Viral

• చిత్రం : విక్రమ్ హిట్‌లిస్ట్
• నటీనటులు : కమల్ హాసన్, ఫహాద్ ఫాసిల్, విజయ్ సేతుపతి.
• నిర్మాత : కమల్ హాసన్, ఆర్. మహేంద్రన్
• దర్శకత్వం : లోకేష్ కనకరాజ్
• సంగీతం : అనిరుధ్ రవిచందర్
• విడుదల తేదీ : జూన్ 3, 2022

స్టోరీ :

సినిమా మొదలవడమే చాలా ఆసక్తికరంగా ఉంటుంది. ప్రపంచన్ (కాళిదాస్ జయరామ్) అనే ఒక అమరవీరుడి తండ్రి అయిన కర్ణన్ (కమల్ హాసన్) హత్యకు గురవుతారు అనే విషయంతో సినిమా మొదలవుతుంది. కొంత మంది వ్యక్తులు ముసుగులు ధరించి వచ్చి ఇలాంటి హత్యలు చేశారు అని తేలుతుంది. వ్యవస్థ మీద వారు యుద్ధం చేస్తున్నారు అని, ఆ క్రమంలోనే ఇలా చేస్తున్నారు అని తెలుస్తుంది. జోస్ (చెంబన్ వినోద్ జోస్) అనే ఒక పోలీస్ చీఫ్ చెప్పడంతో అమర్ (ఫహాద్ ఫాసిల్) నేతృత్వంలో ఉన్న ఫోర్స్ ఈ మిస్టరీని ఛేదించడానికి రంగంలోకి దిగుతుంది. ఈ క్రమంలో అమర్ కర్ణన్ జీవితానికి సంబంధించిన విషయాలని తెలుసుకుంటూ ఉంటాడు. కానీ కర్ణన్ ఎలాంటి వ్యక్తి అనే విషయాన్ని మాత్రం అమర్ తెలుసుకోలేకపోతాడు. మరొక పక్క సంతానం (విజయ్ సేతుపతి) ఎన్నో వ్యాపారాలు నడుపుతూ ఉంటాడు. అసలు కర్ణన్ ఎవరు? కర్ణన్ కి తన కొడుకు అంటే నిజంగానే ఇష్టమా? కర్ణన్ చనిపోయాడా? బతికే ఉన్నాడా? ఈ విషయాలన్నీ తెలియాలి అంటే మీరు సినిమా చూడాల్సిందే.

రివ్యూ :

ఖైదీ, మాస్టర్ వంటి సినిమాలతో తెలుగు ఇండస్ట్రీలో కూడా పేరు సంపాదించుకున్న దర్శకుడు లోకేష్ కనకరాజ్. లోకేష్ కనకరాజ్ కమల్ హాసన్ లాంటి స్టార్ హీరోతో సినిమా చేస్తున్నారు అనగానే ఆసక్తి మొదలైంది. సాధారణంగా కమల్ హాసన్ సినిమా అంటే తెలుగులో కూడా విడుదల అవుతుంది. కానీ ఈ సినిమా మాత్రం కేవలం తెలుగు, తమిళ భాషల్లో మాత్రమే కాకుండా పాన్ ఇండియన్ సినిమాగా విడుదల అయ్యింది. కమల్ హాసన్ ని ఒక మంచి యాక్షన్ రోల్ లో చూసి చాలా సంవత్సరాలు అయ్యింది. గత కొద్ది సంవత్సరాలుగా కమల్ హాసన్ ప్రయోగాత్మక సినిమాలు చేస్తున్నారు. తనలో ఉన్న నటుడిని ప్రేక్షకుల ముందుకు తీసుకొస్తున్నారు. విక్రమ్ సినిమాతో కమల్ హాసన్ లోని యాక్షన్ హీరో మరొకసారి బయటికి వచ్చారు. ఫస్ట్ హాఫ్ మొత్తం కూడా అమర్ పాత్ర పోషించిన ఫహాద్ ఫాసిల్ పాత్రతోనే నడుస్తుంది.

సినిమా చాలా ఆసక్తికరంగా నడుస్తుంది. నెక్స్ట్ ఏమౌతుంది అని ప్రేక్షకులు చూస్తూ ఉంటారు. లోకేష్ కనకరాజ్ అంటే సాధారణంగా కార్తీ హీరోగా నటించిన ఖైదీ సినిమా గుర్తొస్తుంది. కానీ మధ్యలో మాస్టర్ సినిమాతో కమర్షియల్ సినిమా కూడా చేశారు. మళ్లీ విక్రమ్ సినిమాలో ఖైదీలో ఉన్నట్టుగానే చాలా ట్విస్ట్‌లు ఉంటాయి. సినిమా ఎండింగ్ కూడా అలాగే ఉంటుంది. సినిమా మొత్తం ఒక ఎత్తు అయితే, అనిరుధ్ అందించిన సంగీతం మరొక ఎత్తు. అలాగే సినిమాటోగ్రఫీ, యాక్షన్ సీన్స్ డిజైన్ చేసిన విధానం కూడా చాలా బాగుంది. సినిమా ఫస్ట్ హాఫ్ కొంచెం స్లోగా నడుస్తుంది. నిడివి ఇంకా కొంచెం తక్కువ ఉంటే బాగుంటుందేమో అనిపిస్తుంది.

ప్లస్ పాయింట్స్ :

• నటీనటులు
• యాక్షన్ సీన్స్
• మ్యూజిక్
• కొన్ని సీన్స్‌లో వచ్చే ట్విస్ట్‌లు
• సినిమాటోగ్రఫీ

మైనస్ పాయింట్స్:

• అక్కడక్కడా స్లోగా అనిపించే ఫస్ట్ హాఫ్
• సినిమా నిడివి

రేటింగ్ :

3/5

ట్యాగ్ లైన్ :

చాలా రోజుల తర్వాత ఒక మంచి యాక్షన్ సినిమా చూసిన ఫీల్ వస్తుంది. యాక్షన్ సినిమాలను ఇష్టపడే వారిని, అలాగే కమల్ హాసన్ ని చాలా సంవత్సరాల తర్వాత ఒక మంచి పవర్ ఫుల్ రోల్ లో చూడాలి అనుకునే వారిని విక్రమ్ అస్సలు నిరాశ పరచదు. ఈ మధ్య కాలంలో వచ్చిన మంచి స్టోరీ ఉన్న యాక్షన్ థ్రిల్లర్ సినిమాల్లో ఒకటిగా ఈ సినిమా నిలుస్తుంది.

• చిత్రం : మేజర్
• నటీనటులు : అడివి శేష్, సయీ మంజ్రేకర్, శోభితా ధూళిపాళ, రేవతి, ప్రకాష్ రాజ్.
• నిర్మాత : మహేష్ బాబు, శరత్ చంద్ర, అనురాగ్ రెడ్డి
• దర్శకత్వం : శశి కిరణ్ తిక్క
• సంగీతం : శ్రీ చరణ్ పాకాల
• విడుదల తేదీ : జూన్ 3, 2022

స్టోరీ :

26/11 సమయంలో 2008లో ముంబైలో జరిగిన దాడుల్లో ఎంతోమంది ప్రజలని కాపాడుతూ తన ప్రాణాలను పోగొట్టుకున్న సందీప్ ఉన్నికృష్ణన్ జీవితం ఆధారంగా ఈ సినిమా రూపొందింది. సందీప్ ఉన్నికృష్ణన్ (అడివి శేష్) చిన్నతనంలో ఎలా ఉండేవాడు అనే విషయాన్ని చూపిస్తూ సినిమా మొదలవుతుంది. అసలు సందీప్ ఎందుకు ఆర్మీ లో చేరాలి అనుకున్నాడు? సందీప్ కి, ఈషా (సయీ మంజ్రేకర్)కి పరిచయం ఎలా ఏర్పడింది? ట్రైనింగ్ ఆఫీసర్ గా చేసే సమయంలో సందీప్ ఎదుర్కొన్న పరిస్థితులు ఏంటి? ఇవన్నీ తెలియాలంటే మీరు సినిమా చూడాల్సిందే.

రివ్యూ :

ఈ సినిమా సందీప్ ఉన్నికృష్ణన్ జీవితం ఆధారంగా రూపొందించారు. సినిమా ప్రకటించినప్పటి నుంచి కూడా ఈ సినిమాపై ఆసక్తి పెరిగింది. ఈ సినిమా కేవలం తెలుగు, హిందీలో రూపొందించడం మాత్రమే కాకుండా మలయాళంలో కూడా విడుదల చేశారు. బయోపిక్ కి ముఖ్యంగా కావాల్సింది సినిమాలో నటించే నటీనటులు పాత్రలకు సరిపోవడం. ఈ సినిమా విషయంలో అదే జరిగింది. ఈ సినిమాలో ఆ పాత్ర పోషించిన ప్రతి నటులు ఆ పాత్రకి సరిగ్గా సరిపోయారు. అందులోనూ ముఖ్యంగా అడివి శేష్ అయితే చాలా చోట్ల సందీప్ ఉన్నికృష్ణన్ లాగానే కనిపించారు. ఇందుకోసం అడివి శేష్ చాలా కష్టపడ్డారు. ఆ కష్టం మొత్తం తెరమీద కనిపిస్తుంది. అడివి శేష్ తర్వాత సినిమాలో అంత హైలైట్ అయిన పాత్ర సందీప్ ఉన్నికృష్ణన్ తండ్రి పాత్రలో నటించిన ప్రకాష్ రాజ్ పాత్ర. సినిమా మొత్తం ప్రకాష్ రాజ్ పాత్ర ప్రేక్షకులకు చెప్తూ ఉంటారు. హీరోయిన్ గా నటించిన సయీ మంజ్రేకర్, అతిధి పాత్రలో నటించిన శోభితా ధూళిపాళ కూడా తమ పాత్రల పరిధి మేరకు బాగానే నటించారు.

సందీప్ ఉన్నికృష్ణన్ తల్లి పాత్రలో నటించిన రేవతి కూడా బాగా నటించారు కానీ కొద్ది సేపు మాత్రమే కనిపిస్తారు. ఒక ముఖ్య పాత్రలో నటించిన మురళీ శర్మ, అనీష్ కురువిల్లా, అతుల్ కులకర్ణి వంటి నటులు కూడా తమ పాత్రల్లో బాగా నటించారు. సినిమాకి ముఖ్య హైలైట్ మాత్రం శ్రీ చరణ్ పాకాల అందించిన బ్యాక్ గ్రౌండ్ మ్యూజిక్. తన బ్యాక్ గ్రౌండ్ మ్యూజిక్ తో సినిమాని మరొక లెవెల్ కి తీసుకెళ్లారు. అలాగే నిర్మాణ విలువలు కూడా చాలా రిచ్ గా ఉన్నాయి. దర్శకుడు శశి కిరణ్ తిక్క కూడా ఒక నిజ జీవితంలో జరిగిన సంఘటనని కళ్ళకి కట్టినట్టుగా ప్రేక్షకులకి చూపించడంలో చాలా వరకు సక్సెస్ అయ్యారు. సినిమా చూస్తున్నంత సేపు కూడా నిజజీవితంలో సందీప్ ఇలాంటి సమస్యలను ఎదుర్కొన్నారు ఏమో అని ప్రేక్షకులు అనుకుంటూ ఉంటారు. సినిమా చివరికి వచ్చేటప్పటికీ చాలా ఎమోషనల్ గా అనిపిస్తుంది.

ప్లస్ పాయింట్స్ :

• నటీనటుల పెర్ఫార్మెన్స్
• బ్యాక్ గ్రౌండ్ మ్యూజిక్
• నిర్మాణ విలువలు
• సినిమాటోగ్రఫీ

మైనస్ పాయింట్స్:

• కొంచెం స్లోగా సాగే ఫస్ట్ హాఫ్

రేటింగ్ :

3.5/5

ట్యాగ్ లైన్ :

ఎంతోమంది ప్రాణాలను కాపాడుతూ తన ప్రాణాన్ని పోగొట్టుకున్న, భారతదేశం గర్వించదగ్గ వారిలో ఒకరైన మేజర్ సందీప్ ఉన్నికృష్ణన్ కి ఈ సినిమా ఒక నివాళిగా నిలుస్తుంది.