News

ఇటీవల జరిగిన మణిపూర్ ఘటన చాలా కలకలం సృష్టించింది. దేశవ్యాప్తంగా ఈ విషయంపై చర్చలు జరుగుతున్నాయి. ఆ నేరస్తులకి శిక్ష పడాలి అని ప్రజలు అందరూ కూడా నిరసన వ్యక్తం చేస్తున్నారు. ఈ క్రమంలో ఒక బాధితురాలి భర్త మాట్లాడుతూ ఈ సంఘటనపై తన ఆవేదనని వ్యక్తం చేశారు.

హిందుస్థాన్ టైమ్స్ తెలుగు కథనం ప్రకారం, ఆయన ఒక కార్గిల్ యుద్ధ వీరుడు. ఒక సమయంలో కార్గిల్ యుద్ధంలో భారతదేశం తరపున పోరాడారు. భారత సైన్యంలోని అసోం రెజిమెంట్​లో ఆయన సుబేదార్​గా చేశారు.

ఈ విషయంపై ఆయన మాట్లాడుతూ ఈ విధంగా చెప్పారు. “మే 4వ తేదీన ఉదయం కొంతమంది వచ్చి మా గ్రామంపై దాడి చేశారు. అప్పుడు ఇళ్లని తగలబెట్టారు. అందరి ముందు ఇద్దరు మహిళలని తీసుకెళ్లారు. అక్కడ పోలీసులు ఉన్నా కూడా ఎటువంటి చర్య తీసుకోలేదు. ఆ నిందితులని కఠినంగా శిక్షించాలి అని డిమాండ్ చేస్తున్నాను”.

“నేను దేశం కోసం కార్గిల్ యుద్ధంలో పాల్గొన్నాను. శ్రీలంకలో ఉన్న ఇండియన్ పీస్ కీపింగ్ ఫోర్స్ లో కూడా బాధ్యతలు నిర్వర్తించాను. దేశాన్ని కాపాడగలిగాను కానీ రిటైర్మెంట్ తర్వాత నా భార్యని, నా గ్రామస్తులని కాపాడుకోలేకపోయాను. దీనికి చాలా బాధగా ఉంది” అంటూ కంటతడి పెట్టుకున్నారు.

ఇదే ఘటనలో మరొక బాధితురాలి తల్లి కూడా ఈ విషయంపై తన ఆవేదన వ్యక్తం చేశారు. ఆమె మాట్లాడుతూ, “నా భర్తని నా కొడుకుని చంపేసి ఆ తర్వాత నా బిడ్డను తీసుకెళ్లారు. నా ఆశలన్నీ నా కొడుకు మీదే ఉండేవి. చాలా కష్టపడి నా కొడుకుని స్కూల్ కి పంపించాము. నా పెద్ద కొడుకుకి ఉద్యోగం లేదు. ఏమీ చేయలేని స్థితిలో ఉన్నాను. ఇంక మేము తిరిగి ఆ గ్రామానికి వెళ్ళము. వెళ్ళలేము కూడా”.

“మా ఇళ్ళని తగలబెట్టారు. మా పొలాలని కూడా నాశనం చేశారు. ఇంక అక్కడికి వెళ్లి నేను ఏం చేయాలి? మొత్తం గ్రామాన్నే తగలబెట్టేశారు. నా కుటుంబం భవిష్యత్తు నాకు అర్థం అవ్వట్లేదు. ప్రభుత్వం పట్టించుకోవట్లేదు. నాకు చాలా కోపంగా ఉంది. దేశంలోని తల్లిదండ్రులు అందరూ చూడండి. ఇది మా పరిస్థితి” అని ఆమె మాట్లాడారు. ఈ ఘటనలో ఉన్న నిందితులని శిక్షించాలి అని ఆగ్రహం వ్యక్తం చేస్తున్నారు.

ALSO READ : “ధోని” అన్న ఇంత దీనస్థితిలో ఉన్నారా..? బయోపిక్ లో ఆయన గురించి ఎందుకు ప్రస్తావించలేదు..?

కేరళ జంట అఫిఫా, సుమాయా షెరీన్ లు అఫిఫా తల్లిదండ్రుల నుండి ఇద్దరికి ప్రమాదం ఉందని, వారి నుండి బెదిరింపులు వస్తున్నాయని కేరళ హైకోర్టును ఆశ్రయించారు. అంతకు ముందు అఫిఫా తల్లిదండ్రులు ఇద్దరినీ బలవంతంగా విడదీయడానికి ప్రయత్నించారని కోర్టుకు తెలిపారు.

కేరళ హైకోర్టు జూలై 5న ఈ కేసు పై విచారణ జరిపి, కేరళ పోలీసు డీజీపీ, పోలీసు కమిషనర్‌కు అఫిఫా, సుమాయాకు  పోలీసు రక్షణ ఇవ్వమని ఆదేశించింది. ఈ కేసు తదుపరి విచారణ జూలై 21న జరుపనున్నట్లు తెలిపింది. ఈ నేపథ్యంలో అఫిఫా, సుమాయా కలిసి బ్రతకడానికి ఎదుర్కొన్న సమస్యల గురించి బీబీసీకి వివరించారు. ఆ యువతుల కథ ఏమిటో ఇప్పుడు చూద్దాం..
బీబీసీ తెలుగు కథనం ప్రకారం, కేరళకు చెందిన అఫిఫా, సుమాయా ఒకే పాఠశాలలో 12వ తరగతి చదివారు. అక్కడే ఇద్దరు ఫ్రెండ్స్ అయ్యారు. లాక్‌డౌన్ టైమ్ లో లెస్బియన్ జంటల వలె వీరిద్దరు లివి ఇన్ రిలేషన్ షిప్ మొదలుపెట్టారు. ఇద్దరిది ఒకే లాంటి మనస్తత్వం కావడం వల్ల ప్రేమలో పడ్డామని తెలిపారు. వీరి సంబంధం గురించి ముందుగా అఫిఫా ఇంట్లోవారికి  తెలిసింది. 2023 జనవరి 27న ఇద్దరు ఇళ్లు విడిచి వెళ్లారని వారి తల్లిదండ్రులు పోలీసు స్టేషన్‌లో కంప్లైంట్ చేశారు. దాంతో ఈ జంట జనవరి 29న మలప్పురం జిల్లా కోర్టులో హాజరయ్యారు.
తాము ఇద్దరం కలిసి ఉండాలనుకుంటున్న  విషయం కోర్టుకు చెప్పడంతో అందుకు కోర్టు అనుమతి ఇచ్చింది. కంపెనీలో పనిచేస్తోన్న ఈ జంట అప్పటి నుండి కలిసి జీవించడం మొదలుపెట్టారు. కానీ, అఫిఫా తల్లిదండ్రులు, బంధువులు వారు పని చేసే దగ్గరికి వెళ్ళి అఫిఫాను బలవంతంగా తీసుకెళ్లారు. దాంతో సుమాయా పోలీసు స్టేషన్లలో కంప్లైంట్ చేసినప్పటికీ, ఎలాంటి చర్యలు వారు తీసుకోలేదు. ఆ తర్వాత కేరళ హైకోర్టులో సుమాయా ఒక పిటిషన్ దాఖలు చేసింది. అఫిఫాను కోర్టు ముందు హాజరు పర్చాలని ఆదేశించింది.అయితే వారు కోర్టు ఆర్డర్ పాటించకుండా తమకు టైమ్ కావాలని అడిగారు. ఆ తర్వాత జూన్ 10 రోజులకు అఫిఫాను కోర్టుకు ఆమె తల్లిదండ్రులు తీసుకొచ్చారు. తల్లిదండ్రులు బెదిరిచడంతో అఫిఫా కోర్టులో సుమాయాతో కలిసి ఉండాలనుకోవడం లేదని తెలిపారు. అలాగే తన తల్లిదండ్రులతో ఉండాలనుకున్నట్లు అఫిఫా చెప్పారు. ఆ తర్వాత కొద్ది రోజులకు అఫిఫా సుమాయాకు ఫోన్ చేసి, కోర్టు ముందు చెప్పిందంతా కావాలని మాట్లాడింది కాదని, తన తల్లిదండ్రులు వైద్య చికిత్స చేయించారని తెలిపింది.
వనజా కలెక్టివ్ సంస్థ ద్వారా సుమాయా పోలీసుల సహాయంతో అఫిఫాను తన తల్లిదండ్రుల నుంచి రక్షించారు. కోర్టులో సుమాయాతో వెళ్లలేనని చెప్పిన పరిస్థితులను అఫిఫా బీబీసీకి వివరించారు. శారీరక సంబంధం కోసం మాత్రమే తాము కలిసి ఉండాలని అనుకుంటున్నామని అనేవారని, ఇలా ఆలోచించే వారితో మాట్లాడటం కూడా అర్థరహితం. తమను అర్థం చేసుకునే విధంగా వారిని మార్చలేం’’ అన్నారు. డాక్టర్లే మా బంధాన్ని అర్థం చేసుకోలేదని, సొసైటీ, తల్లిదండ్రులు ఎలా అర్థం చేసుకుంటారని సుమాయా, అఫిఫా చెప్పుకొచ్చారు.

Also Read: గుండెని కలిచి వేస్తున్న అమానుషం..! ఈ పోలీస్ ఇన్స్పెక్టర్ ఏం చేశాడంటే..?

తెలంగాణలో కాంగ్రెస్ పై అంచనాలు పెరుగుతున్నాయి. సీట్ల కోసం పోటీ పెరిగింది. కొత్త ముఖాలు తెర పైకి వస్తున్నాయి. తమకే సీటు అంటూ ప్రచారం చేసుకుంటున్నాయి. కానీ, కాంగ్రెస్ లో ఎవరికి సీటు అనేది డిసైడ్ చేసేది హైకమాండ్. పార్టీ జెండా భుజాన వేసి మోసిన వారికే ప్రాధన్యత ఖాయం. కొత్తగా పార్టీలో చేరిన వారంతా తమకు సీట్లు ఖాయమంటూ చేసుకుంటున్న ప్రచారంతో డొల్ల తనం బయట పడుతోంది. తాజాగా తీన్మార్ మల్లన్న తనకు మేడ్చల్ సీటు ఖాయమని ప్రమోట్ చేసుకుంటున్నారు. పార్టీ నుంచి ఇప్పటి వరకు ఎలాంటి హామీ దక్కలేదు. మేడ్చల్ లో కాంగ్రెస్ కష్టాల్లో ఉన్నా..నష్టాలు భరించి పని చేసిన నేతలు ఉన్నారు. వారి వైపే కాంగ్రెస్ మొగ్గు చూపే అవకాశం కనిపిస్తోంది.

తెలంగాణ కాంగ్రెస్ లో పెరిగిన జోష్ తో టికెట్ల పైన పలువురు ఆశలు పెంచుకుంటున్నారు. కాంగ్రెస్ కు అధికారం ఖాయమని నమ్మి పార్టీలోకి వస్తున్న వారి సంఖ్య పెరుగుతోంది. కొందరు ముఖ్య నేతలు తమతో పాటుగా తమ విధేయులకు సీట్లు కావాలంటూ పార్టీలో చేరిక సమయంలో ఒప్పందాలు చేసుకుంటున్నారు. కొంత వరకు వారి షరతులకు పార్టీ హైకమాండ్ మొగ్గు చూపుతోంది. అదే సమయంలో పార్టీని తొలి నుంచి నమ్ముకున్న వారు ఉన్న స్థానాల్లో మాత్రం ఆచి తూచి స్పందిస్తోంది. పార్టీ కోసం కష్టపడిన వారిని విస్మరించి కొత్త వారికి ప్రాధాన్యత ఉండదని తాజాగా ఢిల్లీ కేంద్రంగా జరిగిన పార్టీ ముఖ్య నేతల సమావేశం లో హైకమాండ్ స్పష్టం చేసింది. ఈ క్రమంలోనే తాజాగా మేడ్చల్ నియోజకవర్గం అంశం తెర మీదకు వచ్చింది.

కాంగ్రెస్ సీటు తనకే అంటూ తీన్మార్ మల్లన్న కొంత కాలంగా ప్రమోట్ చేసుకుంటున్న అంశం చర్చగా మారింది. సోషల్ మీడియాలో తీన్మార్ మల్లన్న తానే కాంగ్రెస్ అభ్యర్ధిగా ప్రచారం చేసుకుంటున్నారు.

దీనిని పార్టీ నేతలు అధినాయకత్వం దృష్టికి తీసుకెళ్లారు. తాము ఎవరికీ ఎటువంటి హామీ ఇవ్వలేదని కాంగ్రెస్ నాయకత్వం స్పష్టం చేసినట్లు తెలుస్తోంది. ఇప్పటికే మేడ్చల్ నియోజకవర్గంలో కాంగ్రెస్ కోసం మాజీ ఎమ్మెల్యే కిచ్చెన్న గారి లక్ష్మారెడ్డితో పాటుగా జంగయ్య యాదవ్, హరి వర్ధన్ రెడ్డి పార్టీ కోసం పని చేస్తున్నారు. ఇప్పుడు మల్లన్న తానే అభ్యర్ధి అని ప్రచారం చేసుకోవటం పైన పార్టీలో చర్చ జరుగుతోంది. ఎన్నికల వేళ అందరి సమిష్టి నిర్ణయం మేరకు అభ్యర్ధిని ఖరారు చేసి..అందరూ అభ్యర్ధి గెలుపుకు పని చేసేలా టికెట్ల ఖరారు విషయంలో హైకమాండ్ ప్రణాళికా బద్దంగా వ్యవహరిస్తోంది.

ఇప్పుడు ఎవరికి వారు టికెట్లు తమకే అంటూ ప్రచారం చేసుకోవటం సరి కాదని పార్టీ నాయకత్వం స్పష్టం చేస్తోంది. టికెట్ల ఖరారు నిర్ణయం పూర్తిగా తామే పర్యవేక్షిస్తామని పార్టీ సీనియర్లకు హైకమాండ్ హామీ ఇచ్చింది. అందులో భాగంగానే పార్టీలో నేతల చేరికల సమయంలో ఒప్పందాలను నేరుగా పార్టీ నాయకత్వం చర్చిస్తుంది. వారి అభ్యర్దనల పైన ఆచి తూచి స్పందిస్తోంది. కాంగ్రెస్ పార్టీకి పట్టున్న మేడ్చల్ లాంటి నియోజకవర్గాల్లో అందరికీ ఆమోదయోగ్యంగా నిర్ణయం ఉంటుందని పార్టీ వర్గాలు చెబుతున్నాయి. పార్టీ కోసం పని చేసిన వారి సేవలను విస్మరించేదిలేదని స్పష్టం చేస్తోంది. అభ్యర్ధిని గెలిపించాల్సింది స్థానిక నేతలు..కేడర్ కావటంతో వారి అభీష్టానికి వ్యతిరేకంగా ఏ నిర్ణయాలు ఉండవని పార్టీ నేతలు తేల్చి చెబుతున్నారు.

తెలంగాణలో కాంగ్రెస్ హైకమాండ్ వ్యూహాత్మక అడుగులు వేస్తుంది. సమర్ధమైన నేతలకు కీలక బాధ్యతలు అప్పగిస్తోంది. జిల్లాలు, నియోజకవర్గాల వారీగా ముఖ్య నేతలను రంగంలోకి దించుతోంది. అందులో భాగంగా తాజాగా పార్టీ సీనియర్ నేత కిచ్చెన్నగారి లక్ష్మారెడ్డి ఇంటికి కాంగ్రెస్ ప్రధాన కార్యదర్శులు వచ్చారు. కేఎల్ఆర్ తో భేటీ అయి రంగారెడ్డి జిల్లాలో పార్టీ వ్యవహారాల పైన చర్చించారు. ఉమ్మడి రంగారెడ్డి జిల్లా పార్టీ బాధ్యతలను అప్పగించారు. గతంలో మేడ్చల్ ఎమ్మెల్యేగా పని చేసిన కేఎల్ఆర్ కాంగ్రెస్ నాయకత్వానికి విధేయుడిగా ఉన్నారు. బీఆర్ఎస్ తో పోటీ వేళ కీలకమైన రంగారెడ్డి జిల్లాలో కేఎల్ఆర్ కు ఉన్న పట్టుతో ఎన్నికల వేళ ఆయన సేవలను సద్వినియోగం చేసుకోవాలని కాంగ్రెస్ నిర్ణయించింది.

తెలంగాణలో కాంగ్రెస్ అధికారం దక్కించుకోవటమే లక్ష్యంగా నిర్ణయాలు తీసుకుంటోంది. కొత్త నేతల చేరికలను ప్రోత్సహిస్తూనే…సమర్ధవంతమైన నేతలకు జిల్లాల బాధ్యతలు కేటాయిస్తోంది. పార్టీ గెలుపు కోసం ప్రజలను ప్రభావితం చేయగలగిని నేతలకు ప్రాధాన్యత ఇస్తుంది. రంగారెడ్డి జిల్లా తొలి నుంచి కాంగ్రెస్ కు కంచుకోటగా ఉంది. అక్కడ కాంగ్రెస్ నుంచి గెలిచిన నేతలు గులాబీ కండువా కప్పుకున్నారు. దీంతో అక్కడ తొలి నుంచి పార్టీ కోసమే పని చేస్తున్న కేఎల్ఆర్ ను పార్టీ గుర్తించింది. ఆర్థిక, అంగ బలం కలిగిన కేఎల్ఆర్ సేవలను పార్టీకి ఎన్నికల సమయంతో సహకరిస్తారనే అభిప్రాయానికి వచ్చింది. దీంతో, కాంగ్రెస్ పార్టీ ప్రధాన కార్యదర్శులు నేరుగా కిచ్చెన్నగారి లక్ష్మారెడ్డి నివాసానికి వెళ్లారు.

ఉమ్మడి రంగారెడ్డి జిల్లాలోని ప్రతీ నియోజకవర్గం పైన కేఎల్ఆర్ కు పట్టు ఉండటంతో ఆయనతో కీలక చర్చలు జరిపారు. ప్రతీ నియోజకవర్గం పైనా ఫోకస్ పెట్టాలని..పార్టీ శ్రేణులను ఎన్నికలకు సంసిద్దులను చేసేలా కార్యాచరణతో రంగంలోకి దిగాలని పార్టీ ముఖ్య నేతలు కేఎల్ఆర్ కు సూచించారు. ప్రజలను ఆకట్టుకునే విధంగా నియోజకవర్గాల్లో పార్టీ కార్యక్రమాలకు రూపకల్పన చేయాలని కోరారు. దీంతో ఇప్పుడు కేఎల్ఆర్ ఉమ్మడి రంగారెడ్డి జిల్లాలో ఒక్కో నియోజకవర్గంలో పర్యటనలు ప్రారంభించారు. చేవెళ్ల పార్లమెంట్ పరిధిలోనూ మంచి పట్టు ఉన్న నేతగా కేఎల్ఆర్ కు గుర్తింపు ఉంది. దీంతో ముందుగా చేవెళ్ల అసెంబ్లీ పరిధిలోని పార్టీ కీలక నేతలతో సమావేశమైన కేఎల్ఆర్ తనకు పార్టీ అప్పగించిన బాధ్యతల అమలుకు రంగంలోకి దిగారు.

మేడ్చల్ పరిధిలో బోనాల వేడుకల్లోనూ పాల్గొన్న కేఎల్ఆర్, కార్యకర్తల్లో జోష్ నింపారు. దాదాపు వెయ్యి బైక్ లతో కేఎల్ఆర్ అభిమానులు బోనాల వేళ బైక్ ర్యాలీతో ఆహ్వానించారు. మేడ్చల్ తో పాటుగా ఉమ్మడి రంగారెడ్డి జిల్లాలోని ప్రతీ నియోజకవర్గంలో ఇప్పుడు కేఎల్ఆర్ పార్టీకి ఇచ్చే నివేదికలు కీలకం కానున్నాయి. పార్టీ క్షేత్ర స్థాయి పరిస్థితి నుంచి ప్రతీ అంశం పైన కేఎల్ఆర్ ప్రత్యేకంగా ఫోకస్ చేసారు. నిరంతరం హైకమాండ్ తో టచ్ లో ఉంటూ ఎన్నికల వేళ కీలకంగా మారారు. దీంతో, కేఎల్ఆర్ కేంద్రంగా రంగారెడ్డి కాంగ్రెస్ రాజకీయం నడుస్తోంది. కేఎల్ఆర్ నివాసానికి పార్టీ జాతీయ కార్యదర్శులు రావటం, బాధ్యతలు అప్పగించటంతో ఆ జిల్లా పార్టీ నిర్ణయాల్లో కేఎల్ఆర్ చక్రం తిప్పటం ఖాయంగా కనిపిస్తోంది.

రైల్వే స్టేషన్ ఆవరణలో ఆదమరిచి నిద్రిస్తున్న ఒక చిన్నారిపై పోలీసు అధికారి తన జులుం ప్రదర్శించాడు. పదవి చేతిలో ఉంది కదా అని పసిపిల్ల అన్న కనికరం కూడా లేకుండా కాలితో తన్నాడు. ఈ అనాగరికమైనటువంటి చర్య ఉత్తరప్రదేశ్ లోని బల్లియాజిల్లాలోని బెల్తారా రోడ్ రైల్వే స్టేషన్‌లో చోటు చేసుకుంది.

ఈ సంఘటనకు సంబంధించిన వీడియో ఆదివారం సోషల్ మీడియాలో విడుదలైన వెంటనే బాగా వైరల్ అయింది. ఈ అమానుషమైన చర్య పై పలువురు తమ అభ్యంతరాన్ని వ్యక్తం చేశారు. నిద్రిస్తున్న చిన్న పాపపై కాలితో తన్నడానికి అతనికి మనసెలా వచ్చింది…కనీసం మానవత్వం కూడా లేదా అని పలువురు ఆ కానిస్టేబుల్ తీరుపై విమర్శల వర్షం కురిపించారు.

ఇన్సిడెంట్ లో ఉన్న కానిస్టేబుల్ బలిందర్ సింగ్‌ పని చేసేది నార్త్-ఇష్టం రైల్వే వారణాసి ఆర్పిఎఫ్ విభాగంలో. ఈ సంఘటన వైరల్ అయిన తరువాత అతన్ని గుర్తించి సస్పెండ్ చేయడం జరిగింది.ఈ నేపథ్యంలో జరిగిన సంఘటన పై స్పందించిన నార్త్ ఈస్టర్న్ రైల్వే విభాగం జరిగిన దుర్ఘటన పై వెంటనే చర్యలు తీసుకున్నామని.. ఇటువంటి చర్యకు పాల్పడిన కానిస్టేబుల్ తక్షణమే సస్పెండ్ చేశామని పేర్కొన్నారు.

వారణాసి డివిజన్ పీఆర్ఓ అయిన అశోక్ కుమార్ మాట్లాడుతూ.. సదరు సంఘటన ఎప్పుడు జరిగిందో తెలియదని.. కానీ ఇటువంటి సంఘటనలు ఇంకా జరగకుండా చూసుకుంటామని. ప్రస్తుతం ఈ సంఘటన ఎప్పుడు ,ఎలా, ఎందుకు జరిగింది అన్న విషయంపై దర్యాప్తు కూడా జరుగుతుంది అని పేర్కొన్నారు. అయితే నేటిజెన్లు మాత్రం ఈ సంఘటనపై మండిపడుతున్నారు. ప్రజలను కాపాడడానికి ఉన్న పోలీస్ డిపార్ట్మెంట్లోని వ్యక్తులు కనికరం లేకుండా ప్రవర్తిస్తే ఎలా అని సూటిగా ప్రశ్నిస్తున్నారు?

.గత కొద్ది రోజులుగా అనేక ట్విస్టులు తీసుకుంటున్న పబ్జీ ప్రేమ కథ మరొకసారి వార్తల్లో నిలిచింది. కోవిడ్ లాక్ డౌన్ సమయంలో మొదలైన ఈ పబ్జీ ప్రేమాయణం కారణంగా సీమా హైదర్‌ అనే పాకిస్తానీ మహిళ పాకిస్తాన్ విడిచిపెట్టి అక్రమంగా భారత్ లోకి ప్రవేశించడం జరిగింది.

సచిన్ మీనా అనే వ్యక్తితో పబ్జీ గేమ్ లో ఏర్పడిన పరిచయం ప్రేమగా మారడంతో ఈ నలుగురు పిల్లల తల్లి అతని కోసం పిల్లలతో సహా భారత్‌కు చేరుకుంది. ఇప్పుడు ఇద్దరూ పెళ్ళి చేసుకుని పిల్లలతో కలిసి హాయిగా సెటిల్ అయిపోయారు కూడా.

గ్రేటర్ నోయిడాలో ఫ్లాట్ అద్దెకు తీసుకొని ఉంటున్న సీమా హైదర్‌ పై అక్రమ చొరబాటు కేసు నమోదు కావడం ఆ తర్వాత హైకోర్టు ఆమెకు బెయిల్ మంజూరు చేయడం అందరికీ తెలిసిందే. ఇక తర్వాత తిరిగి పాకిస్తాన్ కి వెళ్ళేది లేదని తను హిందువుగా ఉండడానికే ఇష్టపడుతున్నానని ఆమె తేల్చి చెప్పడం కూడా జరిగింది. ఇందుకోసం అధికారులను కూడా సంప్రదిస్తానని సీమా తెలిపారు. పాకిస్తాన్ కు తిరిగి వెళ్లడం ఇష్టం లేదని ఒకవేళ వెళ్ళినా అక్కడ తన ప్రాణాలకు ముక్కు ఉందని ఆమె పేర్కొన్నారు.

సీమా మొదటి భర్త హైదర్ అలీ సౌదీలో లో పని చేస్తూ ఉండగా గత మూడేళ్లుగా సీమా తన పిల్లలతో పాకిస్థాన్ లో అద్దె ఇంట్లో ఉంటున్నారు. అయితే ఈ విషయంపై తాజాగా స్పందించిన ఆమె కుటుంబ సభ్యులు ఒక భారతీయుడు కోసం వెళ్ళిపోయిన ఆమెతో తమకు ఎటువంటి సంబంధం లేదని .ఇక ఆమె పాకిస్తాన్ కు తిరిగి రావాల్సిన అవసరం కూడా లేదని తెలిపారు. కానీ నలుగురు పిల్లల్ని మాత్రం పాకిస్తాన్ కి పంపవలసిందిగా వాళ్లు డిమాండ్ చేస్తున్నారు. మరి ఈ నేపథ్యంలో సీమా ఈ విషయంపై ఎలా స్పందిస్తారో తెలియదు. .

తెలంగాణ రాజకీయాలపై కాంగ్రెస్ హైకమాండ్ పట్టు బిగిస్తుంది. పార్టీలో నేతల వ్యవహార శైలి పైన కన్నేసింది. రాష్ట్రంలో పార్టీకి వాతావరణం అనుకూలగా మారుతున్న వేళ ప్రతీ నిర్ణయం ఆచితూచి తీసుకుటుంది. క్షేత్రస్థాయి పరిస్థితులు, నేతల వ్యాఖ్యలపైన ఎప్పటికప్పుడు సమాచారం సేకరిస్తుంది. పార్టీ మేనిఫెస్టో మొదలు టికెట్ల ఖరారు పైనా తాజాగా పార్టీ నేతలకు కీలక దిశా నిర్దేశం చేసింది. అన్ని వర్గాలను ఆకట్టుకునే విధంగా మేనిఫెస్టో ఉంటుందని, వ్యక్తిగత అభిప్రాయాలకు తావు లేదని క్లారిటీ ఇచ్చింది. ఇదే సమయంలో టికెట్ల పైన ఎవరు హామీ ఇచ్చినా అంతిమ నిర్ణయం పార్టీ హైకమాండ్ దేనని నేతలకు తేల్చి చెప్పింది.

తెలంగాణలో రాజకీయ సమీకరణాలు కాంగ్రెస్ కు అనుకూలంగా మారుతున్నాయి కాబట్టి ఏ ఒక్క అవకాశం వదులుకోవటానికి పార్టీ సిద్ధంగా లేదు. ఎలాగైనా అధికారంలోకి రావటమే లక్ష్యంగా మినిట్ టు మినిట్ పార్టీ వ్యవహారాలపైన మైక్రో లెవల్ నుంచి సమాచారం సేకరిస్తోంది. టీపీసీసీ చీఫ్ తో సహా ఏ స్థాయి నేత అయినా పార్టీకి ఇబ్బంది కలిగించేలా వ్యవహరించినా ఉపేక్షించేది లేదని స్పష్టం చేసింది. తెలంగాణలో గత తొమ్మిదేళ్ళుగా బీఆర్ఎస్ ప్రభుత్వం పైన అన్ని వర్గాల ప్రజల్లోనూ వ్యతిరేకత పెరిగిన అంశాన్ని సర్వే సంస్థలు కాంగ్రెస్ హైకమాండ్ కు నివేదికలు ఇచ్చాయి. దీనికి అనుగుణంగా ఏ ఒక్కరినీ విస్మరించకుండా అందిరికీ సముచిత ప్రాధాన్యత ఇచ్చేలా మేనిఫెస్టో రూపకల్పనకు పార్టీ సిద్ధం అవుతోంది. పేదలు, మధ్య తరగతి, అన్ని వర్గాల ప్రజలను ఆకట్టుకునేలా మేనిఫెస్టో సిద్ధం చేయాలని నిర్ణయం తీసుకుంది.

ఇదే సమయంలో పార్టీ టికెట్ల పైన కొందరు నేతలు హామీలు ఇస్తున్నట్లుగా వస్తున్న వార్తలపై హైకమాండ్ ప్రత్యేకంగా ఫోకస్ చేసింది. కొందరు ముఖ్య నేతలు తామే టికెట్లు ఇప్పిస్తామంటూ చెబుతున్న మాటలను హైకమాండ్ సీరియస్ గా తీసుకుంది. గెలుపే ప్రామాణికంగా అభ్యర్ధుల ఎంపిక ఉంటుందని ఖరాఖండిగా పార్టీ ముఖ్య నేతలకు తేల్చి చెప్పింది. నేతల సిఫార్సులకు ప్రాధాన్యత ఉండదని స్పష్టం చేసింది. నేతల వారసులకు కాని, అనుచరులకు కాని టికెట్లు ఇచ్చే అవకాశం లేదంటూ పార్టీ నాయకత్వం కుండ బద్దలు కొట్టింది. ప్రాంతీయ సామాజిక సమీకరణాలను పరిగణలోకి తీసుకొని అన్ని వర్గాలకు ప్రాధాన్యత ఇస్తూనే గెలుపు మాత్రమే లక్ష్యంగా టికెట్ల ఖరారు ఉంటుందని తేల్చేసింది.

ముఖ్య నేతలకు మద్దతుగా నిలిస్తే టికెట్లు ఖాయమనే భావనలో ఉన్న నేతలకు పార్టీ తాజా నిర్ణయం మింగుడు పడటం లేదు. ప్రజలతో మమేకం అయిన నేతలకు..కార్యకర్తల్లో గుర్తింపు ఉన్న వారికే ప్రాధాన్యత ఉంటుందని ఇప్పటికే ఢిల్లీలో కీలక నేతలకు పార్టీ దిశా నిర్దేశం చేసింది. ఈ సారి తెలంగాణలో కాంగ్రెస్ గెలుపును పార్టీ అధినాయకత్వం ప్రతిష్ఠాత్మకంగా తీసుకుంది. ఈ సమయంలో కీలకమైన టికెట్ల విషయంలో ఏ ఒక్కిరి సిఫార్సులకు అవకాశం లేకుండా.. క్షేత్ర స్థాయి సమాచారం, పార్టీకి పని చేసిన విధానం, ప్రజల్లో పలుకుబడి, గెలుపుకు అవకాశాలు, కార్యకర్తలతో ఉన్న సంబంధాలు..ఇలా అన్ని అంశాలను పరిగణలోకి తీసుకొని టికెట్ల ఖరారు ఉంటుందని పార్టీ నాయకత్వం స్పష్టం చేసింది. ఇప్పుడు పార్టీ తాజాగా తీసుకున్న ఈ నిర్ణయం కాంగ్రెస్ ముఖ్య నేతల్లో హాట్ టాపిక్ గా మారింది.