం ఏదైనా బంగారం కొన్నాము అనుకో.. దానిని కొంతకాలం మాత్రం అపురూపం గా చూస్తాం. అందరికి చూపించుకుని మురిసిపోతాం. తరువాత బీరువాలో లాకర్ లో పెట్టుకుంటాం..

అంతే తప్ప.. అస్తమానం దానిని తీసి చూస్తూ కూర్చోలేము కదా..” అంటూ ఆ భర్త వివరించాడు. అతను ఈ మాటలు చెప్పగానే.. ఆ భార్య గలగలా నవ్వింది. ఆమె ఎందుకు నవ్వుతోందో భర్తకి అర్ధం కాలేదు.. నవ్వడం ఆపి.. ఆ భార్య ఇలా చెప్పింది.. ” చాలా బాగా కంపేర్ చేస్తున్నారు. కనీసం నన్ను ఎదో ఒక వస్తువు తో పోల్చకుండా బంగారం తో పోల్చినందుకు సంతోషం. అది వస్తువు.. కానీ..నేను మనిషిని. నన్ను కూడా లాకర్ లో పెట్టి ఎలా ఉంచుకుంటారు..? అని ప్రశ్నించింది. ఆమె భర్త ఆలోచనలో పడ్డాడు.

ఆమె చెప్పడం కొనసాగించింది. “ఇప్పుడు ఒక మొక్క ఉంది అనుకోండి. దానిని తీసుకొచ్చి నాలుగు రోజులు మురిసిపోయి, తిరిగి లాకర్ లో పెట్టుకోవడం కుదురుతుందా..? లాకర్ లో పెడితే అది వాడిపోతుంది. దానికి రోజు నీళ్లు పోసి.. ఎండా తగిలే ప్రదేశం లో ఉంచి.. రోజు పట్టించుకుంటేనే అది పెరుగుతుంది.. అని చెప్పుకొచ్చింది. అయినా బంగారాన్ని ఉంచుకుంటాం.. మొక్కలని పెంచుకుంటాం.. ఈ ఒక్క వాక్యం లోనే తేడాని అర్ధం చేసుకోవచ్చు.

మనుషులు కూడా అంతే అండి.. వారితో బంధాన్ని ప్రేమానురాగాలతో పెంచుకోవాలె కానీ బొమ్మల్లా ఇంట్లో ఉంచుకోకూడదు..” అంటూ చెప్పడం ఆగింది. ఆమె ఏమి చెప్పదల్చుకుందో అర్ధం చేసుకున్న ఆ భర్త.. ఆమె వైపు చూసి ప్రేమ గా నవ్వాడు.. గతం లో అతను నవ్వే జీవం లేని నవ్వుకి.. ఇప్పుడు ఆమె వైపు కురిపిస్తున్న ప్రేమతో కూడిన నవ్వులకు ఉన్న తేడాను ఆమె స్పష్టం గా గుర్తించింది. సంతృప్తిగా అతని గుండెలపై వాలింది.

NOTE: All the images used are for representative purpose only

భార్య.. భర్త కోసం సొంత కుటుంబాన్ని సైతం పక్కన పెట్టి ఏడడుగులు నడిచి వస్తుంది. మనతో పాటు జీవితాంతం ఉంటుంది. అలాంటి భార్యని..ఎక్కడకి పోతుంది లే అని నిర్లక్ష్యం చేసే భర్తలు చాలా మందే ఉన్నారు. కానీ ఆ భార్యల మనసులో ఏమి ఉంటుందో ఎవరు ఆలోచించారు. అలాంటి ఓ భార్య.. తానూ అత్తగారు అయినా తరువాత తన కొడుక్కి ఓ ఉత్తరం ద్వారా ఎలాంటి పాఠం నేర్పించిందో ఈ ఆర్టికల్ లో చూద్దాం.

representative image

ఓ హోటల్ లో భార్య, భర్త, పిల్లలు డిన్నర్ చేస్తుండగా.. ఆ భర్తని భార్య ఇలా అడుగుతుంది. “ఏమండి మీరు చాలా బిజీ గా ఉంటారు. అలాంటిది.. సడన్ గా మీలో ఈ మార్పు ఎలా వచ్చింది..? వారానికోసారి మమ్మల్ని బయటకు తీసుకెళ్తున్నారు. మాతో సరదాగా గడుపుతున్నారు.. మాకు తెలీకుండా, అనుమానం రాకుండా రెండో ఇల్లు ఏమైనా పెట్టారా ఏంటి..??? ” అని అడుగుతుంది. దానికి చిరునవ్వి నవ్వినా ఆ భర్త.. చనిపోయిన తన తల్లి రాసి ఇచ్చిన లేఖ ను భార్య చేతిలో పెట్టి కన్నీళ్లు పెట్టుకుంటాడు.

representative image

ఇంతకీ ఆ లేఖ లో ఏమి ఉందంటే… ఆ లేఖ ను ఆ భర్త తల్లి రాసింది. ” చిన్నా.. ఈ లేఖ నువ్వు చదివేసరికి నేను బతికుంటానో లేదో తెలియదు.. కానీ మీ నాన్న కు నేను చెప్పలేకపోయిన విషయాలను, నీ భార్య నీతో చెప్పలేకపోతున్న విషయాలను.. నేను చనిపోయేలోపు నీతో పంచుకోవాలనుకుంటున్నాను.

నాకు పెళ్లి అయిన తరువాత నా భర్త కూడా నీలానే బిజీ గా ఉండేవాడు. డబ్బు సంపాదన లో పడి ఇంటిని కూడా మర్చిపోయేవాడు. అప్పుడు నాకు మీరే లోకం.పిల్లలే సర్వస్వము అనుకుని బతికేసాను. మీరు పుట్టకముందు మీ నాన్న కోసం… మీరు పుట్టి స్కూల్స్ కి వెళ్తున్నపుడు, ఎప్పుడు ఇంటికి వస్తారా అని మీకోసం ఎదురు చూస్తూ గడిపేశాను…

representative image

మీరు పెద్దవాళ్లయ్యి మీ జీవితాలు మీరు గడిపేస్తారు. ఉన్న ఒక్క ఆడపిల్ల కి పెళ్లి చేసి విదేశాలకు పంపేసాము. ఆమెకు కాపురం తోనే సరిపోతుంది. ఎప్పుడో ఒకసారి పది నిముషాలు ఫోన్ చేస్తుంది. ఆ ఫోన్ కోసం పడిగాపులు గతిస్తుంటాను. మీ నాన్న అప్ప చెప్పిన వ్యాపారం లో నువ్వు కూడా బిజీ అయ్యావు. నువ్వెప్పుడు ఇంటికి వస్తావో.. నాతొ కాసేపు మాట్లాడుతావో అని ఇప్పడూ ఎదురు చూస్తూనే ఉన్నాను. ఇక మీ నాన్న.. మందులకు, భోజనానికి తప్ప నాతొ మాట్లాడేది ఏమి ఉండదు. ఆయనకు పేపర్ చదవడం పై ఉన్న ఆసక్తి నాతో మాట్లాడడం పై ఉండదు. వయసులో ఉన్నప్పుడు లేనిది..ఇప్పుడు రమ్మంటే ఎలా వస్తుంది..?

representative image

నా జీవితమంతా ఎదురు చూపుల్తొనే గడిచిపోయింది. ఇదే పరిస్థితి నీ భార్యకి రాకూడదని కోరుకుంటున్నా.. అందుకే ఇప్పటి వరకు మనసు విప్పి పంచుకొని విషయాలను ఇప్పుడు పంచుకుంటున్నా.. అపార్ధం చేసుకోకుండా.. అర్ధం చేసుకుంటావని ఆశిస్తున్నా..

representative image

నీ భార్యతో సమయం గడుపు.. నా కోడలు, మనవడు, మనవరాలిని జాగ్రత్తగా చూసుకో చిన్నా..” అని ఆ లేఖ లో రాసి ఉంది. ఆ లేఖ ను చదివిన భార్య కళ్ళ లోంచి చిన్న గా కన్నీరు కారుతుండడం తో.. భర్త భుజం పై వాలింది. అతను అనునయం గా ఆమె పై చేయి వేసి తన తండ్రి చేసిన తప్పుని తానూ చేయకూడదని నిర్ణయించుకున్నాడు.

ఒకొక్కసారి భయంలో మనం తీసుకునే నిర్ణయం తర్వాత ఇద్దరికీ దారి తీస్తాయి. మన పరిస్థతిని కొంత మంది అర్ధం చేసుకున్నా కూడా కొంత మంది అర్ధం చేసుకోలేరు. అలాంటప్పుడే ఇలాంటి సంఘటనలు ఎదురవుతాయి.

తను భయంవల్ల చేసిన ఒక పని, తర్వాత తనకు చాలా ఇబ్బందులు తీసుకొచ్చింది అంటూ ఒక అమ్మాయి ఈ విధంగా రాసింది. ఆ కథ ఏంటో ఆ అమ్మాయి మాటల్లోనే విందాం.

నా పేరు కవిత. నేను కాలేజీలో చదువుకుంటున్నప్పుడు ఒక అబ్బాయి నా వెనకాల పడ్డాడు. ముందు కొద్ది రోజులు నేను అసలు పట్టించుకోలేదు. తర్వాత అలాగే వెంటపడుతూ ఉంటేటప్పటికి మాట్లాడాను. అతనికి నేనంటే చాలా ఇష్టం అని అతని మాటల్లో అర్థమయ్యింది. నేను కూడా అతనిని ఇష్టపడ్డాను. ఆ తర్వాత మా ఇద్దరి మధ్య గొడవలు మొదలయ్యాయి. బ్రేకప్ అయ్యింది.

ఒక సంవత్సరం పాటు నేను తనతో మాట్లాడాలి అని, కన్విన్స్ చేయాలి అని చాలా ప్రయత్నించాను. కానీ నన్ను పట్టించుకోలేదు. అప్పటికే మా ఇంట్లో వాళ్ళు నాకు ఒక సంబంధం చూశారు. నాకు ఆ అబ్బాయి నచ్చాడు. దాంతో పెళ్లికి సరే అన్నాను. మిగిలిన విషయాలు అన్నింటి గురించి కూడా ఆలోచించుకొని కొద్ది రోజుల తర్వాత నిర్ణయం చెప్తాము అని మేము చెప్పాము. ఇంక వాళ్లకి అబ్బాయి నచ్చాడు అని చెప్పి, ఎంగేజ్మెంట్ కి ముహూర్తం ఫిక్స్ చేసుకుందాం అనుకున్న సమయానికి నన్ను ప్రేమించిన అతను మళ్ళీ వచ్చాడు. నాకు ఫోన్ చేయడం, మెసేజ్ చేయడం మొదలుపెట్టాడు. నేనంటే ఇష్టం ఇంకా పోలేదు అని, ఈ పెళ్లి క్యాన్సిల్ చేయమని, తనని పెళ్లి చేసుకోమని అడిగాడు.

నిజం చెప్పాలంటే నాకు కూడా అప్పటికీ అతనంటే ఇష్టం ఉంది. దాంతో మా ఇంట్లో వాళ్ళతో మాట్లాడి ఒప్పించడానికి ప్రయత్నించాను. ముందు మా ఇంట్లో వాళ్ళు నా మీద చాలా కోప్పడ్డారు. కానీ నేను అవన్నీ భరించాను. చివరికి నేను ప్రేమించిన వాడితో నా పెళ్లి చేయడానికి సరే అన్నారు. ఇదంతా జరిగిన రెండు రోజుల తర్వాత అతని మాటలో తేడా మళ్లీ గమనించాను. కట్నం కావాలని, బిజినెస్ పెట్టడానికి డబ్బులు కావాలని అడగడం మొదలు పెట్టాడు. ఈసారి నేను ఆలోచించి నిర్ణయం తీసుకుందామని డిసైడ్ అయ్యాను.

అలాంటి వాడితో నేను జీవితాంతం కలిసి ఉండలేను అని నాకు అర్ధమైపోయింది. దాంతో నేను అతనికి ఫోన్ చేశాను. “మనిద్దరికీ పెళ్లి జరగదు. జరిగితే సంతోషంగా ఉండలేం” అని చెప్పి ఫోన్ పెట్టేసాను. అతను మళ్లీ నాకు కాల్ చేసి, “జాగ్రత్తగా ఆలోచించుకుని నిర్ణయం తీసుకో. మనిద్దరం దిగిన ఫోటోలు, మెసేజెస్, కాల్ రికార్డింగ్స్ అన్నీ నా దగ్గర ఉన్నాయి” అని బెదిరించడం మొదలు పెట్టాడు. ఈసారి నేను భయపడినా కూడా ఈ విషయం అమ్మానాన్నలకు చెప్పలేదు. ఎందుకంటే ఇప్పటికే వాళ్లు నావల్ల చాలా ఇబ్బందులు ఎదుర్కొన్నారు. ఇంక నేను వారిని ఇబ్బంది పెట్టదలుచుకోలేదు.

ముందు అనుకున్న అబ్బాయితోనే నా పెళ్లి జరిగింది. అతను నన్ను చాలా బాగా చూసుకున్నాడు. నేను చాలా హ్యాపీగా ఉన్నాను. కానీ ఎక్కడో నా ప్రేమ విషయం నా భర్తకి చెప్పలేదు అనే బాధ నాకు ఉండేది. ఒకరోజు సడన్ గా నా భర్త తన ఫోన్ తీసి నాకు ఇచ్చి “ఏంటి ఇవన్నీ?” అని అడిగారు. చూస్తే నన్ను ప్రేమించిన అతను పంపించిన ఫొటోస్ ఉన్నాయి. నాకు ఏం మాట్లాడాలో అర్థం అవ్వలేదు. నా భర్త చాలా కోపంగా ఉన్నారు. ఏం చెప్పినా వినే పరిస్థితిలో లేరు. అయినా సరే నేను జరిగింది అంతా చెప్పడానికి ప్రయత్నించాను.

చెప్తే ఏమవుతుందో అని భయంతోనే చెప్పలేదు అని, అంతే కాని ఆయనని మోసం చేసే ఉద్దేశం నాకు లేదు అని నేను చెప్పాను. అయినా సరే ఆయన వినలేదు. ఈ సంఘటన జరిగి రెండు నెలలు అవుతోంది. అప్పటి నుండి నాతో సరిగ్గా మాట్లాడటం లేదు. అప్పటి వరకు నన్ను చాలా బాగా చూసుకున్న నా భర్త, తర్వాత నుంచి నా మొఖం కూడా చూడటం మానేశారు. మా మధ్య మాటలు కూడా లేవు. నేను ఎంత మాట్లాడాలని ప్రయత్నించినా ఆయన ముఖం తిప్పుకొని వెళ్ళిపోతున్నారు. అప్పటివరకు మంచిదాన్ని అయిన నేను, ఒక్క సారిగా ఆయన దృష్టిలో ఒక తప్పు చేసిన దాని లాగా అయిపోయాను. నేను నా పరిస్థితి ఎలా వివరించాలి? నేను ఇలా జరిగిందంతా దాచిపెట్టింది కేవలం భయంతోనే అనే విషయం నా భర్తకి ఎలా చెప్పాలి?

పెళ్లి అనేది ఒక వ్యక్తి పర్సనల్ ఛాయిస్. అందరికీ ఒక పర్టిక్యులర్ వయసులోనే పెళ్లి చేసుకోవాలని అనిపించదు. కొంత మందికి పెళ్ళికంటే ముఖ్యమైనవి చాలా ఉంటాయి. కెరీర్ లో ఒక స్టేజ్ కి వచ్చి, వాళ్ళు అనుకున్నది సాధించిన తర్వాత పెళ్లి చేసుకుందాం అనుకునేవాళ్లు చాలా మంది ఉంటారు. అయితే 30 సంవత్సరాలు దాటిన తర్వాత పెళ్లి చేసుకుంటే కొన్ని ఇబ్బందులు వచ్చే అవకాశాలు ఉన్నాయి అని నిపుణులు చెబుతున్నారు. అవేంటంటే.

# ఈ ఏజ్ గ్రూప్ లో జీవితం పై పూర్తి స్పష్టత వస్తుంది. వీలైనంత వరకు కెరియర్ పై ఫోకస్ చేసి డబ్బు సంపాదించాలి అని అనుకుంటారు. దాంతో వైవాహిక జీవితంపై శ్రద్ధ పెట్టడం కష్టం అయ్యే అవకాశాలు ఉన్నాయి.

# ఒకరిపై ఒకరికి ఆకర్షణ తగ్గిపోతుంది. దాంతో వైవాహిక జీవితం చాలా డల్ గా సాగుతుంది అని నిపుణులు అంటున్నారు.

# వేరే విషయాల మీదకి, అంటే ఉద్యోగం, డబ్బు సంపాదించడంలో బిజీ అయిపోవడంతో ఒకరిపై ఒకరికి శ్రద్ధ పెట్టే సమయం చాలా తక్కువగా ఉంటుంది. దాంతో వేరే రిలేషన్ షిప్ వైపు ఫోకస్ వెళ్లే అవకాశాలు ఉంటాయట.

# సమాజం నుండి వచ్చే ఒత్తిడి గురించి మనందరికీ తెలుసు. ఎవరినైనా సరే తొందరగా జడ్జ్ చేయడంలో చాలా మంది ముందుంటారు. దాంతో ఒకవేళ మైండ్ కొంచెం సున్నితంగా ఉన్న వాళ్ళు అయితే సమాజం నుండి వచ్చే ఒత్తిడిని సీరియస్ గా తీసుకునే అవకాశాలు ఉంటాయి. దాని వల్ల మానసికంగా ఇబ్బందులు ఎదురు అవుతూ ఉంటాయి.

# భవిష్యత్తు ఎలా ఉండాలి ? జీవితం ఎలా ప్లాన్ చేసుకోవాలి ? అనే విషయంలో పడి ప్రస్తుతం ఉన్న మూమెంట్ ని ఎంజాయ్ చేసే అవకాశాలు కూడా తక్కువగా ఉంటాయి.

ఏదేమైనా సరే ఇందాక పైన చెప్పినట్టుగా పెళ్లి అనేది ఒక వ్యక్తి పర్సనల్ ఛాయిస్. ఒక వ్యక్తికి తన జీవితంలో ఎప్పుడు ఏం చేయాలి అనే విషయంపై క్లారిటీ ఉంటుంది. దాన్ని బట్టి వాళ్ళు వారి నిర్ణయాలు తీసుకుంటారు. కాబట్టి ఎవరిని కూడా జడ్జ్ చేయలేము.

భారతీయ వివాహ వ్యవస్థ ఎంత ఔన్నత్యమైనదో.. మహిళల పట్ల భారత సమాజం లో ఉన్న భావాలు అంత సంకుచితమైనవి. అందుకే మహిళలు పెళ్లి తరువాత ఉద్యోగం చేయడానికి కొందరు మనస్పూర్తి గా ఒప్పుకోలేరు. ఇలా పెళ్లి తరువాత ఉద్యోగం చేయాలనుకుని.. చేయలేక సతమతమవుతున్న వారు చాలా మందే ఉన్నారు. వారిలో విద్య కూడా ఒకరు. పెళ్లి అయ్యాక తన జీవితం ఎలా మారిపోయిందో విద్య మాకు పంపిన మెసేజ్ ను మీకు అందిస్తున్నాం.

image credits: a screenshot from happy married life short film

“నా పేరు విద్య. నేను ఎంబీఏ పూర్తి చేసాను. నాకు కెరీర్ పై చాలా ప్లాన్స్ ఉండేవి. ఏదైనా మంచి పొజిషన్ లో ఉండాలి అని కలగనేదాన్ని. సొంతం గా ఓ ఫిట్ నెస్ సెంటర్ ను పెట్టి రన్ చేయాలనేది నా కోరిక. సొంతం గా నా కాళ్ళ మీద నేను నిలబడాలి అని అనుకునే మనస్తత్వం నాది. కానీ.. పెళ్లి అయ్యాక ఒక్కసారి గా పరిస్థితులన్నీ మారిపోయాయి. పెళ్ళికి ముందు నేను ఏమి చేస్తాను అన్నా నా తల్లి తండ్రులు ముందు పెళ్లి చేసుకో.. ఆ తరువాత నీకు నచ్చినట్లు ఉండు అని చెప్పేవారు. కానీ, పెళ్లి అయ్యాక నా జీవితం నా చేతుల్లో లేదు అనిపించింది.

image credits: iqlik (a screenshot from Raghuvamsha Rammayya Sugunala Seethamma short film)

నా అత్తగారు, మామ గారు, భర్త.. ఇలా నేను ఏమి చేయాలన్న వీరందరి పర్మిషన్ తీసుకోవాలి. నా అత్తా మామ లు ముందు పిల్లలను కనండి.. ఆ తరువాత ఏమైనా ప్లాన్ చేసుకోండి అని చెప్పారు. నా ఆశలు నెరవేర్చుకోవడానికి ఇంకా టైం ఉందని అర్ధం అయింది. కొంత కాలం పాటు వీరికి అనువు గా ఉండాలని అర్ధం అయింది. నా భర్త తో ప్రేమకు చిహ్నం గా మాకో పండంటి బాబు పుట్టాడు. బాబు పుట్టిన తరువాత రోజు మొత్తం వాడితోనే సరిపోయేది. బాబు ఆలనా పాలన చూసుకోవడం, ఇంట్లో పనులు చక్కపెట్టుకోవడం వంటి పనులే సరిపోయేవి.

image credits: great indian kitchen

నాకంటూ సొంత కలలను నెరవేర్చుకోవడానికి సమయం ఉండేది కాదు. నా కాళ్ళ మీద నేను నిలబడాలని అనుకునే దాన్ని. కానీ, ఇప్పుడు ఏ చిన్న అవసరం వచ్చినా నేను నా భర్తనే అడగాల్సి వస్తోంది. నాకు ఏదైనా నచ్చినవి కొనుక్కోవాలి అన్నా నేను నా భర్తనే అడగాలి. నేనేమి ఖాళి గా లేను. రోజంతా నా కుటుంబం పనులను చేయడానికే సమయం సరిపోతుంది. కానీ, నాకేమి జీతం ఇవ్వరు. ఒక్కరోజు కూడా నాకు ఎలాంటి హాలిడే ఉండదు. అవిశ్రాంతం గా, నిర్విరామం గా పనిచేయాల్సి వస్తుంది. నాలాగా ఇంకెంతమంది ఉన్నారో..

NOTE: All the images used in this article are just for representative purposes. But not the actual characters.

బాల్య వివాహాలు చాలా చోట్ల నిషేధించినా కూడా ఎక్కడో ఒకచోట జరుగుతూనే ఉంటాయి. అలా తనకి జరిగిన బాల్య వివాహాన్ని ఒక యువతి ఎంతో కష్టపడి కోర్టు దృష్టికి తీసుకువెళ్ళింది. వివరాల్లోకి వెళితే. సుశీల బిష్ణోయ్ రాజస్థాన్ కి చెందిన యువతి. సుశీలకి 12 సంవత్సరాలు ఉన్నప్పుడు తన కంటే ఆరు సంవత్సరాలు పెద్దయిన నరేష్ తో పెళ్లి చేశారు.

రాజస్థాన్ లో బాల్య వివాహం జరిగిన తర్వాత ఆ యువతికి 18 సంవత్సరాలు వచ్చేంతవరకు తన పుట్టింట్లోనే ఉంటుంది. సుశీలకి 18 సంవత్సరాలు వచ్చిన తర్వాత తన తల్లిదండ్రులు తనని అత్తవారింటికి వెళ్ళమని ఒత్తిడి చేశారు.  ఏప్రిల్ 2016 లో సుశీల తన అత్తవారింటి నుండి బయటికి వచ్చేసింది.

బాల్య వివాహాల్లో నుండి బయటకి రావడానికి యువతులకు సహాయం చేసే సారథి ట్రస్ట్ అనే ఒక ఎన్జీవో ని నడుపుతున్న క్రితి భారతిని కలిసింది. భారతి, సుశీల నివసించే చోట ఉండే చుట్టుపక్కల వాళ్ళని, బంధువులని కోర్టుకు వచ్చి సాక్ష్యం చెప్పమని కోరారు. కానీ సాక్ష్యం చెప్పడానికి ఒక్కరు కూడా ముందుకు రాలేదు. అప్పుడు నరేష్ ఫేస్ బుక్ అకౌంట్ టైం లైన్ లో వీరిద్దరి పెళ్ళికి సంబంధించిన ఫొటోలు ఉన్నాయి.

వాటిని కోర్టులో ఆధారాలుగా సబ్మిట్ చేశారు. 2017 సెప్టెంబర్ 25 వ తేదీన జోధ్ పూర్ కోర్ట్ వీళ్ళ పెళ్లిని రద్దు చేసింది. తర్వాత సుశీల నేషనల్ ఓపెన్ స్కూల్ సిస్టం లో 12వ తరగతి పరీక్షలను రాసి 62 శాతం స్కోర్ చేసింది. బాగా చదివి పోలీస్ ఆఫీసర్ అవ్వాలి అనేది తన ఆశయం అని చెప్పింది సుశీల.

ఈ కింద ఫొటోలో కనిపిస్తున్న ముగ్గురు అమ్మాయిల పేర్లు లక్ష్మిసాహిత్య, వెంకట శ్రీహిత, అమృత హర్షిణి. వీరి వయసు 19 సంవత్సరాలు ఉంటుంది. ఇంకా డిగ్రీ చదువు కూడా పూర్తి అవ్వలేదు. కానీ.. వీరి టాలెంట్ కి ఓ అమెరికన్ సంస్థ ఫిదా అయ్యింది. వీరికి ఉద్యోగ అవకాశాన్ని ఇచ్చింది.

అంతేకాదు.. వీరు ఎం ఎస్ చేయదల్చుకుంటే.. అందుకు అవసరమైన ఖర్చుని కూడా తామే భరిస్తామని ముందుకొచ్చింది. ఇదంతా ఎందుకో తెలుసా..? ఆ సంస్థ తాలూకు యాప్ ను రూపొందించడంలో వీరు సాయం చేసారు.

Also Read: ఈ ముగ్గురు అక్కా చెల్లెళ్ళతో రొమాన్స్ చేసిన ఒకే ఒక్క టాలీవుడ్ హీరో ఎవరో తెలుసా.?

వివరాల్లోకి వెళితే.. ఈ ముగ్గురు అమ్మాయిలు గుంటూరులోని కోనేరు లక్ష్మయ్య విశ్వవిద్యాలయం (కేఎల్‌ వర్సిటీ)లో బీసీఏ చదువుకుంటున్నారు. ఈ విద్యాలయం తాలూకు ఇతర సంస్థలలోని విద్యార్థులందరికీ కలిపి కోడింగ్ పరీక్షని నిర్వహించారు. ఈ పరీక్షలో ఈ ముగ్గురు అమ్మాయిలు టాప్ ప్లేస్ లో నిలిచారు. వీరికి కోర్స్ లో భాగంగా ఇంటర్న్షిప్ కూడా తప్పనిసరిగా పూర్తి చేయాల్సి ఉంటుంది.

ఈ క్రమంలోనే అమెరికాకు చెందిన ‘మాన్‌ బ్రోసిన్‌’ సంస్థ కేఎల్‌ వర్సిటీ విద్యార్థులకు ఇంటర్న్షిప్ ఆఫర్ ను ఇచ్చింది. కోడింగ్ పోటీలలో ఈ ముగ్గురు విద్యార్థినిలు కనబరిచిన ప్రతిభకు ‘మాన్‌ బ్రోసిన్‌’ సంస్థ అధికారులు ముగ్ధులయ్యారు. వారు ఈ ముగ్గురు విద్యార్థులకు ఇంటర్వ్యూ ను కూడా నిర్వహించారు. అందులో వీరు ప్రతిభ కనబరచడంతో ఇంటర్న్షిప్ కు ఎంపిక చేసారు.

పగలు తరగతులు, రాత్రుళ్ళు ఆన్‌లైన్‌ ఇంటర్న్‌షిప్‌లోను పాల్గొనే వారు. మరోవైపు ఆ సంస్థ ‘నాబ్‌ హబ్‌’ అనే అప్లికేషన్ ను రూపొందించే పనిలో ఉంది. కొన్నిరోజులు ఈ ముగ్గురమ్మాయిలకు కూడా ఆ పనిలో పాల్గొనే అవకాశం కల్పించారు. ఈ పనిలో ఈ ముగ్గురు విద్యార్థులు కూడా సాయం చేసారు. లేబుల్‌ మేనేజ్‌మెంట్‌, సెక్యూరిటీ ఫీచర్లు, కంటెంట్‌ డెవలప్‌మెంట్‌,18 భాషల్లోకి కంటెంట్‌ కన్వర్షన్‌ , టెస్టింగ్ వంటి అంశాలలో వీరు కీలక పాత్ర పోషించారు.

వీరి పని కి అమెరికన్ సంస్థ వారు ఫిదా అయ్యారు. ఎం ఎస్ కు అయ్యే ఖర్చు కూడా తామే భరిస్తామని చెప్పారు. తమ సంస్థలోనే ఉద్యోగం ఇస్తామని పిలుపునిచ్చారు. యాప్‌ ఆవిష్కరణను కూడా వీరి కాలేజీ క్యాంపస్ లోనే చేయనున్నారు. వీరు ఈ యాప్ కి పనిచేస్తున్న రోజులలో కరోనా ఉద్ధృతంగా ఉంది. ఒకరినొకరు కలుసుకోవడానికి కూడా కుదర్లేదు. రాత్రి సమయాల్లో ఆన్లైన్ ఇంటర్న్షిప్ చేస్తూ.. పగలు సమయాల్లో జూమ్ యాప్ లో చర్చలు జరుపుకునే వారు.

ఆన్లైన్ లో తరగతులకు కూడా హాజరు అయ్యారు. దాదాపు రెండు నెలల పాటు రాత్రి, పగలు తేడా లేకుండా కష్టపడ్డారు. వీరు ముగ్గురు మధ్య తరగతి కుటుంబాలకు చెందినవారే. సాహిత్యది అమరావతికి దగ్గరలోని ఓ ఊరు. ఆమె తల్లి తండ్రులు గాడిపర్తి సాంబశివరావు, అమ్మ నారాయణమ్మ. వీరిది వ్యవసాయ కుటుంబం. ఇక శ్రీహిత తండ్రి కారసాని వెంకట శివారెడ్డి ఫిరంగిపురంలో పోలీస్ కానిస్టేబుల్ గా పని చేస్తున్నారు. ఆమె తల్లి అమ్మ కల్యాణి గృహిణి. మూడవ అమ్మాయి అమృతది నరసరావుపేట. ఆమె తండ్రి సైదా గుర్నాధం ఆయిల్‌ వ్యాపారం చేస్తారు. అమ్మ లక్ష్మీ కుమారి గృహిణి.

వీరు ముగ్గురు గ్రామీణ ప్రాంతాల నుంచి వచ్చిన వారే. తమ ప్రతిభకు పరిస్థితులు అడ్డం కావని నిరూపించారు. పెద్దలు ఏమి చెప్పినా మన మంచికే చెప్తారని.. పది, ఇంటర్ అయిపోగానే కెరీర్ ను ప్లాన్ చేసుకోవాలని చెప్తారు ఈ అమ్మాయిలు. ఈ వయసులో సరదాలు కూడా ఎక్కువగానే ఉంటాయని, వాటిని పక్కన పెట్టమని మేము చెప్పట్లేదని.. కానీ అవే లోకం అవ్వకూడదని హితవు చెప్తున్నారు. దేనిలో చేరాలి అన్న ఛాయిస్ మన చేతిలోనే ఉండాలని.. అప్పుడే మన భవిష్యత్ ని మనమే నిర్ణయించుకున్నట్లు అవుతుందని అంటున్నారు ఈ అమ్మాయిలు.

అందాల పోటీలపై ప్రపంచ వ్యాప్తంగా ఆసక్తి ఉంటుంది. ఈ పోటీలలో ఏ దేశంలో అందగత్తెలు ఉన్నారనే విషయమై ప్రపంచ దేశాల ప్రజలు చర్చించుకుంటుంటారు. ఈ పోటీలను కూడా టివి లో వీక్షిస్తూ సంతోషిస్తారు. అన్ని పోటీలలో కంటే మిస్ యూనివర్స్ 2021 పోటీ కి ఎక్కువ ప్రాముఖ్యత ఉంటుంది.

ప్రపంచ దేశాల నుంచి వచ్చిన మోడల్స్ ఇందులో పాల్గొంటారు. ప్రతి ఏడాది ఈ పోటీలు జరుగుతుంటాయి. ఈ ఏడాది మిస్ యూనివర్స్2021 పోటీలలో భారతీయ మహిళ విజయం సాధించింది.

దాదాపు 21 సంవత్సరాల తరువాత భారత్ కు మిస్ యూనివర్స్ 2021 టైటిల్ లభించింది. 2000 వ సంవత్సరంలో ఈ టైటిల్ లారాదత్తాకు లభించింది. మళ్ళీ ఇన్నేళ్ల తరువాత పంజాబ్ కు చెందిన ఓ అమ్మాయి ఈ టైటిల్ ను గెల్చుకుంది. ఆమె గురించి తెలుసుకుందాం. తన పేరు హర్నాజ్ సంధు. వయసు 21 సంవత్సరాలు. చాలా చిన్న వయసులో.. అంటే 17 ఏళ్ల వయసులోనే ఆమె మోడలింగ్ లోకి అడుగుపెట్టారు.

మోడలింగ్ పై ఆమెకు ఉన్న ఆసక్తే ఈ విజయాన్ని సాధించి పెట్టాయి. ఈ పోటీ ఫైనల్స్ లో పెరుగ్వే, సౌత్ ఆఫ్రికా, ఇండియా దేశాల నుంచి వచ్చిన అమ్మాయిలు మిగిలారు. వీరు ముగ్గురుని నిర్వాహకులు ఒకటే ప్రశ్న అడిగారు. ఒత్తిడిని అధిగమించడానికి అమ్మాయిలకు మీరిచ్చే సలహా ఏంటి..? అని అడగగా.. హర్నాజ్ తనదైన శైలిలో సమాధానం ఇచ్చారు.

అమ్మాయిలు తమ బలాన్ని గుర్తించాలని.. తమని తాము నమ్మకపోవడం వల్లే ఒత్తిడికి గురవుతారని, ఇతరులతో పోల్చుకోవడం మానేస్తే ఒత్తిడి తగ్గుతుందని చెప్పుకొచ్చారు. మీ జీవితానికి మీరే లీడర్ గా ఉండాలని, ధైర్యంగా ముందడుగు వేయాలని చెప్పుకొచ్చారు. నా జీవితాన్ని నేను ప్రేమిస్తానని.. అందుకే నేను ఇప్పుడు మీ ముందు ఉన్నాను అని కాన్ఫిడెంట్ గా సమాధానం చెప్పారు.

హర్నాజ్ సంధు ఇప్పటికే మిస్ ఇండియా పంజాబ్ 2019 , మిస్ దివా 2021 టైటిల్స్ ను కూడా గెల్చుకున్నారు. ఫెమినా మిస్ ఇండియా 2019 కాంటెస్ట్ లో కూడా ఆమె టాప్ 12 గా నిలిచారు. బాయ్ జి కుట్టాగే, యారా దియాన్ పో బరన్ వంటి సినిమాల్లో కూడా నటించారు. చిన్నప్పటి నుంచి యోగా అంటే ఇష్టపడే హర్నాజ్ యాక్టింగ్, ట్రావెలింగ్, డాన్స్, గుర్రపు స్వారీ, ఈత ని కూడా అమితంగా ఇష్టపడతారు.