Mythology

మన ఇంట్లో బల్లులు సంచరించడం చూస్తే మనలో చాలా మందికి ఒళ్ళు గగుర్పొడుస్తుంది. చాలా మందికి బల్లి పట్ల ఎంతో కొంత భయం ఉండనే ఉంటుంది. మరికొందరైతే.. బల్లి గదిలో ఉంటె.. ఆ గదిలోకి వెళ్ళడానికి కూడా ఇష్టపడరు. బల్లి ఎటువంటి హాని చేయదు అని తెలిసినప్పటికీ.. బల్లిని చూడగానే ఒకరకమైన భీతికి గురి అవుతూ ఉంటారు.

దానికి కారణం ఏంటంటే.. బల్లి శరీరంపై పడితే భవిష్యత్ జరగబోయే దానికి సంకేతం అని కొందరు విశ్వసిస్తూ ఉంటారు. నిజానికి హిందూ సంప్రదాయాల ప్రకారం, మీపై ఎక్కడైనా బల్లి పడితే అది సానుకూల సంకేతంగా పరిగణించబడుతుంది.

ఈ బల్లులు ఏ అవయవంపై పడితే ఏమి జరుగుతుంది? అనే విషయాలను చెప్పే శాస్త్రాన్ని బల్లి శాస్త్రం అంటారు. మీ కుడి చేతిపై బల్లి పడితే.. మీరు బాగా ఎదిగి సమాజంలో గౌరవ ప్రఖ్యాతలు సంపాదించుకుంటారని అర్ధమట. మీ ఎడమ చేతిపై బల్లి పడిపోతే మీరు డబ్బును కోల్పోతారని అర్ధం వస్తుందట. బల్లి పురుషుడి శరీరంలో కుడి వైపున మరియు స్త్రీ శరీరంలో ఎడమ వైపున పడితే అది అదృష్టానికి సంకేతంగా భావించాలని బల్లి శాస్త్రం చెబుతోంది.

ఉత్తరాన మీ తలపై బల్లి పడితే, అది మీకు అదృష్టాన్ని తెస్తుంది. బల్లి తలపై పడినప్పుడు, వ్యక్తి సంపద, రాజసం పెరిగి విలాసవంతమైన జీవితాన్ని అనుభవిస్తాడని అర్ధమట. ఇక బాగా డబ్బు ఉన్న వ్యక్తి తలపై పడితే.. అతని సంపద హరించిపోతూ ఉంటుందని నమ్ముతారు. ఏవైనా రెండు బల్లులు సంభోగం చెందుతుండగా మీరు చూసినట్లయితే.. మీ పాత స్నేహితుడిని మీరు తిరిగి కలుస్తారని అర్ధం వస్తుందట. ఒకవేళ బల్లులు గొడవపడడాన్ని చూస్తే.. మీరు కూడా ఎవరితో అయిన వాదన పెట్టుకోవాల్సి వస్తుందని అర్ధమట. కొంతమంది తమ కొత్త ఇంటిలో బల్లిని చూడటం లక్ష్మీ దేవి ఇంట్లోకి ప్రవేశించినట్లుగా భావిస్తుంటారు. ఇందులో అన్ని నిజం కాకపోవచ్చు.. కానీ చాలా మంది చాలా కాలంగా వీటిని నమ్ముతూ వస్తున్నారు.

చాణుక్యుడు ఎంతటి మహాజ్ఞానో మనందరికీ తెలిసిందే. ఆయన చెప్పిన నీతి సూత్రాలు, ఆర్థిక సూత్రాలు నేటికీ ఎంతో ఆచరణీయమైనవి. ఆయన రచించిన అర్థశాస్త్రంలో ఎంతో జ్ఞానం మిళితమై ఉంది.

ఈయన రచయితగా, సలహాదారునిగా ఎనలేని ఖ్యాతి గడించారు. ఈయన చెప్పిన నీతి వాక్యాలు నేటికీ చిరస్మరణీయాలు. వాటిని తరువాతి తరానికి కూడా అందచేసి.. మంచి భవిష్యత్ ను రూపొందించుకునేలా తోడ్పడాలి. చాణిక్య నీతి ఎన్నో ముఖ్యమైన విషయాలు చెబుతోంది.

మనిషి జీవితంలో సక్సెస్ అవ్వాలంటే ఓ మూడు విషయాలకు దూరంగా ఉండాలని చాణుక్యుడు చెబుతున్నాడు. అవేంటో ఇప్పుడు చూద్దాం.
# వ్యసనం: జీవితంలో పైకి ఎదగాలంటే ప్రతి మనిషి వ్యసనాలకు దూరంగా ఉండాలి. వ్యసనాలు మనలను మానసికంగానూ శారీరకంగానూ బలహీనం చేస్తాయి.

# చెడు సావాసాలు: యవ్వనం మనిషి ఎదగడానికి ఎంతగానో దోహదం చేసే సమయం. ఆ సమయంలో చెడు సావాసాలు ఏర్పరుచుకోవడం అస్సలు మంచిది కాదు. చెడు సావాసాలు వల్లే వ్యసనాలు అలవాటు అవుతాయి. డబ్బు, సమయం వృధా అవుతుంది. అందుకే మంచి స్నేహితులు ఉండాలని పెద్దలు చెబుతుంటారు. మంచిని రూపాయి ఇచ్చి అయినా తెచ్చుకోవాలని, చెడుని రూపాయి ఇచ్చి అయినా వదిలించుకోవాలని చాణుక్యుడు చెబుతున్నారు.

# సోమరితనం: ఎంత మంచి ప్రతిభ ఉన్న వారికయినా సోమరితనం ఒక శాపం. దానివల్ల చాలా ఇబ్బందులు ఎదుర్కోవాల్సి వస్తుంది. ముఖ్యంగా యుక్త వయసులో ఉన్న వారు సోమరితనాన్ని ఎంత త్వరగా వదిలించుకుంటే అంత మంచిది.

ఈ మూడు విషయాలలోనూ దూరం గా ఉండి తన జీవిత లక్ష్యాలకు మార్గం సుగమం చేసుకునే వ్యక్తి తన జీవితంలో తొందరగా సక్సెస్ అవుతాడు. మనం మంచిగా ఉండాలంటే.. మన స్నేహితులను ఎంచుకునే విషయంలో చాలా జాగ్రత్త తీసుకోవాలి. ఎందుకంటే వారి ప్రభావం మనపై చాలా ఉంటుంది కాబట్టి.

ఎన్నో సంవత్సరాల నుండి భారతీయులు అనుసరించే వాటిలో చాణిక్య నీతి ఒకటి. ఒక మనిషి జీవితానికి సంబంధించి ఎన్నో పాఠాలను చాణిక్యుడు అప్పుడే చెప్పారు. ఇప్పుడు అవే ఎంతోమంది పాటిస్తున్నారు. అయితే చాణిక్య నీతి కొన్ని వేల సంవత్సరాల క్రితం రాసిన ది. అందులో రాసిన చాలా విషయాలు కూడా ఆ కాలానికి తగ్గట్టుగా ఉంటాయి. కొన్ని ఈ కాలం వాళ్ళు అనుసరించే పద్ధతులు లాగా అనిపించవు.

కానీ చాణిక్య నీతిని చాలా మంది అనుసరిస్తారు. అందుకు కారణం ఏంటి అనే విషయాన్ని కోరాలో ఒక వ్యక్తి పోస్ట్ చేశారు. ఆ ప్రశ్నకి శ్రేయాన్ష్ గౌతమ్ అనే ఒక కోరా యూజర్ వ్యక్తి ఈ విధంగా సమాధానం ఇచ్చారు.

ఈ విషయంపై ఆయన మాట్లాడుతూ ఈ విధంగా రాశారు. “నేను నా జీవితంలో చాణిక్య నీతిని అనుసరించేవారిని, అలాగే అందులో రాసిన వాటిని గౌరవించే వారిని చాలా మందిని చూశాను. కానీ నేను మాత్రం వాటికి అంగీకరించను. ఇందుకు కారణం ఏంటంటే ఆ పుస్తకాలు 2300 సంవత్సరాల క్రితం రాసినవి. ఇన్ని సంవత్సరాలలో టెక్నాలజీ పెరగడం వల్ల అలాగే ఎలక్ట్రానిక్ మీడియాలో కూడా చాలా మార్పులు రావడం వల్ల మనిషి లైఫ్ స్టైల్ అనేది చాలా మారింది. అందుకే అందులో రాసినవి కొన్ని అర్థం లేనట్టుగా అనిపిస్తాయి. రాజులు, రాజ్యాలు ఉన్నప్పుడు ఈ పుస్తకం రాశారు. అందుకే ఆ సలహాలు ఇప్పుడు పనికొచ్చే విధంగా అనిపించవు. ఇప్పటి కాలానికి తగ్గట్టుగా అనిపించవు. ఇందులో రాసిన కొన్ని విషయాలు బాగుంటాయి. కానీ అలాంటి సలహాలు సాధారణంగా ఎవరైనా ఇవ్వగలరు.”

అదేవిధంగా చాణక్య నీతి ఇప్పటికి కూడా ఎందుకు అనుసరిస్తారు అనే విషయంపై మాట్లాడుతూ ఈ విధంగా చెప్పారు. “మన భారత దేశ ప్రజలు మన సాంప్రదాయం, సంస్కృతికి చాలా గౌరవం ఇస్తారు మన భారతదేశంలో ఉన్నంత జ్ఞానం వేరే ఎక్కడా ఉండదు అని అంటూ ఉంటారు. చాలావరకు అది నిజమే. చాణిక్య నీతి అనేది భారతదేశ సంస్కృతిలో రూపొందించబడిన గొప్ప పుస్తకాల్లో ఒకటి. ఇలాంటి పుస్తకాన్ని ఆదరిస్తే మన భారతదేశానికి గర్వించదగ్గ విషయం అవుతుంది. అలాగే ఇంత గొప్ప పని చేసిన వారికి విలువ ఇవ్వడం కూడా అవుతుంది” అని రాశారు. అందుకే చాణిక్య నీతిని అందులో రాసిన చాలా విషయాలని చాలామంది పాటిస్తారు.

sourced from : Quora (Shreyansh Gautam)

ఇల్లు కట్టాం అంటే.. వాస్తు ప్రకారం ఎన్నో లెక్కలు వేసుకోవాల్సి ఉంటుంది. ఏ గది ఎక్కడ ఉండాలి.. ఏ వస్తువుని ఎక్కడ పెట్టాలి అన్న విషయంలో కూడా శ్రద్ధ తీసుకుని పెట్టుకోవాలి. లేదంటే ఇంట్లో ఇబ్బందులు ఎదురవుతూ ఉండడం.. ఎక్కువగా డబ్బు ఖర్చు అయిపోవడం, అప్పులు చేయాల్సి రావడం వంటివి జరుగుతూ ఉంటాయి.

సాధారణంగా ఇంటిలో వంటగదికి ప్రత్యేకంగా వాస్తు ఉంటుంది. అలాగే.. ఆ గదిలో పెట్టె వస్తువుల విషయంలో కూడా శ్రద్ధ వహించాల్సి ఉంటుంది. ఇక వంట ఇంట్లో బియ్యం పెట్టడానికి కూడా ఓ వాస్తు నియమం ఉంది.

అన్నం పరబ్రహ్మ స్వరూపం. మనిషి ఏమి లేకపోయినా ఎలాగోలా బతుకుతాడు.. కానీ తినడానికి తిండి లేకపోతే బతకడమే కష్టం అవుతుంది. అందుకే బియ్యానికి అంత ప్రాధాన్యత ఉంది. వీటిని సరైన ప్లేస్ లో పెడితే.. ఇంట్లో అన్నపానాదులకు కొరత లేకుండా ఉంటుంది. చాలా మంది బియ్యం డ్రమ్ము లేదా బియ్యం సంచిని నైరుతి మూలన పెడుతూ ఉంటారు. నైరుతి మూలన బరువు ఉంచాలి అన్న ఉద్దేశ్యంతోనే ఇలా చేస్తుంటారు.

దీని వలన లేని సమస్యల్ని కొని తెచ్చుకుంటారు. నైరుతి మూలన బరువు పెట్టాలి.. కానీ రోజూ తీసేవాటిని కాకుండా.. స్థిరంగా కదలకుండా ఉంచేవాటిని పెట్టాలి. కానీ బియ్యం మనం ప్రతిరోజు తీస్తూనే ఉంటాం. ఇలా అక్కడ బియ్యం పెట్టడం వలన ఇంటి యజమానికి అనారోగ్యం రావడం, భార్యాభర్తల మధ్య గొడవలు రావడం వంటివి జరుగుతాయి. బియ్యాన్ని ఇంట్లో ఆగ్నేయ దిశలో ఉంచుకోవాలి. ఇలా పెట్టడం వలన ఆ ఇల్లు ధనధాన్యాలతో తులతూగుతుంది. గ్రహాలు అనుకూలించకపోయినా.. బియ్యాన్ని ఆగ్నేయ దిశలోనే పెట్టాలి. అప్పుడే కలిసి వస్తుంది.

భక్త సులభుడైన భోళా శంకరుడికి భారత్ లో భక్తులకు కొదవలేదు. లింగ రూపంలో పూజలు అభిషేకాలు అందుకునే శివయ్యకు భారత్ లోనే కాదు.. ప్రపంచ వ్యాప్తంగా హిందువులు భక్తులే. శివుడు భక్త సులభుడు, అభిషేక ప్రియుడు అన్న సంగతి తెలిసిందే. ఒక చెంబుడు నీటిని పోసి.. మనస్ఫూర్తిగా నమస్కరిస్తే ఆయన కరుణించేస్తాడు.

అయితే శివుడికి అభిషేకం చేసేటప్పుడు చాలా మందికి పద్ధతులు తెలియక ఇష్టం వచ్చినట్లు అనుసరిస్తూ ఉంటారు. కానీ నిజానికి ఎవరికి నచ్చినట్టు వాళ్ళు చేయకుండా శాస్త్రం ప్రకారం అనుసరించడం మంచిది.

ఇంకా ఇంట్లో ఉండే శివలింగం బొటన వేలు కంటే ఎక్కువ ఎత్తు ఉండకూడదు. అలా ఉంటే ఇంట్లో అనర్ధాలే. శివలింగానికి పసుపుని సమర్పించకండి. నిజానికి శివ లింగానికి నిత్యం గంధంతో అలంకరిస్తుంటారు. పసుపుని శివలింగం పై వేస్తుంటే శివుని ఆగ్రహానికి గురవుతారట. అలాగే శివలింగం బంగారం కానీ, వెండి కానీ, ఇత్తడి లేదా క్రిస్టల్ అయి ఉండాలట.

గాజు శివలింగాలను ఇంట్లో ఉంచకండి. అలాగే శివలింగాన్ని పూజించే సమయంలో తులసి ఆకులను ఎప్పటికీ సమర్పించవద్దు. శివుడికి బిల్వ పత్రాలు, మారేడు దళాలు అంటే ఇష్టం. అందుకే వీటినే సమర్పించండి. తెలియక పొరపాటున చేసినా.. ఇక నుంచి శివుడిని ఆరాధించేటప్పుడు భక్తి శ్రద్దలతో ఆరాధించండి.

పుట్టిన వారు మరణించక తప్పదని భగవద్గీత ద్వారా శ్రీ కృష్ణుడు ఎప్పుడో బోధించాడు. అయితే, మన నుంచి ప్రాణాన్ని వేరు చేసేది మాత్రం యమ ధర్మరాజు అన్న సంగతి మనకు తెలిసిందే. మనలో చాలా మందికి ఆయన పట్ల భయము, భీతి ఉంటుంది.

ఆయన మన ప్రాణాలను తీసుకెళ్ళిపోతాడన్న భావన కలిగి ఉంటాము. కానీ.. ఇది సృష్టిధర్మం లోని భాగం మాత్రమే. యమధర్మరాజు కూడా మన ప్రాణాలను తీసుకెళ్లే ముందు మనకు నాలుగు సంకేతాలను పంపుతారట. అవేంటో..మనం చూద్దాం..

ఆ సంకేతాలను తెలియచెప్పే కథ ఒకటి ఉంది. యమునా నదీ తీరం లో అమృతుడు అనే వ్యక్తి నివసిస్తూ ఉండేవాడట. అతనికి ఎపుడు చూసినా తాను చనిపోతానేమో అని.. ఎపుడు చనిపోతానో అని ఒక దిగులు గా ఉండేదట. ఈ విషయం లో దిగులు పోగొట్టుకోవడం కోసం యమ ధర్మ రాజుని ఉద్దేశించి తపస్సు చేసాడట. అతని తపస్సుకి మెచ్చి యమధర్మ రాజు ప్రత్యక్షం అయి ఏమి వరం కావాలో కోరుకోమన్నాడట. అయితే, ఆ వ్యక్తి తనకి మరణం ఎప్పుడు వస్తుందో ముందుగానే తెలియచేయమన్నాడట. ఆ విషయం ముందే తెలిస్తే తన బాధ్యతలన్నీ మరొకరికి అప్ప చెప్పేయాలనేది అతని ఆలోచన.

అయితే, యమధర్మ రాజు మరణం ఎప్పుడు వస్తుందో చెప్పలేనని, అయితే అందుకు గుర్తు గా కొన్ని సంకేతాలను మాత్రం పంపగలనని తెలిపాడట. వాటిని బట్టి మరణం వచ్చే విషయం తెలుసుకోవాలని యమధర్మరాజు సూచించారు. ఆ తరువాత ఈ విషయాన్నీ అమృతుడు మర్చిపోతాడు. పెళ్లి చేసుకోవడం, పిల్లలని కనడం, వారికి కూడా పెళ్లిళ్లు అవ్వడం కాలక్రమం లో జరిగిపోతుంటుంది. అయితే, ఓ రోజు అమృతుడికి యమధర్మరాజు తో జరిగిన సంభాషణ గుర్తుకు వస్తుంది.

కానీ, ఆయన చెప్పిన సూచనలు ఏవి కనిపించకపోవడం తో తనకు ఇంకా ఆయువు ఉందని అమృతుడు అనుకుంటాడు. కాలక్రమం లో అతని చర్మం ముడతలు పడుతుంది, వెంట్రుకలు తెల్లబడతాయి. పళ్ళు కూడా ఊడిపోతాయి. పక్షవాతం సోకి మంచానికే పరిమితం అవుతాడు. ఓ రోజున యమధర్మరాజు అతని ప్రాణాలు తీసుకుని పోవడానికి వస్తాడు. అయితే, అమృతుడు ఆశ్చర్యం తో నాకు సూచనలు చేస్తానని మాటిచ్చావు. కానీ, ఎలాంటి సూచనలు ఇవ్వకుండా తీసుకెళ్ళిపోతున్నావు. నువ్వు నాకిచ్చిన వరం మాటేమిటి? అని అడుగుతాడు.

నేను నీకు నాలుగు సార్లు సూచనలు చేసినప్పటికీ, నువ్వు గ్రహించలేదు అని చెబుతాడు. ఆ సూచనలేమిటని అమృతుడు యముడిని అడగ్గా, వెంట్రుకలు తెల్లబడడం, చర్మం ముడుచుకోవడం, పళ్ళు ఊడిపోవడం, పక్షవాతం వంటి అనారోగ్యాలను తానూ పంపిన సూచనలు గా యముడు వివరిస్తాడు. అప్పుడు అమృతుడుకి కి విషయం అర్ధం అవుతుంది. అమృతుడు నిజాన్ని ఒప్పుకున్నతరువాత యమధర్మరాజు అతని ప్రాణాలను తీసుకెళ్ళిపోతాడు.

చాణక్యుడు మన జీవితంలో జరిగే ఎన్నో విషయాల గురించి ప్రస్తావించారు. ఏ సందర్భంలో ఎలా ఉండాలి..?, గెలుపు ఎలా వస్తుంది..?, ఎటువంటి వ్యక్తులతో స్నేహం చేయాలి..? ఇలా చాలా విషయాలని చాణక్యుడు చెప్పడం జరిగింది. ఆయన అనుభవంతో చెప్పిన విషయాలను ఈ తరం వాళ్లు అనుసరిస్తే తప్పకుండా సక్సెస్ అవుతారు.

కేవలం పెద్ద వాళ్ళకి మాత్రమే కాకుండా పిల్లలకి కూడా ఆయన ఎన్నో విషయాలను తన నీతి శాస్త్రం ద్వారా తెలిపారు. వీటిని కనుక అనుసరిస్తే ఓటమి రానేరాదు. అయితే జీవితంలో ఓటమి ఎదుర్కోకుండా ఉండాలంటే వ్యక్తిలో ఈ నాలుగు అలవాట్లు ఉండకూడదని ఆచార్య చాణక్యుడు చెప్పారు. అయితే మరి ఆ అలవాట్లు ఏంటో చూద్దాం.

#1. సమయం వృధా చెయ్యద్దు:

సమయం ఒక సారి గడిచిపోతే మళ్లీ అది తిరిగి రాదు. ఈ విషయం అందరికీ తెలుసు కానీ అనుసరించరు. సమయపాలన లేదు అంటే కచ్చితంగా విఫలం అవుతారు. ఓటమిని ఎదుర్కోవడం తధ్యం. కనుక సమయానికి విలువ ఇచ్చి సరిగ్గా సమయాన్ని ప్లాన్ చేసుకుంటే ఎవరైనా సరే సులభంగా గెలవచ్చు.

#2. నెగిటివ్ ఆలోచనలు ఉండకూడదు:

నెగిటివ్ ఆలోచన ఉంది అంటే అస్సలు ముందుకు వెళ్ళలేరు. ఎప్పుడూ కూడా పాజిటివ్ గా ఆలోచించి ముందుకు వెళ్లి పోవాలి. పాజిటివ్ గా ఆలోచిస్తే ఎంతటి సమస్యను అయినా దాటేయచ్చు.

#3. అహంకారం వద్దు:

అహంకారం ఉంది అంటే జీవితంలో ముందుకు వెళ్ళడం కష్టం. ఎప్పుడూ కూడా జీవితంలో ఒదిగి ఉండాలి. అహంకారంతో నేనే గొప్ప అనుకుంటూ వెళితే విలువ కూడా ఉండదు.

#4. కోపం పనికిరాదు:

కోపం ఉంటే కూడా ఓడిపోతూ ఉంటారు. కోపం వల్ల జీవితంలో ఎన్నో సమస్యలు వస్తాయి. పైగా కోపం ఉంటే ఎవరూ ఇష్టపడరు కూడా. కాబట్టి ఈ నాలుగింటిని విడిచిపెడితే విజయం అందుకోవచ్చు.

భారత్ దేశంలో దాదాపు ప్రతి ఇంటికి ముందు గడప ఉంటుంది. ఎవరైనా లోపలకి రావాలంటే.. లోపలి నుంచి బయటకు వెళ్ళ్లాలంటే గడపని దాటుకుంటూనే రావాలి. తరాలు మారుతున్నా ఇంటి గడప ఉండడం మాత్రం మారదు. హిందువులు గడపను పెట్టుకొనే విషయంలో ఎన్నో నమ్మకాలను కలిగి ఉంటారు.

ఇంట్లో ఉన్న ప్రతి గదికి మధ్య ఉన్న తేడాను తెలిపేదే గడప. గడప ద్వారానే వంట గదికి, పూజ గదికి, పడక గదికి తేడా తెలుస్తూ ఉంటుంది. గడపను దాటేటప్పుడు ఇంట్లో అయినా, దేవాలయాల్లో అయినా దానిని తొక్కకూడదు అని చెబుతూ ఉంటారు.

అయితే.. ఇంట్లో ఉండే గడపను అయినా చాలా పవిత్రంగా చూసుకోవాలి. ఎందుకంటే గడప గౌరీ దేవి స్వరూపం. గడపని పూజించే విధంగా గడప గౌరీ దేవి నోముల గురించి కూడా పెద్దలు ముందే చెప్పారు. మరోవైపు గడపను శుభ్రంగా ఉంచుకోవాలి అని చెప్పడం కూడా ఈ నోముల ఉద్దేశ్యం. గడపను శుభ్రంగా ఉంచుకున్న వారి ఇళ్ళని లక్ష్మీదేవి కటాక్షిస్తుందట. వారి ఇళ్ళని ఎప్పుడూ వీడకుండా ఉంటుందట.

ఇంటి ముఖద్వారాన్ని పరిశుభ్రంగా ఉంచుకోవడంతో పాటు తోరణాలతో అలంకరించి కళగా ఉంచుకోవాలి. గుమ్మాన్ని శుభ్రంగా తుడిచి పసుపు కుంకుమలతో అలంకరించాలి. గడప లో చీలికలు, నరుకులు లాంటివి వస్తే గడపను మార్పించుకోవాలి. గడప ముందే చెప్పులు విడవకూడదు. గడపకు దూరంగా ఉండాలి. ఇంట్లోకి వచ్చేటప్పుడు మనలో ఉన్న నెగటివ్ ఎనర్జీ గడపని చేరుతుంది. అందుకే గడపకు ధూపం వేయడం ద్వారా నెగటివ్ ఎనర్జీని బయటకు పంపాలి.

చీపురు, చేటలు వంటి వాటిని తలుపు వెనుక పెట్టకూడదు. ఎందుకంటే అక్కడ పెట్టడం వలన అవి గుమ్మానికి తగులుతూ ఉంటాయి. అలా ఉంచకూడదు. ఇంకా.. చాల మంది కాళ్ళు తుడుచుకునే పట్టాలను కూడా గుమ్మముపైన వేస్తూ ఉంటారు. ఇలా కూడా వేయకుండా చూసుకోవాలి. గడపను, గడప చుట్టూ ఉండే ప్రదేశాన్ని పరిశుభ్రంగా, పవిత్రంగా ఉంచుకోవడం వలన లక్ష్మీదేవి అనుగ్రహిస్తుంది. ఎక్కడ పరిశుభ్రత ఉంటె అక్కడే లక్ష్మీదేవి కొలువవుతుంది.

భారతీయులు ఎక్కువ గా జ్యోతిష్య శాస్త్రాలను, ఖగోళ శాస్త్రాలను విశ్వసిస్తారు. వాటి లెక్కలకు అనుగుణం గా మార్పులు జరుగుతుంటాయని భావిస్తుంటారు. అయితే, మన పూర్వికులు తమకున్న అపార మేధస్సు ద్వారా ఎంతో విజ్ఞానాన్ని మనకు అందించారు.

వాటిలో “బ్రహ్మం గారి కాల జ్ఞానం” ఎక్కువ ప్రాచుర్యం పొందింది. శ్రీ పోతులూరి వీర బ్రహ్మేంద్ర స్వామీ వారు తమకు ఉన్న అపారమైన జ్ఞానం తో భవిష్యత్ లో ఏమి జరగబోతోందో ముందే చెప్పారు.

పోతులూరి వీరబ్రహ్మేంద్రస్వామి 17వ శతాబ్దములో కాలజ్ఞాన తత్వాలను బోధించిన యోగి,హేతువాది, సంఘ సంస్కర్త . బ్రహ్మం గారు తన కాలజ్ఞానములో భవిష్యత్ లో ఎలాంటి విపత్తులు సంభవిస్తాయో ముందుగానే ఉహించి చెప్పారు .వాటిల్లో చాలా వరకు నిజమయ్యాయి . తాజాగా మరో వింత కూడా నిజమైంది. అదే బంగారు తాబేలు జన్మించడం. సాధారణంగా ఏదైనా వింత జరిగితే.. బ్రహ్మం గారు ముందే చెప్పారు అంటూ సోషల్ మీడియాలో పోస్ట్ లు వైరల్ అవుతూ ఉండడం మామూలు విషయమే.

తాజాగా.. వైరల్ అవుతున్న ఈ పోస్ట్ గురించి తెలుసుకుందాం. తాజాగా.. నేపాల్ లో బంగారు తాబేలు పుట్టింది. అయితే.. బ్రహ్మం గారు ముందే చెప్పారు అంటూ ఈ విషయాన్నీ తెగ వైరల్ చేసేస్తున్నారు. మామూలుగానే నేపాల్ లో తాబేళ్లను దేవునిగా పూజిస్తూ ఉంటారు. బంగారు రంగులో మెరుస్తూ ఉన్న తాబేలు పుట్టేసరికి.. అందరు దీనికి పని కట్టుకుని పూజలు చేసేస్తున్నారు. అయితే.. బంగారు తాబేళ్లు ఉండవని.. జన్యు లోపాల కారణంగానే తాబేళ్లు రంగు మారుస్తాయని నిపుణులు చెబుతున్నారు. అయితే ప్రజలు ఇవేమీ పట్టించుకోకుండా పూజలు చేసుకుంటున్నారు.

అంతే కాదు.. ఆయనలు పలు ఇతర విషయాల గురించి కూడా వెల్లడించారు.వెంకటేశ్వర స్వామి వారి సంపదని ఆరుగురు దోచుకుంటారని, శ్రీశైల మల్లిఖార్జునుడు భక్తులతో మాట్లాడతాడని, కృష్ణా నది మధ్యలో బయటపడ్డ బంగారు రధాన్ని చూసిన వారు కళ్ళు పోగొట్టుకుంటారని, మధుర మీనాక్షి జనులతో మాట్లాడుతుందని, రాయదుర్గం లో చిలుక వీర ధర్మాలను చెబుతుందని, బనగానపల్లి లో పాతరమీద చింత చెట్టుకు జాజులు పూస్తాయని, శ్రీకాళహస్తిలో దొంగతనం జరుగుతుందని, శ్రీశైల మల్లిఖార్జునుడు శ్రీశైలం వదిలి వింధ్య పర్వతాలకు వెళ్ళిపోతాడని కూడా బ్రహ్మంగారు వెల్లడించారు. ఇప్పటికే ఆయన చెప్పినవి కొన్ని నిజమవ్వడంతో.. ఆయన కాలజ్ఞానానికి అంత ప్రాముఖ్యత ఏర్పడింది.