Viral

సైలెంట్ గా, ఎటువంటి అంచనాలు లేకుండా విడుదల అయ్యి, ఊహించనటువంటి పెద్ద హిట్ అయిన సినిమా డీజే టిల్లు. ఇప్పుడు ఈ సినిమాకి సీక్వెల్ గా టిల్లు స్క్వేర్ సినిమా విడుదల అయ్యింది. ఈ సినిమా ఇవాళ ప్రేక్షకుల ముందుకి వచ్చింది. ఈ సినిమా ఎలా ఉందో ఇప్పుడు చూద్దాం.

• చిత్రం : టిల్లు స్క్వేర్
• నటీనటులు : సిద్దు జొన్నలగడ్డ, అనుపమ పరమేశ్వరన్.
• నిర్మాత : సూర్యదేవర నాగ వంశీ, సాయి సౌజన్య
• దర్శకత్వం : మల్లిక్ రామ్
• సంగీతం : రామ్ మిరియాల, అచ్చు రాజమణి
• విడుదల తేదీ : మార్చి 29, 2024

స్టోరీ :

బాలగంగాధర్ తిలక్ అలియాస్ డీజే టిల్లు (సిద్దు జొన్నలగడ్డ) వచ్చిన డబ్బులన్నిటితో డీజేగా తను చేసే పని మానేసి, ఒక ఈవెంట్ కంపెనీ పెడతాడు. ఈవెంట్ ప్లానర్ అవతారం ఎత్తి అన్ని రకాల ఈవెంట్స్ జరిపిస్తూ ఉంటాడు. గతంలో టిల్లు ఎదుర్కొన్న సంఘటనలు, దాని వల్ల అంత ప్రభావం పడినా కూడా టిల్లు మారడు. పార్టీలో కనిపించిన లిల్లీ (అనుపమ పరమేశ్వరన్) తో ప్రేమలో పడి, ఆమె వెనకాల పడతాడు. కానీ తర్వాత అనుకోకుండా కొన్ని ఇబ్బందులు ఎదుర్కొంటాడు. అసలు లిల్లీ ఎవరు? తర్వాత టిల్లు వెనకాల ఎందుకు పడింది? మధ్యలో వచ్చే డాన్ (మురళీ శర్మ) తో టిల్లుకి ఏం కనెక్షన్ ఉంటుంది? గత సంవత్సరం టిల్లు పుట్టినరోజు నాడు జరిగిన విషయం మళ్ళీ ఇప్పుడు బయటికి ఎందుకు వచ్చింది? ఇదంతా తెలియాలి అంటే మీరు సినిమా చూడాల్సిందే.

రివ్యూ :

హీరోలకి కానీ, హీరోయిన్ల కి కానీ, లేదా నటులకి కానీ అసలైన సక్సెస్ అనేది కలెక్షన్స్ పరంగా మాత్రమే కాదు. వాళ్లు ఏదైనా ఒక పాత్ర చేస్తే, ఆ పాత్ర ప్రేక్షకులకు గుర్తుండిపోతే, ఒకవేళ వాళ్ళు బయటికి వెళ్లినా కూడా వాళ్ళని అదే పాత్రతో పిలిస్తే అప్పుడు వారికి సక్సెస్ వచ్చినట్టు. ఇప్పుడు డీజే టిల్లు అనే పేరుతోనే సిద్దు జొన్నలగడ్డ చాలా ఫేమస్ అయ్యారు. కలర్ ఫుల్ బట్టలు, మామూలు దుస్తులకి అంతర్జాతీయ బ్రాండ్ లేబుల్స్ అంటించడం, తన కాలనీలో తనని ఎవరూ పట్టించుకోకపోయినా కూడా తనకి చాలా పాపులారిటీ ఉన్నట్టు బిల్డప్ ఇవ్వడం, అమ్మాయిల దగ్గర అల్లు అర్జున్ తనని తన నెక్స్ట్ సినిమాకి అడిగారు అని చెప్పడం, ఇవన్నీ టిల్లు చేసిన పనులు.

వాటి నుండి టిల్లు ఎదుర్కొన్న సంఘటనలు ప్రేక్షకులని నవ్వించాయి. కానీ జీవితంలో అన్ని చూసినా కూడా మనిషి మారకపోతే ఎలాంటి సంఘటనలు జరుగుతాయి అనేది ఈ సినిమాలో చూపించారు. స్టోరీ లైన్ విషయానికి వస్తే కొంత వరకు తెలిసిన కథ. టేకింగ్ పరంగా బాగుంది. కాకపోతే స్క్రీన్ ప్లే సాధారణంగా అనిపిస్తుంది. సినిమా తీసిన విధానం మాత్రం మొదటి భాగం లాగానే ఉంటుంది. అంటే అదే టెంప్లేట్ ఫాలో అయ్యారు. కొన్ని సీన్స్ అయితే రిపీట్ అయినట్టు అనిపిస్తాయి. కానీ మొదటి భాగంలో అవన్నీ హిట్ అవ్వడంతో ఇందులో కూడా అవి రిపీట్ చేయాలి అని అనుకున్నట్టు తెలుస్తోంది.

సినిమాలో వన్ లైనర్స్ చాలా బాగా రాసుకున్నారు. మొదటి భాగంలో కూడా, అట్లుంటది మనతోని, ఈ క్వషన్స్ అన్ని నువ్వు నన్ను తెలిసే అడుగుతున్నావా రాధిక, బిగినర్స్ మిస్టేక్స్, ఏడిస్తే కన్నీళ్లు సాంబార్ లో పడి ఉప్పగా అవుతుంది, ఇలాంటి డైలాగ్స్ కి చాలా నవ్వుకున్నారు. ఇప్పుడు ఇందులో కూడా ఇలాంటి డైలాగ్స్ చాలా ఉన్నాయి. కొన్ని ట్విస్ట్ సీన్స్ ఉన్నాయి. వాటిలో కొన్ని మనం గెస్ చేసేలాగా ఉన్నాయి. కొన్ని మాత్రం కొత్తగా ఉన్నాయి. క్లైమాక్స్ అసలు ఏ ఉద్దేశంతో పెట్టారు అనేది అర్థం కాదు. అంటే అప్పటి వరకు కామెడీగా వెళుతున్న సినిమా సడన్ గా క్లైమాక్స్ ఎపిసోడ్ తో సీరియస్ అవుతుంది. కానీ ఆసక్తికరంగా అనిపిస్తుంది.

పర్ఫార్మెన్స్ విషయానికి వస్తే, ఈ సినిమాకి కర్త, కర్మ, క్రియ అన్ని డీజే టిల్లు అలియాస్ సిద్దు జొన్నలగడ్డ. ఈసారి ఇంకా కలర్ ఫుల్ బట్టలతో, కొత్త కొత్త ఇబ్బందులతో అందరినీ నవ్వించారు. సినిమా మొత్తంలో సిద్ధూ మాత్రమే కనిపించారు. టిల్లు పేరు మీద సినిమా ఉంది. కాబట్టి ఆ పాత్ర కనిపించాలి. టైటిల్ తగ్గట్టే సినిమా మొత్తం కూడా టిల్లు అనే వ్యక్తి, అతను చేసిన పర్ఫార్మెన్స్ గుర్తుండిపోయేలాగానే ఉంటాయి. అనుపమ పరమేశ్వరన్ ఇప్పటి వరకు పోషించని ఒక కొత్త పాత్ర పోషించారు.

గ్లామరస్ గా కనిపించడంతో పాటు, నటన పరంగా కూడా అనుపమ పాత్ర బాగా రాసుకున్నారు. టిల్లులో కనిపించిన మెయిన్ క్యారెక్టర్, రాధిక అక్క కూడా కనిపిస్తారు. తనకి ఇచ్చిన చిన్న పాత్రలో నేహా శెట్టి బాగా నటించారు. ఇంకా మొదటి భాగంలో ఉన్న చాలా మంది, వారితో పాటు ఇప్పుడు వచ్చిన మురళీ శర్మ వంటి వారు కూడా చాలా బాగా నటించారు. రామ్ మిరియాల, అచ్చు రాజమణి అందించిన పాటలు బాగున్నాయి. టెక్నికల్ గా సినిమా చాలా బలంగా ఉంది. నిర్మాణ విలువలు చాలా బాగున్నాయి. కాకపోతే మొదటి భాగం చాలా బాగా చూసిన వారికి ఇందులో కొన్ని సీన్స్ రిపీట్ చేసినట్టు అనిపిస్తాయి. అవి కాస్త ఎక్కువగా ఉన్నాయి. ఆ విషయంలో ఇంకా కొంచెం జాగ్రత్త తీసుకొని ఉంటే బాగుండేది ఏమో అనిపిస్తుంది.

ప్లస్ పాయింట్స్ :

• సిద్దు జొన్నలగడ్డ నటన
• వన్ లైనర్స్
• కామిడీ ట్రాక్
• పాటలు

మైనస్ పాయింట్స్:

• బలహీనమైన కథనం
• ఎక్కువగా అనిపించే మొదటి భాగం రిఫరెన్స్ లు

రేటింగ్ :

3/5

ట్యాగ్ లైన్ :

చిన్న చిన్న పొరపాట్లు ఉన్నా కూడా అవన్నీ పెద్దగా పట్టించుకునే అంత లేవు. వాటన్నిటి కంటే మంచి కామెడీ ఈ సినిమాలో ఉంది. మొదటి భాగం ఎంజాయ్ చేసిన వారు ఈ సినిమాని అంతకంటే ఎక్కువ ఎంజాయ్ చేస్తారు. థియేటర్ లో 2 గంటల పాటు హాయిగా నవ్వుకుంటారు. డీజే టిల్లు సినిమాతో ఎన్ని అంచనాలు అయితే క్రియేట్ చేశారో ఈ సినిమాతో అవన్నీ కూడా అందుకున్నారు. ఈ సంవత్సరం వచ్చిన బెస్ట్ ఎంటర్టైనర్ సినిమాగా టిల్లు స్క్వేర్ సినిమా నిలుస్తుంది.

watch trailer :

ALSO READ : చిరంజీవి “ఇంద్ర” నుండి… రామ్ చరణ్ “వినయ విధేయ రామ” వరకు… ప్రేక్షకులకి “లాజిక్” మిస్ అయినట్టు అనిపించిన 16 సినిమాల సీన్స్..!

మలయాళం సినిమాలతో, ఇప్పుడు సలార్ సినిమాతో తెలుగు ప్రేక్షకులకు దగ్గర అయ్యారు పృథ్వీరాజ్ సుకుమారన్. పృథ్వీరాజ్ గత కొన్ని సంవత్సరాల నుండి ఒక ప్రాజెక్ట్ మీద పనిచేస్తున్నారు. ఆ సినిమా ది గోట్ లైఫ్. ఇవాళ ప్రేక్షకుల ముందుకి వచ్చిన ఈ సినిమా ఎలా ఉందో ఇప్పుడు చూద్దాం.

• చిత్రం : ది గోట్ లైఫ్ – ఆడు జీవితం
• నటీనటులు : పృథ్వీరాజ్ సుకుమారన్, అమలా పాల్, జిమ్మీ జీన్-లూయిస్, KR గోకుల్.
• నిర్మాత : బ్లెస్సీ, జిమ్మీ జీన్-లూయిస్, స్టీవెన్ ఆడమ్స్, కె.జి. అబ్రహం
• దర్శకత్వం : బ్లెస్సీ
• సంగీతం : A. R. రెహమాన్
• విడుదల తేదీ : మార్చి 28, 2024

స్టోరీ :

నజీబ్ (పృథ్వీరాజ్ సుకుమారన్), అతని భార్య సైను (అమలా పాల్) కలిసి ఆనందంగా బతుకుతూ ఉంటారు. అయితే, డబ్బులు సంపాదించాలి అనే ఆలోచనతో దుబాయ్ కి వెళ్ళాలి అని అనుకుంటాడు నజీబ్. తన స్నేహితుడు, హకీమ్ (కెఆర్ గోకుల్) తో కలిసి ముందు సౌదీ అరేబియాకి వెళ్తాడు. దొంగ వీసా మీద నజీబ్ అక్కడికి వెళ్తాడు. అలా వాళ్ళు దుబాయ్ వరకు చేరుకుంటారు. వాళ్లకి హిందీ రాదు. అలా అని ఇంగ్లీష్ కూడా రాదు. దాంతో ఎయిర్ పోర్ట్ లో చాలా ఇబ్బందులు పడతారు. అక్కడ స్పాన్సర్ కోసం ఎదురు చూస్తున్నప్పుడు ఖఫీల్ (తాలిబ్ అల్ బలూషి) వీళ్ళ పరిస్థితిని గమనిస్తాడు.

అమాయకంగా ఉన్నారు అని, వీళ్ళని మోసం చేయడం చాలా సులభమైన విషయం అని అనుకుంటాడు. వాళ్ళిద్దరిని తనతో పాటు తీసుకెళ్తాడు. హకీమ్ ని నజీబ్ నుండి విడదీస్తాడు. నజీబ్ ని ఒక ఎడారిలో గొర్రెలు కాయడానికి వదిలేస్తాడు. అప్పుడు నజీబ్ ఏం చేశాడు? ఎడారి నుండి ఎలా తప్పించుకున్నాడు? ఎన్ని సంవత్సరాలు అక్కడ ఉన్నాడు? నజీబ్ ఎలాంటి సంఘటనలు ఎదుర్కొన్నాడు? ఇవన్నీ తెలియాలి అంటే మీరు సినిమా చూడాల్సిందే.

రివ్యూ :

సినిమా అన్న తర్వాత చాలా మంది చాలా కాలం పాటు కష్టపడతారు. ఆ కష్టాన్ని 3 గంటల రూపంలో మనకి చూపిస్తారు. సినిమాల కోసం సంవత్సరాలు కష్టపడడం అనేది కొత్త ఏమీ కాదు. కానీ అన్ని సంవత్సరాలు కష్టపడటం అనేది చాలా గొప్ప విషయం. ఎంతో ఓపిక ఉండాలి. ప్రేక్షకులకి ఒక 3 గంటల సినిమాని అందించడానికి ఇన్ని సంవత్సరాలు కష్టపడుతున్నారు అంటే వాళ్లకి సినిమా పట్ల ఉన్న తపన ఏంటో అనేది అర్థం అవుతుంది. ఈ సినిమా కోసం దర్శకుడు బ్లేస్సీతో కలిసి పృథ్వీరాజ్ దాదాపు 10 సంవత్సరాల నుండి పనిచేస్తున్నారు. మరొక పక్క ఇంకా కొన్ని ప్రాజెక్ట్ కూడా చేస్తూ ఉన్నారు.

అలా ఇన్ని సంవత్సరాలు ఒక స్టార్ హీరో పనిచేయడం అనేది చిన్న విషయం కాదు. ఇప్పుడు ఈ సినిమా ప్రేక్షకుల ముందుకి వచ్చింది. సినిమాలో చాలా వరకు ఎమోషనల్ గా సీన్స్ ఎక్కువగా ఉండేలాగా రాసుకున్నారు. డబ్బు సంపాదించాలి అనే ఆశ అందరిలో ఉంటుంది. కొంత మంది మామూలుగా ఉన్నా కూడా, చుట్టూ ఉన్నవారు వారిని పనికిరాని వారు అని అనుకునే లాగా చేసి, వాళ్లు తప్పుడు నిర్ణయాలు తీసుకునే స్థాయికి తీసుకెళ్తారు. అలాంటి సమయంలో ఇవన్నీ పడలేక డబ్బు సంపాదించాలి అని అనుకున్న వ్యక్తి ఎన్నో ఇబ్బందులు పడతాడు.

డబ్బు సంపాదిస్తే చాలా సమస్యలు తీరిపోతాయి అని, కష్టపడాలి అని ఒకే ఒక్క ఆలోచనతో ఎంతో మంది వస్తారు. కానీ వాళ్లలో కొంత మంది అమాయకులు కూడా ఉంటారు. కొంత మంది ఈ విషయాన్ని ఉపయోగించుకొని ఈ అమాయకులని ఇబ్బంది పెడతారు. ఈ సినిమాలో కూడా ఇప్పుడు ఇలాంటి ఒక కథను చూపించారు. పృథ్వీరాజ్ పాత్ర ఎదుర్కొన్న సంఘటనలు చూస్తూ ఉంటే ప్రేక్షకుడికి కంటతడి తెప్పించే విధంగా ఉంటాయి. అన్ని సంవత్సరాలు ఒక మంచి ఉద్దేశంతో వెళ్లిన వ్యక్తికి అలాంటి సంఘటనలు జరిగాయి అంటే బాధాకరంగా అనిపిస్తుంది.

దర్శకుడు బ్లేస్సి రాసుకున్న సీన్స్ చాలా బాగున్నాయి. చాలా ఎమోషనల్ గా ఉన్నాయి. ఇంక పర్ఫార్మెన్స్ విషయానికి వస్తే, నటీనటులు అందరూ కూడా చాలా బాగా నటించారు. సినిమాకి పృథ్వీరాజ్ చాలా పెద్ద హైలైట్. సినిమా మొత్తాన్ని తన భుజాల మీద మోయడం మాత్రమే కాకుండా, సంవత్సరాల తరబడి తాను అక్కడ చిక్కుకుపోయి ఉన్నప్పుడు ఆ పాత్రలో ఉండే వ్యత్యాసాన్ని కూడా చాలా బాగా తెర మీద చూపించారు. యంగ్ పాత్రలో, మధ్య వయసు ఉన్న వ్యక్తి పాత్రలో, కాస్త పెద్దవాడిగా, వృద్ధాప్యానికి చేరువలో ఉన్న పాత్రలో చాలా బాగా నటించారు.

మిగిలిన వాళ్ళందరూ కూడా తమ పాత్రలకి తగ్గట్టు నటించారు. హీరోయిన్ అమలా పాల్ తనకు ఇచ్చిన పాత్ర పరిధి మేరకు నటించారు. సినిమాకి మరొక హైలైట్ ఏఆర్ రెహమాన్ అందించిన సంగీతం, నేపథ్య సంగీతం. సునీల్ కె ఎస్ అందించిన సినిమాటోగ్రఫీ సినిమా మొత్తాన్ని నెక్స్ట్ లెవెల్ కి తీసుకెళ్ళింది. కలర్ గ్రేడింగ్ చాలా బాగుంది. సినిమా సహజత్వానికి దగ్గరగా ఉండే అంత బాగా చూపించారు.

కానీ, సినిమా ఎడిటింగ్ విషయంలో ఇంకా కాస్త జాగ్రత్త తీసుకొని ఉంటే బాగుండేది. చాలా చోట్ల సినిమా సాగదీసినట్టు అనిపిస్తుంది. దాంతో కొన్ని చోట్ల బోరింగ్ అనిపించే అవకాశం ఉంది. ఎడిటింగ్ ఇంకా కొంచెం షార్ప్ గా చేసి ఉంటే బాగుండేది ఏమో అనిపిస్తుంది. లేదా, ఆ సీన్స్ అంత వివరంగా చూపించాలి అని సినిమా బృందం అనుకునే అవకాశం కూడా ఉంది. కానీ ఈ విషయంలో మాత్రం ఇంకా కొంచెం జాగ్రత్త తీసుకుని ఉంటే సినిమా ఇంకా బాగుండేది.

ప్లస్ పాయింట్స్ :

• స్టోరీ పాయింట్
• పృథ్వీరాజ్ నటన
• సంగీతం
• సినిమాటోగ్రఫీ

మైనస్ పాయింట్స్:

• ఎడిటింగ్
• సాగదీసినట్టుగా అనిపించే కొన్ని ఎపిసోడ్స్

రేటింగ్ :

3/5

ట్యాగ్ లైన్ :

సినిమాలో కొంచెం ల్యాగ్ ఉన్నా పర్వాలేదు అని అనుకుంటే ఈ సినిమా నిజాయితీతో చేసిన ఒక గొప్ప ప్రయత్నం. అందరూ తప్పకుండా చూడవలసిన ఒక సినిమా. ఇలాంటి ప్రయత్నానికి సినిమా బృందాన్ని తప్పకుండా మెచ్చుకోవాల్సిందే. ఇటీవల కాలంలో వచ్చిన ఒక గొప్ప ప్రయత్నంగా ది గోట్ లైఫ్ సినిమా నిలుస్తుంది.

watch trailer :

ALSO READ : “గుంటూరు కారం” సినిమాలో మహేష్ బాబు చెప్పినట్టే… గేమ్ ఛేంజర్ సినిమాలో “రామ్ చరణ్” చేశారుగా..? విషయం ఏంటంటే..?