Human angle

ఈ ఫొటోలో ఉన్న అమ్మాయి పేరు ఆర్య. ఆమె తల్లి ఓ ప్రైవేట్ రెసెప్షనిస్ట్ గా పనిచేస్తున్నారు. తండ్రి పెట్రోల్ బంక్ లో పనిచేస్తున్నారు. వారికొచ్చే ఆదాయం అంతంతమాత్రమే అయినా కూతురు చదువు విషయంలో ఇద్దరూ రాజీ పడలేదు. ఆమెను ఉన్నతంగా చదివించి మంచి పొజిషన్ లో నిలబెట్టాలని భావించారు. అందుకు తగ్గట్లే కూతురు ఆర్య కూడా చదువు పట్ల చాలా శ్రద్ధ కనబరిచేది.

చిన్నప్పటినుంచి చదువులో చురుకుగా ఉన్న ఆర్య ఐఐటి కాన్పూర్ లో పెట్రో కెమికల్ ఇంజనీరింగ్ లో ఎంటెక్ సీటు సంపాదించింది. ఓ పెట్రోల్ బంక్ కూతురు పెట్రోల్ కెమికల్ ఇంజనీరింగ్ లో సీటు సంపాదించడం తో ఆమె గురించిన వార్త వైరల్ అయింది. ఈ తండ్రి కూతుళ్ళ స్టోరీని పెట్రోల్ బంక్ మేనేజర్ ట్వీట్ చేసారు. అంతే కాదు తన సన్నిహితులు, కొలీగ్స్ ఉన్న వాట్సాప్ గ్రూప్ లలో కూడా షేర్ చేసారు.

దీనితో ఈ స్టోరీ వైరల్ అయింది. కేంద్ర పెట్రోలియం శాఖ మంత్రి హర్‌దీప్సింగ్‌ పురి, ప్రముఖ ఐఏఎస్, ఐపీఎస్‌ అధికారులు కూడా ఈ ట్వీట్ ను రీట్వీట్ చేసి ఈ తండ్రి కూతుళ్లను అభినందించారు. టెన్త్, ఇంటర్ లలోనే 98 శాతం మార్కులు సాధించిన ఆర్య 78.3 శాతంతో పెట్రో కెమికల్ ఇంజనీరింగ్ ను పూర్తి చేసింది. ఐఐటి కాన్పూరు లో కూడా సీటు సంపాదించడం తో ఆ తల్లితండ్రుల ఆనందానికి హద్దుల్లేవు. అందరు ఎలక్ట్రానిక్ ఇంజనీరింగ్ వైపు పరిగెత్తి సాఫ్ట్ వేర్ ఇంజనీర్ లు అయిపోవాలనుకునే ఈరోజుల్లో ఈ అమ్మాయి తన తండ్రి కోసం పెట్రో కెమికల్ ఇంజనీరింగ్ పూర్తి చేయాలనుకుంటోంది. అంతే కాదు.. పెట్రో కెమికల్ ఇంజనీర్ గా లైఫ్ లో స్థిరపడాలని అనుకుంటోంది.

ఆర్య తండ్రి మాట్లాడుతూ.. మా ఇద్దరి సంపాదన అంతంత మాత్రమే అయినా, తన చదువు విషయం లో రాజీ పడాలని అనుకోలేదు. ఇంకా తన హాస్టల్, ఇతర ఫీజులు చెల్లించాల్సి ఉంది. వీలైనంత తొందరలో వీటిని కూడా పూర్తి చేసేస్తాం. నా కూతురుని పెట్రో కెమికల్ ఇంజనీర్ గా చూడాలని అనుకున్నాం. నేను 2005 నుంచి ఇండియన్ ఆయిల్ పెట్రోల్ బంక్ లోనే పనిచేస్తున్నా.. మా సంస్థ లోనే తాను కెమికల్ ఇంజనీర్ అయితే.. అంతకంటే ఆనందం మరొకటి ఉండదు” అంటూ ఆ తండ్రి ఎమోషనల్ అవుతున్నాడు.

Let me share an inspiring story of Arya, daughter of #IndianOil's customer attendant Mr. Rajagopalan. Arya has made us proud by securing entry in IIT Kanpur.

All the best and way to go Arya! pic.twitter.com/GySWfoXmQJ

— ChairmanIOC (@ChairmanIOCL) October 6, 2021

ఇంటికి దీపం ఇల్లాలు అని ఊరికే అంటారా..? కుటుంబాన్ని, ఇంటిని ఒంటిచేత్తో నెట్టుకొస్తూ.. కంటికి రెప్పలా కాపాడుకుంటూ ఉంటుంది ఏ ఇల్లాలైనా. అందుకే మహిళలు మల్టి టాలెంటెడ్ అని చెప్పొచ్చు. ఎన్ని పనులు ఉన్నా సమర్ధవంతం గా చక్కబెట్టుకుంటూ ఉంటారు. అవకాశాలు రావాలే కానీ, వారు తమ ప్రతిభను నిరూపించుకోవడానికి ఏమాత్రం వెనుకాడరు. విజయా రాజన్ కూడా అంతే.. ఆమెకు తన భర్త, పిల్లల ఆరోగ్యమే ముఖ్యం.

వారికి పోషకాలతో కూడిన ఆహారాన్ని అందించాలని నిత్యం అనుకుంటూ ఉండేది. అలాంటి వాటిపైనే తాను చాలా రీసెర్చ్ చేసింది. అలాంటి పోషకాలు ఎందులో దొరుకుతాయో పరిశీలించి వాటితో స్నాక్స్ లాంటివి తయారు చేసేది. వాటిని భర్తకు, పిల్లలకు, చుట్టూ పక్కన వారికి పెట్టేది. వారికి అవి బాగా నచ్చడం తో.. ఆమె సన్నిహితులు వాటిని ఎందుకు అమ్మకూడదు? అని ప్రశ్నించారు. బయట ఇలాంటి మార్కెట్ దొరకడం లేదని, ఇలాంటివాటిని అమ్మితే.. కచ్చితం గా జనాలకి మంచి ఫుడ్ దొరుకుతుంది, మనకి కూడా లాభం ఉంటుందని చెప్పడం తో విజయ ఆ దిశగా ఆలోచించింది.

ఆమె భర్త రాజన్ శ్రీనివాసన్ టెలికాం ఉద్యోగం చేస్తున్నారు. ఆయన రన్నర్, సైక్లిస్ట్, స్విమ్మర్ గా పేరు తెచ్చుకున్నారు. 2015 లో ఇంగ్లీష్ చానెల్ లో స్విమ్ చేయడం కోసం శిక్షణ తీసుకున్నారు. అయితే.. అందుకు బాగా శక్తీ కావాల్సి ఉంటుంది. విజయ ఆయనకు అలాంటి ఆహారాన్ని అందించాలనుకుంది. ఎక్కువ పోషకాలు కలిగి ఉండి, తక్కువ కాలోరీలతో ఎక్కువ ఎనర్జీను అందించే స్నాక్స్ ను తానె తయారు చేసింది. అందులో ఎక్కువ గా డ్రై ఫ్రూట్స్ ను ఉపయోగించి తయారు చేసింది.

పంచదార, ప్రిజర్వేటివ్స్ లాంటివి ఏమి లేకుండా ఆమె స్నాక్స్ ను తయారు చేసేది. వీటికి తన ఫ్యామిలీ సర్కిల్ లో మంచి పేరు రావడం తో వ్యాపారం చేయాలనీ భావించింది. అందుకోసం.. ఈ ప్రొడక్ట్స్ కు “సిరిమిరి” అనే పేరును నిర్ణయించుకుంది. కన్నడం లో సిరిమిరి అంటే లక్ష్మి దేవి. 2017 లో ఈ స్టార్ట్అప్ ను ప్రారంభించింది. కేవలం 15 మంది పనివాళ్ళతో, రెండు లక్షల పెట్టుబడి తో ఇది మొదలైంది. తన కుటుంబం కోసం చేసే స్నాక్స్ కు కొద్దీ గా మార్పు చేర్పులు చేసి.. ఎనర్జీ బార్ లా మార్కెట్ లో ప్రవేశపెట్టింది.

వీటికి క్రమం గా గుర్తింపు రావడం మొదలైంది. ఈ స్టార్ట్ అప్ ప్రారంభం లో కేవలం మూడు రకాల ఎనర్జీ బార్ లను మాత్రమే విజయ అందుబాటులోకి తీసుకొచ్చింది. అయితే.. వీటికి మంచి గుర్తింపు రావడం తో ప్రస్తుతం ఆరు కండరాలకు పుష్టినిచ్చే బార్‌లు, 8 హెల్ది బార్స్, మరో హెల్థీ మిక్స్‌ ప్రొడక్ట్స్ ను విక్రయిస్తున్నారు. రెండు లక్షల తో మొదలైన ఈ వ్యాపారం ప్రస్తుతం కోట్ల టర్న్ ఓవర్ తో నడుస్తోంది. ఆడవాళ్లు అనుకుంటే.. దేనినైనా సాధించగలరు అని విజయా రాజన్ నిరూపించారు.

మొక్కై వంగనిది మానై వంగునా..? అంటూ ఉంటారు. పిల్లలకు చిన్నప్పటి నుంచే అన్ని విషయాలపైనా అవగాహన కల్పించాలి అనేది ఈ సామెత ఉద్దేశ్యం. దీనిని మరీ సీరియస్ గా తీసుకున్న ఓ తల్లి తన ఏడేళ్ల కొడుకు చేత ఇంటి రెంట్, కరెంట్ బిల్స్, ఇంటర్నెట్ బిల్స్ వంటివి కట్టించేస్తోంది. డబ్బులు ఇచ్చి కట్టించడం కాదు.. ఆ పిల్లాడే నెల మొత్తం లో సంపాదించుకునే విధంగా మనీ లెసన్స్ చెబుతోంది.

ఆశ్చర్యం గా ఉంది కదా.. ఏడేళ్ల పిల్లాడు ఎలా సంపాదిస్తాడు అని.. అక్కడే మనం ఆ తల్లిని మెచ్చుకోవాలి. ఫ్లోరిడా కు చెందిన ఓ మహిళ ఇటీవల ఓ వీడియో ను పోస్ట్ చేసింది. ఆమె తన పేరుని వెల్లడించకపోయినా.. ఆమె చేస్తున్న పని ఇతర తల్లితండ్రులకు స్ఫూర్తినిచ్చే విధంగా ఉంది. తన ఏడేళ్ల కొడుక్కి విద్యాబుద్ధులతో పాటు డబ్బు విలువ ను తెలియచేయడం కోసం ఆమె ఓ ప్రణాళిక రూపొందించింది.

ఇందులో భాగం సదరు పిల్లాడు తన పనులు తానె చేసుకోవాల్సి ఉంటుంది. అంటే బ్రష్ చేసుకోవడం, తన పక్క సర్దుకోవడం, బట్టల అల్మారా ను నీట్ గా ఉంచుకోవడం, బుక్స్ సర్దుకోవడం, తన బాత్ రూమ్ ను నీట్ గా ఉంచుకోవడం, మురికి బట్టలను వాషింగ్ మెషిన్ లో పడేయడం లాంటి పనులన్నమాట. ఈ పనులన్నీ సక్రమం గా చేస్తే ఆ రోజు ఒక డాలర్ ను తన కొడుక్కి జీతం గా ఇస్తుంది.

ఈ డబ్బును ఆ పిల్లాడు దాచుకుంటాడు. నెల అంతా పూర్తయ్యాక తాను ఇంట్లో ఉంటున్నందుకు రెంట్, తన రూమ్ కరెంటు బిల్ ను తల్లికి కట్టేస్తాడు. మిగిలిన డబ్బుతో తాను వాడుకున్న ఇంటర్నెట్ కు బిల్ కట్టుకుంటాడు. ఒకవేళ ఒక నెలలో కట్టలేకపోతే.. ఆ డబ్బుని కూడా తర్వాత నెలలో కట్టే లాగా ఒప్పందం కూడా చేసుకుంటాడట. ఇలా చిన్న వయసునుంచే ఆ తల్లి తన కొడుక్కి డబ్బు విలువ ను తెలియ చేస్తోంది. భవిష్యత్ లో తన కొడుకు లైఫ్ ని చక్కగా ప్లాన్ చేసుకుంటాడు అంటూ ఆ తల్లి ధీమా వ్యక్తం చేస్తోంది. ఈ వీడియో ఇప్పుడు సోషల్ మీడియా లో వైరల్ అవుతోంది.

Watch video here: Link

ఒక చిన్న ఐడియా జీవితాన్నే మార్చేస్తుంది. మనం ఎలా ఆచరిస్తున్నాం అనేదే ముఖ్యం. నీతూ యాదవ్, కీర్తి జంగ్రా.. వీరిద్దరూ ఢిల్లీ లో ఐఐటి చదువుకున్నారు. రూమ్మేట్స్ కూడా.. వీరిద్దరికి ఏదైనా కొత్తగా చేయాలి అనే ఆలోచన చదువుకునే రోజుల నుంచే ఉండేది. కానీ, చదువైపోగానే ఉద్యోగాల్లో చేరారు. నీతూ బెంగళూరు లో ప్రతిలిపి ఆఫీస్ లో పని చేసేది. కీర్తి  గుర్‌గావ్‌లో ‘పెంగ్విన్‌’ పబ్లిషింగ్‌ హౌస్‌ లో ఉద్యోగం చేస్తోంది.

ఈ ఇద్దరికీ ఉద్యోగం సంతృప్తి ఇవ్వడం లేదు. ఏదైనా కొత్తగా చేయాలి, విజయం సాధించాలి అన్న తపనే వారిద్దరిలోను మెదులుతోంది. ఆ తపనే వారికి కొత్త ఐడియా ను ఇచ్చింది. పశువులను ఆన్ లైన్ లో విక్రయించడం కోసం వీరు ప్రత్యేకం గా యాప్ ను తయారు చేయాలనుకున్నారు. సాధారణంగా పశువుల విక్రయాలు పల్లెటూర్లలో ఎక్కువగా జరుగుతాయి. వారు వీటిని దగ్గరగా చూసి, పరిశీలించాకే కొనుక్కుంటారు.

కానీ, ఆన్ లైన్ లో కొనాలంటే వారికి అంత సౌలభ్యం ఉంటుందా? అన్నది అనుమానమే. ఈ విషయాన్నే కీర్తి, నీతూ కుటుంబ సభ్యులు కూడా ప్రశ్నించారు. మంచి ఉద్యోగాలు వదులుకుని ఇదేమి పని? అంటూ ప్రశ్నించారు. ఇంత చదువు చదివి బర్రెలు అమ్ముతారా? అంటూ బంధువులు కూడా హేళన చేసారు. కానీ వారు వెనుకాడలేదు. తమ తల్లితండ్రులకు అర్ధమయ్యేలా వివరించారు.

వారి ఆలోచన నచ్చి ఎందరో ఏజెన్సీ లు ఫండ్ లు కూడా ఇచ్చారు. అలా యాప్ ను ప్రారంభించారు. వీరు చేసే పని ఏంటంటే.. ఎవరైతే పశువులను అమ్మాలనుకుంటున్నారో.. ఎవరైతే కొనాలనుకుంటున్నారో.. వారిద్దరిని తమ యాప్ ద్వారా ఒక చోటకి చేరుస్తారు. 2019 ఏడాది చివరి లో బెంగళూరు లోనే  ఓ చిన్న గదిని అద్దెకు తీసుకున్నారు. తమ యాప్ కు “యానిమల్” అన్న పేరు పెట్టారు. ఆ గదిలోనే వారి ఆఫీస్ మొదలైంది. యానిమల్ కార్యాకలాపాలను నిర్విఘ్నం గా కొనసాగించారు.

మొదట్లో అంతగా కలిసిరాలేదు.. కానీ, లాక్ డౌన్ టైం లో మాత్రం వీరి వ్యాపారం బాగా పుంజుకుంది. వారి యానిమల్ సంత అనేది ఎక్కువ మందికి చేరింది. ఈ వర్చువల్ సంతకు తక్కువ టైం లోనే పాపులారిటీ వచ్చేసింది. 2019 ఆఖరుకి వీరు కేవలం యాభై పశువుల్ని మాత్రమే అమ్మగలిగారు. కానీ 2020 డిసెంబర్ వచ్చేసరికి 40 వేల పశువుల్ని వీరు అమ్మగలిగారు. దాదాపు 80 లక్షల మంది రైతులు ఈ యానిమల్ యాప్ ను డౌన్లోడ్ చేసుకున్నారు. వీరి లక్ష్యం నచ్చి ఇన్వెస్టర్లు కూడా ముందుకొచ్చారు. ఆన్ లైన్ లో పశువుల  విక్రయానికి డిమాండ్ కూడా పెరుగుతూ వచ్చింది. వేల కోట్ల రూపాయల్లో ఈ వ్యాపారం సాగుతోంది. ఒక ఐడియా జీవితాన్నే మార్చేయడం అంటే ఇదే మరి.

మనసు విశాలమైతే.. ప్రపంచాన్నే వసుదైక కుటుంబం గా చూడగలుగుతాం అనడానికి బసవరాజ్ చక్కని ఉదాహరణ. బసవరాజ్ బెంగుళూరులోని కల్బుర్గి ,మక్తంపురా కు చెందిన వ్యక్తి. ప్రభుత్వ క్లర్క్ గా పని చేస్తున్నాడు. అతనికి “ధ్యానేశ్వరి” అనే కుమార్తె ఉంది. కూతురు అంటే బసవరాజ్ కు వల్లమాలిన ప్రేమ. తొమ్మిదవ తరగతి చదువుతూ ఉన్న ధ్యానేశ్వరి గతేడాది అనారోగ్యం బారిన పడింది.

ఆ అంతుచిక్కని రోగం కారణం గా ఆమె మృత్యువాత పడింది. కూతురు మరణించడం తో బసవరాజ్ చాలా మారిపోయాడు. కూతురుని తలుచుకుంటూ కుమిలిపోయేవాడు. తరచూ, ఆమె చదివిన హై స్కూల్ కి వెళ్లి.. ఆమె ఈడు పిల్లలు ఆడుకుంటుంటే చూసి మురిసిపోయేవాడు. వాళ్లలోనే తన కూతురును కూడా చూసుకుంటూ ఉండేవాడు. ఓ రోజు.. ఆరుబయట కొందరు ఆడపిల్లలు కూర్చుని ఉన్నారు.

అంతలోనే, ఒక ప్యూన్ వచ్చి కొంతమంది ఆడపిల్లల పేర్లు చదవడం ప్రారంభించారు. ఆ పేర్లలో తమ పేర్లు ఉన్న ఆడపిల్లలు లేచి నుంచున్నారు. అలా.. మొత్తం 45 మంది ఆడపిల్లలు లేచి నుంచున్నారు. ఆ ప్యూన్ ఏదో చెప్పగానే.. వాళ్లంతా ఏడుస్తూ కళ్ళ నీళ్లు పెట్టుకున్నారు. తరువాత ప్యూన్ అక్కడ నుంచి వెళ్ళిపోయాడు. బసవరాజ్ కు ఏమి జరిగిందో అర్ధం కాక, ప్యూన్ వద్దకు వెళ్లి అడిగాడు.

ఆ పిల్లలు స్కూల్ ఫీజు కట్టలేదని, రేపటిలోపు కట్టకపోతే వారిని స్కూల్ కు రావద్దంటూ ప్రిన్సిపాల్ ఆదేశించారని తెలిపాడు. దీనితో బాధపడ్డ బసవరాజ్ ప్రిన్సిపాల్ వద్దకు వెళ్లి.. ఆ 45 మందికి ఫీజు తాను కడతానని, స్కూల్ బ్యాంకు అకౌంట్ నెంబర్ ఇవ్వాలని కోరాడు. ఏదో ఎమోషనల్ లో మాట్లాడుతున్నాడేమో అని భావించి ప్రిన్సిపాల్ కూడా అందుకు అంగీకరించాడు.

మరుసటిరోజుకల్లా.. బ్యాంకు లో 45 మంది పిల్లలకు ఫీజు కట్టడం తో పాటు, మరికొంత మొత్తాన్ని కూడా డిపాజిట్ చేసి.. ఇంకెవరైనా ఆడపిల్లలు ఫీజు కట్టలేక అవస్థ పడితే.. అందుకోసం ఆ మొత్తాన్ని వినియోగించాలని కోరాడు. ప్రతి ఏడాది.. తాను చేయగలిగినంతలో ఆడపిల్లలకు ఫీజు కడతానని ముందుకొచ్చాడు. గత రెండేళ్లు గా తనకు తోచినంతలో ఫీజు కడుతూ వస్తున్నాడు. ఆ ఆడపిల్లలోనే తన కూతురుని చూసుకుంటూ బతుకు సాగిస్తున్నాడు.

అతని పేరు గౌతమ్. రైల్వేలో టిసిగా పని చేస్తున్నాడు. వయసు 50 కి పైమాటే. అనుభవంతో పాటు లోకజ్ఞానం కూడా ఏర్పడిన వయసు అది. తన వృత్తి రీత్యా ట్రైన్ లో అటూ..ఇటూ తిరుగుతూ ఉంటే.. ఓ నలిగిపోయిన పర్స్ కనిపించింది. ఓపెన్ చేసి చూస్తే.. అందులో కొంత చిల్లర, ఒక కృష్ణుడి ఫోటో కనిపించాయి. కనీసం కాంటాక్ట్ డీటెయిల్స్ కూడా ఏమి లేకపోవడంతో ఆ పర్స్ ఎవరిదో ఎలా తెలుస్తుంది అని అనుకున్నాడు.

అటూ ఇటూ తిరుగుతూ.. అక్కడే ఉన్న పాసెంజర్స్ ని అడిగాడు. ఈ పర్స్ ఎవరైనా పడేసుకున్నారా..? అని అడిగాడు. ఆ పక్కనే ఉన్న ఓ వృద్ధుడు వచ్చి.. ఈ పర్స్ నాదేనండి అని అన్నాడు. వెంటనే.. ఈ పర్స్ నీదేనని ఎలా చెప్తావ్..? ఏదైనా గుర్తులు చెప్పాలి కదా అని నిలదీసాడు. దానికి సమాధానం గా ఆ వృద్ధుడు అందులో ఒక కృష్ణుడి ఫోటో ఉంటుంది అంటూ గుర్తులు చెప్పాడు. అలా ఒక్క గుర్తే చెప్తే ఎలా..? ఇందులో మీ ఫోటో కూడా పెట్టుకుంటే ఈజీగా గుర్తుపట్టేవాళ్ళం కదా అని ఆ టిసి అన్నాడు.

దానికి ఆ వృద్ధుడు ఒక చిరునవ్వు నవ్వి బదులిచ్చాడు. “అయ్యా.. ఆ పర్స్ ను నాకు మా తండ్రి గారు ఇచ్చారు. నాకు నా తల్లితండ్రులంటే చాలా ఇష్టం కాబట్టి మొదట్లో వారి ఫోటోను పెట్టుకునే వాడిని. ఆ తరువాత నేను యవ్వనంలోకి వచ్చాక.. నేను అందంగా ఉండేవాడిని కాబట్టి నా ఫోటో పెట్టుకున్నాను. ఆ తరువాత నాకు పెళ్లి అయింది. నా భార్య కూడా చాలా అందంగా ఉంటుంది.అందుకే తన ఫోటో ను పెట్టుకునేవాడిని.

మరికొంతకాలానికి నాకు పిల్లలు పుట్టారు. వారే నాలోకంగా గడిచిపోయేది. నా పిల్లలే నా సర్వస్వము. అందుకే.. నా పిల్లల ఫోటోను పెట్టుకునేవాడిని. ఇప్పుడు నా పిల్లాడు అమెరికాలో సెటిల్ అయ్యాడు. నా భార్య కూడా చనిపోయింది. ఇప్పుడు నేను ఒంటరివాడిని. నాకు ఎవరైనా తోడు ఉన్నారు అంటే.. అది కృష్ణుడే. ఆయన ఫోటో నేను ఎప్పుడో పెట్టుకోవాల్సింది. ఇప్పటికైనా మించి పోయింది ఏమి లేదని ఆయన ఫోటోనే పెట్టుకున్నా…” అంటూ చెప్పుకొచ్చాడు. ఆ వృద్ధుని స్టోరీ వినగానే టిసి ఏమి మాట్లాడలేదు. ఆ పర్స్ అతనికి ఇచ్చేసి.. తరువాత స్టేషన్ లో రైలు దిగి ఓ షాపుకు వెళ్ళాడు తనకు ఇష్టమైన దేవుడి ఫోటోను కొనుక్కుని, పర్స్ లో పెట్టుకోవడానికి.

నేను ఓ మధ్యతరగతి కుటుంబం నుంచి వచ్చిన అమ్మాయిని. మా ఇంట్లో నేనొక్కదాన్నే ఆడపిల్లని కావడం తో నన్ను గారాబం గా పెంచారు. పెళ్లి వయసు వచ్చాక అందరిలాగే నాకు కూడా నా తల్లితండ్రులు పెళ్లి చేసి పంపేయాలనుకున్నారు. కానీ, కొడుకులు లేని నా తల్లి తండ్రులకి నేనే ఆధారం అవ్వాలనుకున్నాను. నాకు నచ్చిన ఉద్యోగం చేసి మా నాన్నకి సపోర్ట్ గా నిలిచాను. నన్ను నేను చూసుకున్నప్పుడల్లా గర్వం గానే ఫీల్ అవుతుంటాను.

representative image

కానీ, ఈ సమాజం మాత్రం అందరిలా నన్ను మార్చేయాలని చూస్తూ ఉంటుంది. అందరిలా పెళ్లి చేసుకుని, అందరిలా పిల్లల్ని కనేసి.. ఆ తరువాత ఏమి ఉద్దరించాలో ఈ సమాజానికేమి తెలుసు..? ఆఫీస్ కు వెళ్లి ఇంటికి వచ్చేలోపు ప్రతి వాడి చూపులు మెడలో మంగళ సూత్రాలున్నాయా.. కాలికి మెట్టెలున్నాయా అని వెతుకుతుంటాయి. అవి కనపడకపోతే వాళ్ళ కళ్ళకి కామపు మబ్బులు కమ్ముతాయి. ఎప్పటిలా ఇవే ఆలోచనలతో ఆఫీస్ కు బయలుదేరిన నాకు వర్షం అడ్డొచ్చింది.

representative image

రోడ్డు దాటి బస్టాప్ షెల్టర్ కి చేరేసరికి వర్షం లో తడిసిపోయాను. నా బట్టలు కూడా తడిసిపోవడం తో, అక్కడ చాలా మంది అబ్బాయిలు కామం తో కళ్ళు మూసుకుపోయి  గుడ్లప్పగించి తదేకం గా చూస్తున్నారు. నాకు వెంటనే  జ్ఞానోదయం అయి స్కార్ఫ్ తీసి కప్పుకున్నాను. ఇలాంటి వారి కళ్ళ నుంచి తప్పుకోవడానికి ఆడవాళ్లు ఎన్ని పాట్లు పడతారో ఆ బ్రహ్మ కే ఎరుక. మృగాళ్లు తమ బుద్ధులు పోనిచ్చుకోనంతకాలం ఆడవాళ్ళ బట్టలు ఎలా వేసుకున్నా ఇక్కట్లు తప్పవు అని మనసులో అనుకుంటూ బస్సు కోసం వెయిట్ చేసాను.

representative image

ఈరోజు లేచిన వేళా విశేషమేమిటో గాని, అన్ని పనులు ఆలస్యమవుతూనే ఉన్నాయి. విసుగ్గానే ఆఫీస్ కు చేరుకున్నాను. నేను వెళ్ళేసరికే అక్కడ అంతా గందరగోళం నెలకొని ఉంది. మా ఆఫీస్ లో చిన్న ఫైర్ ఆక్సిడెంట్ జరిగింది. ఆఫీస్ లోని కంప్యూటర్ ప్లగ్ ఇన్స్ పెట్టె బోర్డు దగ్గర షార్ట్ సర్క్యూట్ జరగడం తో మంటలు అలుముకున్నాయి.. ఓ గది మొత్తం ఆ మంటలు వ్యాపించాయి. నేను ఆఫీస్ దగ్గరకి వెళ్లేసరికి నా ఫ్రెండ్ ని హడావిడిగా అంబులెన్స్ లో ఆసుపత్రికి తరలిస్తున్నారు.

representative image

మంటలు వ్యాపించిన గదిలోనే ఆమెకూడా ఉండడం తో, ఆమె శరీరానికి కూడా మంటలు అంటుకున్నాయి.  ఆమె తో పాటు నేనూ ఆసుపత్రికి వెళ్ళాను. కాలిన గాయాలతో ఆమె విలవిలలాడుతుంటే.. మనసు చివుక్కుమంది. ఒక్క క్షణం నాకు అప్పటివరకు జరిగిందంతా గుర్తుకు వచ్చింది. ఇంటి దగ్గర బయలుదేరి ఆఫీస్ కి వచ్చేవరకు నా పరిస్థితి కూడా అలానే ఉంది. నా మనస్సు కూడా దహించిపోతున్న బాధను అనుభవించింది. నా ఫ్రెండ్  శరీరానికి మంటలవలన గాయాలయితే, నా మనసుకి కామపు చూపుల్తో మంట అంటుకుంది. అంతే తేడా..!

ప్రస్తుతం మనం ఉన్న పరిస్థితులలో ఎంత కాంపిటీషన్ ఉందో చూస్తూనే ఉన్నాం. ప్రైవేటు ఉద్యోగాలు దొరకడమే కష్టం గా ఉన్న ఈరోజుల్లో గవర్నమెంట్ ఉద్యోగం దొరకడం అంటే మాటలు కాదు. ఏళ్ల తరబడి సాధన చేసి, పరీక్ష పాస్ అయితే తప్ప ఉద్యోగం దొరికే అవకాశం తక్కువే. అలా కష్టపడి సంపాదించిన గవర్నమెంట్ ఉద్యోగాన్ని కాలదన్నుకుంది ఈ అమ్మాయి. అంతే కాదు తన కుటుంబాన్ని సైతం వదులుకుని పూలు అమ్ముకుంటోంది.

ఇంతకీ ఆమె రియల్ స్టోరీ ఏంటో ఇప్పుడు చూద్దాం. ఛత్తీస్ ఘడ్ రాష్ట్రానికి చెందిన అంజనా సాహిస్ అనే ఈ అమ్మాయి కి రాయపూర్ పోలీస్ స్టేషన్ లో కానిస్టేబుల్ గా పని చేస్తుంది. దాదాపు తొమ్మిది నెలల క్రితం ఆమెను సిఐడి డిపార్ట్మెంట్ కు ట్రాన్స్ఫర్ చేస్తూ ఉత్తర్వులు ఇచ్చారు. అయితే.. ఆ తరువాత నుంచి ఆ అమ్మాయి అదృశ్యమైంది. ఆమె కుటుంబ సభ్యులు కూడా కంగారు పడి పోలీస్ స్టేషన్ లో కంప్లైంట్ ఇచ్చారు.

సిఐడి డిపార్ట్మెంట్ లో జాయిన్ అవడానికి ఆఫర్ లెటర్ వచ్చిన తరువాత ఆమె అదృశ్యమైంది. జాయిన్ అవ్వాల్సిన రోజు కూడా ఆమె కనిపించకపోవడంతో పోలీసులు ఈ కేసును సీరియస్ గా తీసుకున్నారు. ఆమె కోసం గాలించడం మొదలు పెట్టారు. చివరకు కొన్ని రోజుల క్రితమే ఓ గుడి వద్ద ఆమె పూలు అమ్ముతూ కనిపించింది. బృందావనం లో శ్రీ కృష్ణుని ఆలయం బయట ఆమె పూలు అమ్ముకుంటోంది.

సీఐడీ డిపార్ట్మెంట్ లో ఉద్యోగాన్ని వదిలిపెట్టి, పూలు అమ్ముతున్న ఆమెను చూసి పోలీసులు షాక్ అయ్యారు. అయితే, వారు ఆమెను తిరిగి డిపార్ట్మెంట్ కు రావాలని కోరగా.. ఆమె చెప్పిన సమాధానం విని పోలీసులు షాక్ అయ్యారు. తనకి అక్కడే మనఃశాంతి, ఆనందం లభిస్తున్నాయని తెలిపింది. ఆ బృందావనమే తన ఇల్లు అని.. అది విడిచిపెట్టి ఎక్కడికీ రాను అని చెప్పింది. ఆమె తన ఫోన్ ను కూడా స్విచ్ ఆఫ్ చేయడం తో ఆమె ఆచూకీ దొరకడం కష్టమైంది. కొన్ని రోజుల క్రితమే ఆమె ఏటీఎం లో నుంచి డబ్బులు డ్రా చేయడం తో పోలీసులు ఆమె ఆచూకీని ట్రేస్ చేసారు.

ప్రస్తుతం సక్సెస్ అంటే.. చదువు పూర్తవ్వగానే ఐదంకెల జీతం వచ్చే ఉద్యోగం లో చేరడమేనని అందరు అనుకుంటున్నారు. కానీ సక్సెస్ అంటే ఉద్యోగం సంపాదించడమో… అనుకున్నంత సంపాదన వస్తోందని సంబరపడటమో కాదు. అనుకున్న పనిని సాధించి, కల ని నెరవేర్చుకోవడం. చాలా మందికి ఏదో ఒక ఉద్యోగం వచ్చాక.. కొంత కాలం బాగానే ఉంటుంది. కొన్నాళ్ళకి.. జీవితం నచ్చదు. ఏదో చేయాలి అనే తపన పెరుగుతూ ఉంటుంది.

అందుకే ఉద్యోగాన్ని వదిలేసి వ్యాపారం వైపు వెళ్లాలనుకుంటారు. అయితే.. క్రియేటివిటీ లేకుంటే.. నిలదొక్కుకోవడం కష్టమే అవుతుంది. ఇలా సాధించి జీవితం లో నిలదొక్కుకునే వారు తక్కువమంది వుంటారు. వారిలో కేశవ్ రాయ్ కూడా ఒకరు. కేశవ్ చిన్నతనం నుంచి స్కూల్ లో యావరేజ్ స్టూడెంట్ గానే ఉండేవాడు. అయితే స్వయం ఉపాధి ద్వారా ఉన్నతమార్గాలను చేరుకోవాలని అనుక్షణం తపన పడుతూ ఉండేవాడు. ఈ క్రమం లో పలుసార్లు ఓడిపోయాడు కూడా.

చివరకు తన ఐడియా క్లిక్ అయ్యి విజయం సాధించాడు. కేశవ్ రాయ్ కు సెమి ఆటోమేటిక్ బైక్ కవర్లను తయారు చెయ్యాలి అనే ఆలోచన వచ్చింది. ఇందుకోసం అతను 2016 లోనే బైక్ బ్లేజర్ అనే సంస్థని కూడా ఏర్పాటు చేసుకున్నాడు. తన ప్రోడక్ట్ కోసం 2017 లోనే పేటెంట్ పొందాడు. అయితే ఈ ప్రోడక్ట్ ఉపయోగం జనాలకు అర్ధం కావడానికి కొంత సమయం పట్టింది.

ఈ సెమి ఆటోమేటిక్ బైక్ కవర్లు ద్విచక్రవాహనాలు కలిగి ఉన్న వారికి ఎంతో ఉపయోగకరం గా ఉంటాయి. ఈ ప్రోడక్ట్ ని బైక్ కి అమరిస్తే సరిపోతుంది. ముప్పై నిమిషాల్లో మొత్తం కవర్ చేస్తుంది. వర్షం పడినా కూడా బైక్ ఏమి పాడవదు. వర్షం వెలిసాక కూడా బండి పొడిగానే ఉంటుంది. ఈ కవర్ లో అన్ని ఆన్ లైన్ ప్లాట్ ఫామ్ లలోను లభిస్తున్నాయి. 780 రూపాయలు, 850 రూపాయల ధరకు వీటిని కొనుక్కోవచ్చు. ఈ వ్యాపారం మొదట్లో ఇబ్బందులు ఎదుర్కొన్నా.. ప్రస్తుతం బాగానే సాగుతోంది.

కేశవ్ ఇప్పటి వరకు 75 వేల కవర్లను విక్రయించాడు. ఏడాదికి 1.30 కోట్ల టర్నోవర్ తో అతనికి బిజినెస్ నడుస్తోంది. ఈ కంపెనీ స్థాపించిన మొదట్లో కేశవ్ తన ఇంటి మేడపైనే వ్యాపారాన్ని నడిపాడు. ప్రస్తుతం ఢిల్లీ, ఘజియాబాద్ లలో కూడా రెండు పరిశ్రమలను ఏర్పాటు చేసాడు. ఈ వ్యాపారాన్ని మరింత విస్తరించాలని కేశవ్ యోచిస్తున్నాడు.