Anudeep

“మెరుపు మెరిస్తే…వాన కురిస్తే

ఆకసమున హరివిల్లు విరిస్తే

అవి మీకే అని ఆనందించే కూనల్లారా

బుడతల్లారా…అయిదారేడుల పాపల్లారా…”

అని శ్రీశ్రీ ఆ తరం చిన్నారుల గురించి చెప్పారు.

ఇప్పుడు నడుస్తోంది  4జి యుగం…ఆలోచనల్లోనే  కాదు ఆ ఆలోచనలను ఆచరణలో పెట్టడంలోనూ ఈనాటి తరం అందర్నీ అబ్బురపరుస్తోంది…అంతెందుకు ముంబాయి కి చెందిన మూడేళ్ల కబీర్ అనే బుడతడి సంగతే తీసుకొండి…ఈ 4జి తరపు బాలుడి సంకల్పం, చూపిన పట్టుదల,సాధించిన ఘనత తెలుసుకుంటే శభాష్ బేటా అనకుండా ఉండలేరు..

కేక్ అనగానే చిన్నపిల్లలు వావ్ అంటూ పరిగెత్తుకొచ్చేస్తారు..అంత ఇష్టం వారికి కానీ ముంబైకి చెందిన కబీర్ అనే మూడేళ్ల బాలుడు ఏకంగా కప్ కేకులను తయారు చేశాడు. క‌బీర్ అనే ఓ మూడేళ్ల బాలుడు క‌ప్ కేకులు త‌యారు చేశాడు. కేకులు తినే వ‌య‌సులో వాటిని త‌యారు చేయ‌డ‌మేంట‌ని ఆశ్చ‌ర్య‌గా ఉందా? కానీ అదే నిజం.. ఈ కేకులు తయారు చేసింది తనకోసం కాదు, దాని వెనుక పెద్ద సంకల్పమే ఉంది.త‌ను సొంతంగా త‌యారు చేసిన కేకుల‌ను అమ్ముతూ, ఆ వచ్చిన డబ్బును కరోనా వ్యతిరేక పోరుకు విరాళంగా ఇచ్చాడు.

కబీర్ తల్లిదండ్రులు కరిష్మా, కేశవ్ లతో కలిసి ముంభై పోలీస్ కమీషనర్ పరమ్ బీర్ సింగ్ ను కలిసి,తాను తెచ్చిన విరాళాన్ని అందించాడు కబీర్. చిన్నపిల్లాడు ఏ ఐదో, పదివేలో పాకెట్ మనీ తెచ్చుంటారు అనుకున్నరు పోలీసులు..కబీర్ కూడా ముందు 10వేలు సంపాదించి ఇవ్వాలి అనుకున్నడు.కానీ రోజురోజుకి డబ్బులు వస్తూనే ఉన్నాయి.దాంతో మరింత హుషారుగా తను అనుకున్న పనిచేశాడు. మొత్తం 50వేలు సంపాదించాడు..కబీర్ ఆనందానికి హద్దు లేకుండా పోయింది..

కబీర్ చేసిన మంచి పనికి ముచ్చటపడిన ముంబై కమీషనరేట్ పోలీసులు  తన గురించిన వీడియో సోషల్ మీడియాలో శేర్ చేసారు..ఈ బుజ్జాయి కేవలం విరాళం మాత్రమే ఇవ్వలేదు..కరోనా టైంలో పోలీసులు చేస్తున్నసేవకు గానూ తను చేసిన కప్ కేక్స్ ని కొన్నంటిని పోలీసులకు తినిపించాడు..సోషల్ మీడియాలో వైరలవుతున్న ఈ లిటిల్ ఎంట్రప్రెన్యూర్ స్టోరీ ప్రస్తుతం వైరల్ టాపిక్ గా మారింది.

“కమలాతాళ్” ఈ పేరు చెప్తే గుర్తు పట్టకపోవచ్చు కానీ… రూపాయి ఇడ్లీ బామ్మ అంటే టక్కున గుర్తు పట్టొచ్చు.. కోయంబత్తూర్ లో రూపాయికే ఇడ్లీ అమ్మే ఈ బామ్మ.. లాక్ డౌన్ వేళల్లో కూడా తను అమ్మే ఇడ్లీ రేటు పెంచలేదని తెలిసి భలే ఆశ్చర్యమేసింది.. జనతా కర్ఫ్యూ అనగానే అయ్యో రేపటికి సరుకులు దొరుకుతాయో లేదో అన్నట్టుగా జనం ఎగబడి దుకానాలు ఖాళీ చేసారు, మరోవైపు దుఖానదారులు వారికి వీలున్నంతలో అమాంతం పెంచేశారు..కానీ కమలాతాళ్ మాత్రం అప్పుడు ఇప్పుడు.. ఒకే మాట..ఒకే రేటుకే ఇడ్లీ అమ్ముతున్నారు..

పేదవాళ్లు, మధ్య తరగతి వాళ్ల కోసం ముప్పై ఏళ్లక్రితం కమలాతాళ్ ఈ పని స్టార్ట్ చేశారు.. మొదట్లో యాభై పైసలకు ఇడ్లీ, బోండా అమ్మేవారు, రేట్లు పెరగడంతో రూపాయి చేశారు.అంటే అర్ద రూపాయి పెంచారు. ఇప్పుడు కరోనా కాలంలో తను  నష్టపోతున్నప్పటికి కూడా  ఇడ్లీ రేటు పెంచకుండా అందరి కడుపు నింపుతున్నారు. ముఖ్యంగా ఇప్పుడు వలస కూలిలకు కమలతాళ్ ఇడ్లీయే పంచభక్ష పరమాన్నం లాంటిది..పది రూపాయలు జేబులో ఉంటే పది ఇడ్లీలు తిని కడుపు నింపుకోవచ్చు.. పది రూపాయల ఇడ్లీలు తిని ఐదు రూపాయలు ఇచ్చినా ఆ వ్యక్తి ఆకలి తీర్చాననుకుంటారే తప్ప, డబ్బులివ్వమని అడగని గొప్ప మనసు ఆ బామ్మది.

ప్రస్తుతం తన వయసు ఎనభై పైనే..ఈ వయసులో కూడా ఉదయాన్నే లేవడం , పొలానికి వెళ్లి కూరగాయలు తీసుకురావడం.. ఉదయం ఆరు గంటల నుండి మద్యాహ్నం పన్నెండు ఇడ్లీలు అమ్మడం ప్రారంభించడం.. ఇడ్లీలు చేయడానికి రోట్లోనే పిండి రుబ్బుతారు.. కట్టెలపొయ్యి మీదనే ఇడ్లీలు పెడతారు..ఇడ్లీ,చట్నీ మరియు సాంబార్ వీటిని తన పొలంలో తెచ్చిన అరిటాకుల్లో అందరికి అందించడం ముప్పై ఏళ్లుగా ఇదే దినచర్య..

ఇంత కష్టకాలంలో కూడా రూపాయికే ఇడ్లీ అమ్ముతున్నారని తెలుసుకున్న కొన్ని స్వచ్చంద సంస్థలు కమలతాళ్ కి సాయం చేయడానికి ముందుకు వచ్చాయి.కరోనా విజృంభిస్తున్న కాలంలో కూడా రూపాయికే ఇడ్లీ అందిస్తున్న కమలాతాళ్ సేవ గురించి తెలుసుకుని తనకు అవసరం అయిన సరుకులు ఇతరత్రా సామాగ్రి అందించారు భారతీయ విశ్వవిద్యాలయ వైస్ ఛాన్సలర్ మరియు హిందుస్థాన్ స్కౌట్స్ అండ్ గైడ్ సభ్యులు. “ఇడ్లీ రేటు పెంచే ఆలోచన లేదు. దాతల సహాయంతో వారందరికీ ఒక్క రూపాయికే ఇడ్లీ అందించగల్గుతున్నాను”అని కమలాతాళ్‌ ఇటీవల నేషనల్ మీడియాకి ఇచ్చిన ఇంటర్వూలో చెప్పారు.

“నేను కూలీని,ఏం చేయలేని నిస్సహాయ స్థితిలో ఈ తప్పు చేస్తున్నాను, నన్ను క్షమించండి . మీ సైకిల్ తీసుకువెళ్తున్నాను ,నేను బరేలికి వెళ్లాలి.దానికి తోడు నా కొడుకు వికలాంగుడు.కాబట్టి నా ఇంటికి చేరుకోవడానికి వేరే మార్గాలు లేక మీ సైకిల్ తీసుకుంటున్నాను”  ఇది ఒక వలస కూలి రాసిన లెటర్..  సోషల్ మీడియాలో వైరలవుతోన్న ఈ లెటర్ ప్రస్తుత పరిస్థితిని కళ్లకు కట్టినట్టు చూపిస్తోంది.

లాక్‌డౌన్‌ ప్రకటించడంతో చేయడానికి పనులు లేక, తినడానికి తిండి లేక రెక్కాడితే కాని డొక్కాడని వలస బతుకులన్ని ఆగమాగమయ్యాయి..దీంతో ఎటూ దిక్కుతోచక సొంతూరికి పోతే కనీసం కలోగంజో తాగి బతకొచ్చు అని అందరూ ఊరిబాట పట్టారు. చంటిపిల్లల్ని, వయసు పై బడిన వారిని తీసుకుని అందరూ కాలినడకన వేలమైళ్లు నడుచుకుంటూ ఊరికి వెళ్తున్నారు.వారిలో గమ్యం చేరే వారు కొందరైతే, మధ్యలోనే అష్టకష్టాలు పడుతున్నవారు కొందరు.

representative image

మహమ్మద్ ఇక్బాల్ అనే వలస కార్మికుడు  ఉత్తర ప్రదేశ్‌లోని ఇంటికి వెళ్లాలని నిర్ణయించుకున్నాడు. ఒక్కడే ఉంటే నడుచుకుంటూ వెళ్లేవాడే..తనతో పాటు వికలాంగ కొడుకు ఉన్నాడు..అతడు నడవలేడు..ఇక్బాల్ అతన్ని ఎత్తుకుని ఎంత దూరమని పోగలడు.. దాంతో రాజస్థాన్‌లోని భరత్‌పూర్‌ జిల్లాలో, రారా గ్రామంలో సహబ్ సింగ్ అనే వ్యక్తి ఇంటి నుండి  సైకిల్‌ను దొంగిలించాడు.

representative image

తన అవసరార్దం దొంగతనం అయితే చేశాడు కానీ, ఇక్బాల్ మనసు దానికి అంగీకరించలేదు.. ఆత్మాభిమానంతో కష్టపడి వచ్చిన రూపాయితోనే బతికిన వారికి ఎవరి మనసైనా ఒప్పుకోదు..దాంతో తన పరిస్థితిని వివరించి  క్షమించమని ఒక ఉత్తరం రాసి ఆ ఇంటి పరిసరాల్లో వదిలేసి వెళ్లాడు. సింగ్ తన ఇంటిని శుభ్రం చేస్తుండగా ఈ లేఖ కనిపించింది.అందులో “మెయిన్ మజ్దూర్ హన్, మజ్బూర్ భీ. మెయిన్ ఆప్కా గునెగర్ హు. ఆప్ కీ సైకిల్ లేకర్ జా రాహా హు. ముజే మాఫ్ కర్ దేనా. ముజే బరేలీ తక్ జన హే. మేరే పాస్ కోయి సాధన్ నహి హి.. ఔర్ విక్లాంగ్ బచ్చా హై.. అని హిందీలో రాసి ఉంది.

representative image

ముందు సైకిల్ కనపడకపోయే సరికి అగ్గి మీద గుగ్గిలమైన ఆ సైకిల్ ఓనర్ , ఈ లెటర్ చూసి శాంతించాడు.. తన సైకిల్ ఒక కుటుంబానికి సహాయం చేసినందుకు సంతోషించాడు.. ప్రస్తుతం మహమ్మద్ ఇక్బాల్ రాసిన ఈ లెటర్ సోషల్ మీడియాలో వైరలవుతోంది.