Featured

టాలీవుడ్ లో డేరింగ్ అండ్ డాషింగ్, మాస్ డైరెక్టర్ గా పేరు తెచ్చుకున్నారు పూరీ జగన్నాథ్. ఎలాంటి హీరో అయినా పూరీ చేతిలో పడితే ఆటం బాంబ్ లా మారిపోతాడు. సిల్వర్ స్క్రీన్ పై డైరెక్టర్ పేరు పడితే విజిల్స్ పడేది ఒక్క పూరీ జగన్నాథ్ కి  మాత్రమే.

పూరీ సినిమాలో హీరో చెప్పే ఒక్కో డైలాగ్ ను యూత్ అంతా ఓన్ చేసుకొని మన గురించే రాసాడురా అని ఫీల్ అవుతారు. హీరోకి ఏ మాత్రం తగ్గని కట్ ఔట్ థియేటర్ల ముందు దర్శనిమిస్తాయి. పూరీ సినిమాల్లో హీరో, హీరోయిన్ మరియు విలన్ మాత్రమే కాకుండా అంతకు మించి పవర్ ఫుల్ కారెక్టర్ కూడా ఉంటాయి.

అయితే పూరీ జగన్నాథ్ సినిమాల్లో హీరోయిన్ కంటే హైలెట్ అయిన ఫీమేల్ పాత్రలను ఒకసారి చూద్దాం . .

#1. అమ్మా నాన్న ఓ తమిళమ్మాయి:

ఈ సినిమాలో జయసుధ పాత్ర హీరోయిన్ ఆసిన్ కంటే ఎక్కువ ప్రభావితం చేస్తుంది. రవితేజ తల్లిగా ఉన్న జయసుధ కారెక్టర్ చాలా పవర్ ఫుల్ గా ఉంటుంది.

#2. కెమెరామెన్ గంగతో రాంబాబు:

ఈ మూవీలో హీరోయిన్ తమన్నా అయినా గుండక్క కారెక్టర్ (పొలిటీషియన్) లో ఉన్న శృతి కనిపించే కాసేపు తన కామెడీతో అందరిని నవ్విస్తుంది. కొంతమంది రాయకీయ నాయకులు ఎలా ఉంటారో ఆ పాత్ర ప్రతిబింబిస్తుంది.

#3. గోలీమార్:

గోలీమార్ లో ప్రియమణి హీరోయిన్ అయినప్పటికీ ప్రియమణి తల్లిగా అరుంధతి పాత్రలో ఉన్న రోజా హైలెట్ అవుతుంది.

#4. దేశముదురు:

దేశముదురులో హీరోయిన్ హన్సిక కానీ శివానీ క్యారెక్టర్ లో నన్ గా ఉన్న కోవై సరళ కామెడీతో ఆకట్టుకుంటుంది.

#5. లోఫర్:

లోఫర్ లో దిశా పటాని కథానాయిక అయినప్పటికీ వరుణ్ తేజ్ తల్లి పాత్రలో ఉన్న రేవతి లక్ష్మమ్మగా ఆకట్టుకుంటుంది.

#6. లైగర్:

ఇక లైగర్ విషయానికి వస్తే.. సినిమా విడుదల కాకుండానే.. ట్రైలర్ లో “ఒక లయన్ కి, టైగర్ కి పుట్టిండాడు. క్రాస్ బ్రీడ్ సార్ నా బిడ్డ” అంటూ రమ్యకృష్ణ చెప్పే డైలాగ్ ఒక్కటి చాలు ఇందులో రమ్యకృష్ణ గారిది ఎంత ముఖ్యమైన పాత్రో అర్థం చేసుకోవడానికి.. ఈ విధంగా పూరీ జగన్నాథ్ సినిమాల్లో కొన్ని ఫీమేల్ క్యారెక్టర్స్ హీరోయిన్ కంటే ఎక్కువ హైలెట్ అయ్యాయి.

ఒక సినిమాకు నటీ నటులు, ప్రొడ్యూసర్ ఎంత ముఖ్యమైనప్పటికీ డైరెక్టర్ లేనిదే పని జరగదు. డైరెక్టర్ తన దృష్టి తో సినిమా చూసాకే కెమెరా ద్వారా ఆ సీన్లు వెండితెరకు పరిచయం అవుతాయి. కొన్ని సినిమాలు డైరెక్టర్ ఎంత కాన్ఫిడెన్స్ తో తీసినప్పటికీ బాక్సాఫీస్ వద్ద బోల్తా పడతాయి.

దీంతో అవకాశాలు తగ్గడమో, ఇంకో సినిమా కోసం కొంతకాలం ఎదురు చూసి పక్కా హిట్ అవసరం అయ్యే పరిస్థితికి చేరుకుంటారు. అలా ఇప్పుడు టాలీవుడ్ లో పక్కా హిట్ కొట్టాల్సిన డైరెక్టర్లు ఎవరో చూద్దాం..

#1. వి వి వినాయక్:

ఒకప్పుడు టాప్ డైరెక్టర్ గా ఉన్న వి వి వినాయక్ వరుస ఫ్లాప్ లతో హిట్ కోసం ఎదురు చూస్తున్నాడు. 2018 లో వచ్చిన ఇంటిల్లిజెంట్ అంతగా ఆకట్టుకోలేదు.

#2. కృష్ణవంశీ:

అప్పట్లో కల్ట్, క్లాసిక్ సినిమాలకు పెట్టింది పేరు కృష్ణ వంశీ. సింధూరం, గులాబీ, అంతఃపురం వంటి అద్భుత సినిమాలు తీసిన కృష్ణవంశీ నక్షత్రం, గోవిందుడు అందరివాడేలే వంటి ఫ్లాప్ లతో ఉన్న కృష్ణవంశీ రంగమార్తాండతో హిట్ కొట్టాలని చూస్తున్నాడు.

#3. పూరీ జగన్నాథ్:

డేరింగ్ అండ్ డాషింగ్ డైరెక్టర్ గా పేరు తెచ్చుకున్న పూరీ జగన్నాథ్ పైసా వసూల్, మహబూబా వంటి ఫ్లాప్ ల తర్వాత ఇస్మార్ట్ శంకర్ తో హిట్ అందుకున్నప్పటికీ అది ఆయన రేంజ్ హిట్ మాత్రం కాదు. లైగర్ తో బ్లాక్ బస్టర్ పై కన్నేశాడు పూరీ.

#4. చంద్రశేఖర్ యేలేటి:

ఐతే, అనుకోకుండా ఒకరోజు వంటి వైవిధ్యమైన చిత్రాలు తీసే చంద్రశేఖర్ యేలేటి. ఆ మధ్య వచ్చిన చెక్ సినిమా అంతగా ఆకట్టుకోలేదు. దీంతో వచ్చే సినిమాతో తప్పక హిట్ కొట్టాల్సిన పరిస్థితి నెలకొంది.

#5. మెహర్ రమేష్:

కంత్రి, షాడో, బిల్లా వంటి ఫ్లాప్ లతో ఉన్న మెహర్ రమేష్ తెలుగులో ఇప్పటి వరకు హిట్ సినిమా తీయలేదు. ప్రస్తుతం చిరంజీవితో తీస్తున్న భోళా శంకర్ తో హిట్ కొట్టాలని చూస్తున్నాడు మెహర్ రమేష్.

#6. కొరటాల శివ:

కమర్షియల్ సినిమాలకు కేరాఫ్ అడ్రస్ గా ఉన్న కొరటాల శివకు ఆచార్యతో గట్టి దెబ్బ తగిలిందని చెప్పవచ్చు. దీంతో ఎన్టీఆర్ 30తో కొరటాల మరో హిట్ తో సత్తా చాటాల్సి ఉంది.

#7. శ్రీకాంత్ అడ్డాల:

కొత్త బంగారు లోకం, సీతమ్మ వాకిట్లో సిరిమల్లెచెట్టు చెట్టు వంటి సినిమాలతో ఆకట్టుకున్న శ్రీకాంత్ అడ్డాల ఆ తర్వాత ముకుంద, బ్రహ్మోత్సవం వంటి వరుస ఫ్లాప్ లు తీసాడు. వెంకటేష్ తో నరప్ప తీసినప్పటికీ అది రీమేక్ పైగా ఓటీటీలో విడుదలైంది. తీయబోయే చిత్రం శ్రీకాంత్ అడ్డాల కీలకం.

#8. సురేందర్ రెడ్డి:

రేసు గుర్రం హిట్ తర్వాత ధ్రువ వచ్చినప్పటకీ అది రీమేక్ సినిమా. ఆ మధ్య వచ్చిన సైరా ఫ్లాప్ అవ్వడంతో అఖిల్ ఏజెంట్ తో హిట్ పై కన్నేశాడు సురేందర్.

#9. ఇంద్రఘంటి మోహన కృష్ణ:

సుధీర్ బాబు తో చేసిన ‘సమ్మోహనం’ ఒక మాదిరిగా ఆడినప్పటికీ ఆ తరువాత నానిని నెగటివ్ రోల్ లో చూపిస్తూ సుధీర్ బాబు తో చేసిన ‘వి’ అటు ఓటీటీ లోనూ ఇటు థియేటర్ లో కూడా దారుణమైన ప్లాప్ గా పేరు తెచ్చుకుంది. మళ్లీ ఇప్పడు సుధీర్ బాబుతో చేస్తున్న ‘ఆ అమ్మాయి గురించి మీకు చెప్పాలి’ సినిమా మీదే ఇంద్రగంటి ఆశలన్నీ పెట్టుకున్నాడు.

#10. గుణశేఖర్:

నిప్పు డిజాస్టర్ తర్వాత అనుష్కను పెట్టి అల్లు అర్జున్ తో ఒక ప్రత్యేక పాత్ర చేయించిన రుద్రమదేవి మంచి పేరు తీసుకొచ్చినప్పటికీ హిట్ టాక్ తెచ్చుకోలేకపోయింది. మళ్లీ చాలా రోజుల తర్వాత సమంత హీరోయిన్ గా శాకుంతలం సినిమా తీస్తున్నాడు గుణశేఖర్. మరి ఈ సినిమాతో అయినా హిట్టు కొడతాడేమో చూడాలి.

#11. మారుతీ:

ప్రతి రోజు పండగేతో హిట్ కొట్టిన తర్వాత మళ్లీ మంచి రోజులు వచ్చాయి, పక్కా కర్షియల్ సినిమాలు ఆశించిన కలెక్షన్లు రాలేదు. దీంతో నెక్స్ట్ మూవీతో హిట్ కొట్టాల్సి ఉంది.

#12. శ్రీను వైట్ల:

ఆనందం, వెంకీ, దూకుడు వంటి సక్సెస్ లు సినిమాలు తీసిన శ్రీను వైట్ల బ్రూస్ లీ, మిస్టర్, అమర్ అక్బర్ ఆంటోనీ వంటి వరుస డిజాస్టర్ లు ఉన్నాయి. ఇప్పుడు డబల్ డోస్ అనే సినిమా మంచు విష్ణు తో చేస్తున్నాడు ఇకనైనా హిట్ కొడతాడేమో చూడాలి.

#13. రామ్ గోపాల్ వర్మ:

శివ, సత్యం, గాయం వంటి సూపర్ హిట్ సినిమాలు తీసిన ఆర్జీవీ ఈ మధ్య హిట్ సినిమాలు ఏం తీయలేదు. అన్నీ వరుస డిజాస్టర్ సినిమాలే. ఆర్జీవీ మార్క్ సినిమాల కోసం ఫ్యాన్స్ ఎంతో కాలంగా ఎదురు చూస్తున్నారు.

సినిమా రంగం అనేది ఒక క్రియేటివ్ ఫీల్డ్. ఎంతమంది వారసులు వచ్చినా టాలెంట్ లేనిదే ఇక్కడ ఎవరూ  నిలదొక్కుకోలేరు. కులాలకు, మతాలకు, ప్రాంతాలకు అతీతమైంది సినిమా. అయితే కొన్ని దశాబ్దాలుగా సినిమా ఇండస్ట్రీని గోదావరి జిల్లాల నుంచి వచ్చిన వారే ఏలుతూ వచ్చారు. వాస్తవానికి ఒక ప్రాంతానికి, ఫిల్మ్ ఇండస్ట్రీకి ఎలాంటి సంబంధం లేనప్పటికీ కొన్ని ప్రత్యేక కారణాల వల్ల ఇక్కడ ఆ రెండు జిల్లాల (తూర్పు, పశ్చిమ గోదావరి) నుంచి వచ్చిన వారే పాతుకుపోయారు.

గోదావరి జిల్లాలకి దర్శకత్వానికి లింకేంటో చూద్దాం.. తెలుగు సినిమాల్లో ప్రస్తుతం టాప్ డైరెక్టర్ల లిస్టు చూస్తే, రాజమౌళి (పశ్చిమ గోదావరి నుంచి కర్ణాటక వెళ్లి స్థిరపడ్డారు), త్రివిక్రమ్, సుకుమార్, వినాయక్, శ్రీను వైట్ల.. ఇంకా చాలా మంది యువదర్శకులు గోదావరి జిల్లాల నుండి వచ్చినవాళ్ళే.

వీళ్ళ ముందు తరం అంటే, ఈవీవీ సత్యనారాయణ, ఎస్.వీ. కృష్ణారెడ్డిల టైంలో కూడా గోదావరి జిల్లాలదే హవా. ఇక దర్శకరత్న దాసరి, బాపు ఇలా ఇంకా ఎంతోమంది గోదావరి జిల్లాలలో పుట్టినవాళ్ళే. రెండు తెలుగు రాష్ట్రాల జిల్లాలు ఒక ఎత్తు, ఆ రెండు జిల్లాలు ఇంకో ఎత్తు..

సినిమారంగంలో ముఖ్యంగా రచన దర్శకత్వం విభాగాల్లో గోదావరి జిల్లాల ఆధిపత్యం ఉండడానికి ప్రధానంగా 6 కారణాలు ఉన్నాయి.
1. వ్యవసాయంలో మిగులు ఆదాయం :
గోదావరి జిల్లాల ప్రజలు దేవుడిలా కొలిచే సర్ ఆర్థర్ కాటన్, ధవళేశ్వరం ఆనకట్ట నిర్మించడం ద్వారా గోదావరి జిల్లాల రూపురేఖల్ని మార్చివేసారు. సాగునీటికి కొరత లేకపోవడంతో గోదావరి జిల్లాల రైతులు ఏడాదికి రెండు మూడు పంటలు పండిస్తూ ఆర్థికంగా మిగులు సాధించారు. ఎప్పుడైతే వ్యవసాయ రంగంలో మిగులు ఆదాయం వచ్చిందో అప్పుడు పిల్లల చదువులు, కళల మీద ప్రజలు దృష్టి పెట్టారు.
2. విద్యావ్యాప్తి:
మనదేశానికి స్వాతంత్య్రం రాకముందే గోదావరి జిల్లాలు వ్యవసాయం, విద్య, కళల విషయాల్లో అద్భుతమైన ప్రగతిని సాధించాయి. ఇప్పట్లోలా చదువంటే ఇంజనీరింగ్ ఒక్కటే కాదు కాబట్టి, విద్యార్థులు తెలుగు సాహిత్యం బాగా చదువుకునేవారు. గ్రంధాలయాలలో లభించే వందలాది పుస్తకాలు చదవడం వల్ల, ఆ జ్ఞానం గోదావరి జిల్లాల వారికి సినిమా రంగంలో మాటలు, పాటల రచయితలుగా, దర్శకులుగా ఎదగడానికి ఉపయోగపడింది.
3. మద్రాసుకి రైలు, రోడ్డు మార్గాలు:
1857 సిపాయిల తిరుగుబాటు తర్వాత, బ్రిటిష్ వాళ్ళు తమ సైన్యం కదలికల కోసం ఏర్పరచుకున్న కలకత్తా- మద్రాస్ గ్రాండ్ ట్రంక్ రోడ్, కలకత్తా- మద్రాస్ రైల్వే లైన్ వల్ల, గోదావరి జిల్లాలకే కాదు, మొత్తం కోస్తా ఆంధ్రకి మద్రాస్ దగ్గర అయింది. అప్పట్లో సినిమా ఇండస్ట్రీ అంతా మద్రాస్ లోనే ఉండేది. సినిమాలలో ఛాన్స్ కోసం ప్రయత్నించేవాళ్ళు రైలెక్కి మద్రాస్ లో దిగిపోయేవాళ్ళు. మద్రాస్ వెళ్ళడం అనేది ఈజీ కావడం కూడా గోదావరి జిల్లాలకి ప్లస్ అయింది.
4. షూటింగ్స్ ఎక్కువగా జరగడం:
అందమైన పల్లెటూళ్ళు, కొబ్బరి చెట్లు, కాలువలు, గోదావరి, సముద్రం, నర్సరీలు ఇవన్నీ సినిమా షూటింగ్ లకి గోదావరి జిల్లాలని కేరాఫ్ అడ్రస్ గా మార్చాయి. తమ కళ్ళెదురుగా సినిమా షూటింగ్ లు చూస్తున్న జనానికి సహజంగా సినిమాల మీద ఆసక్తి కలుగుతుంది. సినిమా వాళ్ళకి జనం లో ఉండే క్రేజ్ చూసినప్పుడు సినిమాల్లోకి వెళ్ళాలనే ఆసక్తి మరింత పెరుగుతుంది.
5. దాసరి అనే మహావృక్షం:
దర్శకరత్న దాసరి నారాయణ రావు గారిది ప.గో జిల్లా పాలకొల్లు. ఇండస్ట్రీలో అందరూ గురువు గారు అని పిలుచుకునే దాసరికి శిష్యులు ఎక్కువ. స్థానికంగా ఉండే పరిచయాల కారణంగా ఆయన శిష్యులలో ఎక్కువమంది గోదావరి జిల్లాల వాళ్ళే ఉన్నారు. సినిమా రంగం లో దాసరి అనే మహావృక్షం అనేక మంది సినిమా పక్షులకి గూడుగా ఉపయోగపడింది.
6. ఇండస్ట్రీలో పరిచయాలు:
సినిమా ఇండస్ట్రీ హైదరాబాద్ కి తరలి వచ్చాక, గోదావరి జిల్లాల నుంచి హైదరాబాద్ వచ్చేవారికి ఇండస్ట్రీలో అప్పటికే స్థిరపడిన గోదావరి జిల్లాల వారి రిఫరెన్స్ లు ఉపయోగపడ్డాయి. సినిమా ఇండస్ట్రీలో అప్పటికే వందలాది మంది ఈ జిల్లాల వారు విజయం సాధించడం వల్ల ఈ రంగంలో అవకాశాల కోసం ప్రయత్నించే వారికి, తమ కుటుంబం నుంచి కూడా సపోర్ట్ ఉండేది.
ఇప్పుడిప్పుడే కాస్త గోదావరి, కృష్ణ, గుంటూరు, ప్రకాశం కాకుండా ఇతర జిల్లాలనుంచి కూడా దర్శకులు వస్తున్నారు.

కొన్ని సినిమాల్లో కథ ఎంత బాగున్నా థియేటర్ లో ఆశించిన ఫలితాలు రావు. కామన్ ఆడియన్స్ ఎక్కువగా రొటీన్ సినిమాలనే ఇష్టపడతారు. దీంతో కొంచెం ప్రయోగాత్మకంగా, కొత్తగా కథ చెప్పాలి అనుకున్న డైరెక్టర్స్ కి నిరాశే ఎదురవుతుంది. దీంతో తెరపై కొత్తదనాన్ని చూడాలి అనుకునే సగటు మూవీ లవర్ కి నిరాశే మిగులుతుంది.

థియేటర్ లో కలెక్షన్స్ రానీ ప్రయోగాత్మక మరియు ఫీల్ గుడ్ మూవీస్ గా మిగిలిపోయిన కొన్ని సినిమాలను ఇప్పుడు చూద్దాం . .

#1. అంటే.. సుందరానికీ!:

డైరెక్టర్ వివేక్ ఆత్రేయ నుంచి వచ్చిన మంచి కామెడీ, ఫ్యామిలీ ఎంటర్టైన్మెంట్ మూవీ అంటే.. సుందరానికీ!. న్యాచురల్ స్టార్ నానీ, నజ్రియా కలిసి కథకు ప్రాణంపోసారు. ఈ చిత్ర నిర్మాతలు నష్టపోయిన ఉండొచ్చు కానీ ఓటీటీలో ప్రస్తుతం ట్రేండింగ్ లో ఉంది. ఓ కొత్త కథను తెలుగు ప్రేక్షకులకు అందించాడు వివేక్.

#2. విరాట పర్వం:
సాయి పల్లవి, రానా ప్రధాన పాత్రల్లో నటించిన చిత్రం విరాట పర్వం. దర్శకుడు వేణు ఊడుగుల ఈ రోజుల్లో అలాంటి నక్సల్ బ్యాక్గ్రౌండ్ కథను ఎంచుకోవడం ఒకరకంగా సాహసం అనే చెప్పొచ్చు. విప్లవంలో ప్రేమను మిక్స్ చేసి రొటీన్ కథకు భిన్నంగా ఈ చిత్రాన్ని నిర్మించారు.

#3. ఖలేజా:
ఒక సినిమా బ్లాక్ బస్టర్ అవ్వడానికి కావాల్సినవన్నీ ఖలేజా మూవీలో ఉన్నాయి. కానీ బాక్సాఫీస్ వద్ద డిజాస్టర్ గా నిలిచింది.
డైరెక్టర్ త్రివిక్రమ్, మహేష్ బాబు సినిమా కావడంతో అంచనాలు పెరగడం ఒక కారణం కావొచ్చు. ఇందులో మహేష్ బాబు యాక్టింగ్ సూపర్ ఉంటుంది.

#4. వేదం:
క్రిష్ కెరీర్‌లో వేదం ఒక బెస్ట్ ఫిల్మ్. కథ, నిర్మాణం, ఈ సినిమాలో చూపించిన ఫిలాసఫీ అన్ని ఆస్కార్ అవార్డ్ విన్నింగ్ స్థాయిని గుర్తుకు తెస్తాయి. ఇది కేవలం తెలుగు సినిమా అవ్వడం వలన ఇక్కడి ప్రేక్షకులు దాన్ని బ్లాక్ బస్టర్ చేయకపోవడంతో కలెక్షన్స్ లో సాధారణ సినిమాగా మిగిలిపోయింది కానీ ఇది టాలీవుడ్ ఓ మాస్టర్ పీస్.

#5. అ:
ఇదో సైకాలజికల్ థ్రిల్లర్. పాత్రల్లో కొత్తదనం కనిపించే స్క్రిప్ట్‌తో రూపొందిన కాన్సెప్ట్ చిత్రం అ!. ఒక్కపాత్ర జర్నీ ఒక్కో ఎపిసోడ్‌గా దర్శకుడు ప్రశాంత్ వర్మ తెరకెక్కించిన తీరు ప్రశంసనీయం. కాకపోతే సగటు ప్రేక్షకుడి ఊహకు అందని విధంగా ఉంటుంది. ఇది బాక్సాఫీస్ వద్ద బోల్తా కొట్టినా ప్రయోగాత్మక చిత్రాల్లో ముందుంటుంది.

#6. ఈ నగరానికి ఏమైంది?:
దర్శకుడు తరుణ్ భాస్కర్ సాధారణమైన స్టోరీ లైన్ ను తీసుకున్నా అందులో కొన్నాళ్ళ పాటు గుర్తుండిపోయే నాలుగు పాత్రల్ని రాసి, వాటి చుట్టూ సినిమాను నడపడానికి సరిపడే రీతిలో ఫన్నీ కథనాన్ని అల్లుకున్నారు. ఈ సినిమా యువతకు దగ్గరయ్యేదిగా ఉండగా రెగ్యులర్ యాక్షన్ సినిమాల్ని కోరుకునే వారిని, కుటుంబ ప్రేక్షకులను సంతృప్తిపరిచే కంటెంట్ ఇందులో లేదు. రెగ్యులర్ సినిమాలు చూసి విసుగెత్తే ఫ్రెండ్స్ గ్యాంగ్స్ కు ఈ చిత్రం మంచి రిలీఫ్.

#7. డియర్ కామ్రేడ్:
అప్ప‌టి వ‌ర‌కు చూసిన సినిమా కాకుండా మ‌రో కొత్త సినిమా చూపించాడు ద‌ర్శ‌కుడు భ‌ర‌త్ క‌మ్మ‌. హీరో ప్రేమ‌లో విఫ‌లం కాగానే బైక్ ఎక్కేసి ఇంటిని కూడా వ‌దిలేసి ఏళ్ల పాటు ట్రావెల్ చేయ‌డం అనేది మ‌న‌కు అల‌వాటు లేని క‌థ‌. ద‌ర్శ‌కుడిగా అనుకున్న క‌థ‌ను తెర‌కెక్కించాడు కానీ ఈ ప్ర‌యాణంలో క‌మ‌ర్షియ‌ల్ గా వ‌ర్క‌వుట్ అవుతుందా అనేది మాత్రం ప‌ట్టించుకోకుండా హానెస్ట్ గా క‌థ చెప్పే ప్ర‌య‌త్నం చేసాడు.

#8. జానీ:
జానీ సినిమాలో నటుడు, దర్శకుడు రెండూ పవన్ కళ్యాణ్‌ నే. ఇందులో మంచి ఫోటోగ్రఫీ, అద్భుతమైన విన్యాసాలు, విభిన్న స్థానికులు జానీ ప్రయాణంలో ప్రేక్షకులను థ్రిల్ చేస్తాయి. ఈ సినిమా బాక్సాఫీస్ వద్ద డిజాస్టర్ అయినప్పటికీ, సినిమా మేకింగ్ స్టైల్ అద్భుతంగా ఉంటుంది.

#9. 1: నేనొక్కడినే:

సుకుమార్ తీసిన అద్భుతమైన చిత్రం 1. నేనొక్కడినే. ఈ మూవీ హాలీవుడ్ రేంజ్ లో ఉంటుంది. ఈ సినిమా ఫలితంతో మహేష్ ప్రయోగాత్మక చిత్రాలకు దూరం అయ్యాడు అంటే అర్థం చేసుకోవచ్చు ఇక్కడి ప్రేక్షకులకు కొత్తదనాన్ని ఆహ్వానించలేరు అని. వారికి కావలసింది స్టార్ హీరో నుండి పక్కా కమర్షియల్ పైసా వసూల్ సినిమాలే కానీ ప్రయోగాలు కాదు.

#10. జగడం:
సిటీ ఆఫ్ గాడ్ లాంటి హాలీవుడ్ సినిమా ఇది. ఇది బ్లాక్‌బస్టర్ మరియు కల్ట్ ఫిల్మ్‌ కి ఉండే హంగులన్నీ ఉన్నాయి. ఇండియా మొత్తం మాట్లాడాల్సిన ఒక చిన్న కల్ట్ ఫిల్మ్ ఇది. అలా ఉంటుంది సుకుమార్ మేకింగ్ ఈ సినిమాలో. కానీ ఈ సినిమాను కూడా మన తెలుగు ప్రేక్షకులు ఫెయిల్ చేశారు.

#11. చక్రం:
కృష్ణవంశీ రూపొందించిన హార్ట్ టచింగ్ మూవీ చక్రం. సినిమాలో కామెడీ మరియు ఎమోషన్ రెండూ ఉంటాయి. ఇది హృదయాన్ని హత్తుకునే చిత్రం మరియు ప్రకాష్ రాజ్ ఇచ్చిన సందేశం ఏడ్పించేలా ఉంటుంది. కానీ కలెక్షన్స్ ఈ సినిమా వెనకపడిపోయింది.

#12. నా ఆటోగ్రాఫ్ స్వీట్ మెమోరీస్:
వాస్తవికతకు దగ్గరగా ఉండే కథలను ఇష్టపడే వారికి ఈ సినిమా బాగా నచ్చుతుంది. రవితేజ చేసిన బెస్ట్ అండ్ మీనింగ్ ఫుల్ సినిమా ఇది. కథ, స్క్రీన్‌ప్లే, దర్శకత్వం బాగుంటాయి. మంచి అనుభూతిని కలిగించే చిత్రం. ఇది నిజంగా బాల్యం మరియు కాలేజ్ లైఫ్ మెమోరీస్ ను రిఫ్రెష్ చేస్తుంది.

#13. జాను:
జాను సహజత్వం ఉట్టిపడేలా ఉంటుంది. ఒక సినిమా చూసిన ఫీల్ కాకుండా కొంతమంది మనుషులను, వాళ్ళ జీవితాల్లో జరిగిన సంఘటనలను పక్కనే ఉండి చూసిన అనుభూతి కలుగుతుంది. తమిళ్‌లో మోడరన్ క్లాసిక్ అని పేరు తెచ్చుకున్న 96 ని తెలుగులో ‘జాను’ పేరుతో రీమేక్ చేశారు దిల్ రాజు. కానీ ఇక్కడ ఫలితాలు మాత్రం నిరాశనే మిగిల్చాయి. ఇవే కాకుండా ఇలాంటి చిత్రాలు తెలుగులో అనేకం ఉన్నాయి. ప్రేక్షకుల ఆదరణ కరువయ్యి టాలీవుడ్ లో అలాంటి సినిమాలు తీయాలంటేనే హీరోలు, డైరెక్టర్లు ఆచితూచి వ్యవహారించే పరిస్థితి ఏర్పడింది.

మొన్నటి వరకు అపజయం ఎవరుగని స్టార్ డైరెక్టర్ గా కొనసాగాడు కొరటాల శివ. టాలీవుడ్ టాప్ హీరోలకు కెరీర్ బిగ్గెస్ట్ హిట్ అందించాడు కొరటాల. మొదట కొరటాల శివ పోసాని వద్ద అసిస్టెంట్ గా చేరి తన రచనతో ఆకట్టుకున్నారు. ఆ తరువాత సోలో రైటర్ గా చేశారు. “భద్ర, ఒక్కడున్నాడు, మున్నా, బృందావనం, సింహా, ఊసరవెల్లి” వంటి చిత్రాలకు రచనలో సహాకారం అందించారు.

అయితే సింహా టైం లో కొరటాల రావాల్సిన క్రెడిట్ రాకపోవడంతో సొంతంగా సినిమా ప్లాన్ చేసుకున్నాడు శివ.. అదే మిర్చి. యంగ్ రెబల్ స్టార్ ప్రభాస్ తో మిర్చి ప్లాన్ చేసాడు ఆ కథ విని ప్రభాస్ కూడా రాజమౌళిని ఒప్పించి మిర్చి పూర్తి చేసే బాహుబలి ప్రారంభించాడు. అలా ‘మిర్చి’తో కొరటాల శివ దర్శకునిగా టాలీవుడ్ కు పరిచయం అయ్యారు.

‘మిర్చి’ బ్లాక్ బాస్టర్ తో కొరటాల శివతో కలసి పనిచేసేందుకు టాలీవుడ్ టాప్ స్టార్స్ అంతా క్యూ కట్టారు. అలా రెండో సినిమాతోనే మహేశ్ లాంటి టాప్ స్టార్ తో పనిచేసే అవకాశం దక్కింది. మహేశ్ తో కొరటాల తెరకెక్కించిన ‘శ్రీమంతుడు’ కూడా ఘనవిజయం సాధించింది. ఆ తర్వాత యంగ్ టైగర్ ఎన్టీఆర్ తో కొరటాల శివ తెరకెక్కించిన ‘జనతా గ్యారేజ్’తోనూ మరో ఘనవిజయాన్ని తన ఖాతాలో వేసుకున్నాడు. అలా హ్యాట్రిక్ సక్సెస్ చూసిన కొరటాల నాల్గవ చిత్రంగా మళ్లీ మహేష్ తో ‘భరత్ అనే నేను’ చిత్రాన్ని తెరకెక్కించారు.

వరుసగా నాలుగు విజయాలు సొంతం చేసుకున్న కొరటాలకు ఐదో చిత్రంతో మెగాస్టార్ చిరంజీవిని ‘ఆచార్య’గా మలిచే అవకాశం వచ్చింది. ఈ చిత్రంలో చిరంజీవితో పాటు ఆయన తనయుడు రామ్ చరణ్ కలసి నటించినా, బాక్సాఫీస్ ఫలితం నిరాశ కలిగించింది. నాలుగు భారీ విజయాల తరువాత కొరటాల శివకు ‘ఆచార్య’ అసంతృప్తి మిగిల్చింది. జయాపజయాలు ఎవరికైనా తప్పవు. కానీ టాప్ హీరోలకు కెరీర్ బిగ్గెస్ట్ హిట్స్ ఇచ్చిన ఒక స్టార్ డైరెక్టర్ ఒక్క ఫ్లాప్ సినిమా తీయగానే అందరూ అతన్ని టార్గెట్ చేసి విమర్శించడం ప్రారంభించారు. కథ, డైరెక్షన్ పక్కన పెట్టి బిసినెస్ పై దృష్టి పెట్టాడు అంటూ కామెంట్ చేస్తున్నారు.

ఎంతో కాలంగా హిట్లు లేని ప్రభాస్, జూనియర్, మహేష్ లకు సూపర్ హిట్లు ఇచ్చిన శివ.. మెగాస్టార్ ఆచార్యతో కొత్తగా నిరూపించుకోవాల్సిన అవసరం లేదు. నిజానికి ఈ సినిమా ఫ్లాప్ తో మెగాస్టార్ కు వచ్చే నష్టం ఏం లేదు. ఎందుకంటే మెగాస్టార్ చూడని హిట్లంటూ ఏం లేవు. అలాగే శివ కూడా ఇప్పటి వరకూ ఫ్లాప్ ఎరుగని డైరెక్టర్ గానే ఉన్నాడు. కానీ ఒక్క సినిమాలో అతని అంచనాలు తారుమారు అయ్యాయి అది సహజం కూడా కానీ ఈ సినిమాతో మాకు నష్టం వచ్చిందని డిస్ట్రిబ్యూటర్స్ ఆఫీస్ కు వచ్చి పరువు తీయడం సరైన పద్ధతి కాదు. ఒకవేళ ఆచార్య కూడా సూపర్ హిట్ అయితే మాత్రం వాళ్ళు లాభాలు వచ్చాయని ఆఫీస్ కి వచ్చి షేర్ ఇచ్చే వారా.. మరి నష్టలొస్తే ఇలా ప్రవర్తించడం ఏంటీ..!?

బిజినెస్ అన్నాక లాభాలూ, నష్టాలు రెండూ ఉంటాయి. దానికి ఒక డైరెక్టర్ ని బ్లేమ్ చేయడం కరెక్ట్ కాదు. ఇప్పుడు ఆచార్య సమస్యలు వీడితే కానీ కొరటాల ప్రశాంతగా ఇంకో సినిమా తీయలేడు. ప్రస్తుతం ఎన్టీఆర్ హీరోగా కొరటాల శివ ఓ చిత్రం చేయనున్నాడు. ‘జనతా గ్యారేజ్’ లాగా ఈ సినిమాను కూడా సక్సెస్ బాటలో పయనింపజేస్తే కొరటాల శివ మరోమారు తన సత్తా చాటుకున్నట్టవుతుంది.