ఇటీవల కేంద్ర ప్రభుత్వం ప్రకటించిన అగ్నిపథ్‌ పథకంకు వ్యతిరేకంగా దేశవ్యాప్తంగా నిరసనలు వ్యక్తం చేస్తున్న సంగతి తెలిసిందే. అయితే ఈ నేపథ్యంలోనే సికింద్రాబాద్ రైల్వే స్టేషన్‌లో అగ్నిపథ్‌ పథకానికి వ్యతిరేకంగా ఆందోళనలు చేపట్టారు ఆర్మీ అభ్యర్థులు. ఈ ఆందోళనలు తీవ్ర రూపం దాల్చుతుండడంతో ఆందోళన కారులను అదుపు చేసేందుకు పోలీసులు టీయర్‌ గ్యాస్ వదిలారు. అయినప్పటికీ ఆందోళనకారులు వినకపోవడంతో పోలీసులు కాల్పులు జరిపారు. ఈ కాల్పుల్లో ఆర్మీ అభ్యర్థి రాకేష్ మరణించాడు.
ఆందోళన కారులను కట్టడి చేసిన పోలీసులు.. సికింద్రాబాద్ రైల్వే స్టేషన్‌ను నాలుగు వైపుల నుంచి కమ్మేసి.. ఆర్మీ అభ్యర్థులను అరెస్ట్ చేశారు. అయితే అరెస్ట్ చేసిన ఆర్మీ అభ్యర్థులను చంచల్‌గూడ జైలు తరలించారు. ఈ క్రమంలో టీపీసీసీ అధ్యక్షుడు రేవంత్ రెడ్డి రేపు చంచల్ గూడ జైలుకు వెళ్లనున్నారు. సికింద్రాబాద్ రైల్వే స్టేషన్ పై దాడి కేసులో అరెస్టయిన యువకులతో ములాఖత్ అయ్యేందుకు రేవంత్ రెడ్డి జైలుకు వెళ్తున్నారు. ఈ సందర్భంగా వారి సమస్యలను అడిగి తెలుసుకోనున్నారు రేవంత్ రెడ్డి.
మరోవైపు అరెస్టయిన యువకుల కోసం న్యాయవాదులను నియమించినట్టు కాంగ్రెస్ నేతలు వెల్లడించారు. ఇదిలా ఉంటే.. ఈ ఆందోళనలో మృతి చెందిన ఆర్మీ అభ్యర్థి రాకేష్‌కు టీఆర్‌ఎస్‌ ప్రభుత్వం రూ.25లక్షల ఎక్స్‌గ్రేషియాతో పాటు రాకేష్ కుటుంబంలోని ఒక వ్యక్తికి ప్రభుత్వ ఉద్యోగాన్ని ప్రకటించింది. అంతేకాకుండా రాకేష్ అంతిమయాత్రలో టీఆర్‌ఎస్‌ నేతలు, మంత్రులు పాల్గొని నివాళులు అర్పించారు.
