News

అప్పట్లో వచ్చిన “మనీ” సినిమాలో బ్రహ్మీ “ ఖాన్ దాదాతో గేమ్స్ వద్దు శాల్తీలు లేచిపోతాయి” అని అంటాడు. సేమ్ అదే స్టైల్లో ఇప్పుడు సూర్యాపేట అమ్మమ్మ “కరోనాతో అష్టాచెమ్మ వద్దు ఖర్సైపోతారని” అనడమే కాదు ఆచరణలో చూపించింది కూడా.. ఆమె ఆడిన అష్టాచెమ్మా దెబ్బకి కరోనా జాబితాలో సూర్యాపేట ఏకంగా రెండో ప్లేస్ కి చేరుకుంది. జిల్లాల లెక్కన చూస్తే సూర్యపేటనే ఫస్ట్ ప్లేస్..

కర్ణుడి చావుకు కారణాలు అనేకం అన్నట్టు సూర్యాపేటలో కరోనా విరుచుకుపడడానికి అనేక అంశాలు కారణమైనా కూడా ఈ అష్టాచెమ్మా వ్యవహారం మాత్రం బాగా వైరలైంది. కరోనా లాక్ డౌన్ తో ఎటూ టైం పాస్ కాక అందరూ అష్టా చెమ్మా, వైకుంఠపాళిలు అంటూ ఇండోర్ గేమ్స్ మొదలెడితే.. కరోనా కూడా చాపకింద నీరులా తన గేమ్ తాను ఆడి చివరికి విన్నర్ గా నిలిచింది.

ఒకరు ఇద్దరికి కాదు ఏకంగా 31 మందికి కరోనా ఎఫెక్ట్ కావడంతో సూర్యపేటలో కలకలం రేగింది. సోషల్ డిస్టెన్సింగ్ పాటించకుండా ఇష్టమొచ్చినట్టుగా ఉండి మాకేం కాదులే అని ధీమాతో అంతమందికి కరోనా సోకేసరికి.. వెంకి పెళ్లి సుబ్బి చావుకొచ్చినట్టు.. ఈ దెబ్బకి ఎస్పీ , డిఎస్పిలను బదిలి చేసింది ప్రభుత్వం.కరోనా సోకడానికి కారణం అష్టాచెమ్మా ఆడడమే అని సోషల్ మీడియాలో తెగ వైరలవుతోంది.

లాక్ డౌన్ ప్రకటించినప్పటి నుండి ఇళ్లల్లో ఖాళీగా కూర్చోలేక చాలామంది ఆ కాలం ఆటలన్నింటిని మళ్లీ తెరమీదకి తెచ్చారు . ప్లేయింగ్ అష్టాచెమ్మా, వైకుంఠపాళి అంటూ స్టాటస్లు కూడా పెడుతూ సంబరపడ్డారు. కానీ ఈ ఒక్క న్యూస్ తో ఇంట్లో కూర్చుని ప్రశాంతంగా ఇండోర్ గేమ్స్ ఆడుకున్నా సుఖం లేదని టెన్షన్ పడుతున్నారు.

నిజానికి ఇది కేవలం టివి9లో మాత్రమే వచ్చిన వార్త, ఇందులో నిజనిజాలెంత అనేది తేలాల్సి ఉంది.  సర్లెండి కొద్ది సేపు ఆ టెన్షన్ పక్కకు పెట్టి, అష్టాచెమ్మ ఆడడం ద్వారా 31మందికి కరోనా సోకింది అనే దానిపై సోషల్ మీడియాలో వచ్చిన రకరకాల ట్రోల్స్ చూసి కడుపుబ్బా నవ్వుకోండి.

మందుబాబులం..మేము మందుబాబులం..మందుకొడితే మాకు మేమే మహారాజులం.. లాక్ డౌన్ వేళ ఒక్కొక్కరిది ఒక్కో లొల్లి . తాగుబోతులది మరో లొల్లి.. లాక్ డౌన్ ఎప్పుడెత్తేస్తారా? మందు ఎప్పుడు అందుబాటులోకి వస్తుందా అని కొందరు మందుబాబులు ఎదురుచూస్తుంటే , మరికొందరు ఏకంగా ఇంట్లోనే మందు తయారు చేసుకోవడం గురించి ఆలోచిస్తున్నారు.ఇది మేం చెప్పట్లేదు..గూగుల్ తల్లే చెప్తుంది.

లిక్క‌ర్ షాపులు క్లోజ్ చేసేయడంతో, ఎలా అయినా మందుచుక్కతో నోరు తడుపుకోవడానికి రకరకాల ప్రయత్నాలు చేస్తున్నారు మందుబాబులు. లాక్ డౌన్ తొలిరోజుల్లో బ్లాక్లో కొనుక్కుని తాగారు. కానీ ఎంతకాలం అలా తాగగలరు.  బ్లాక్ లో ఒక్కో బాటిల్ ఏకంగా మూడు నాలుగు రెట్లు ఎక్కువ చేసి అమ్ముతుంటే, అదికూడా కష్టమైపోయింది . ఇక చేసేదేం లేక ఒక మార్గం ఆలోచించారు. ఇంట్లో మందు తయారు చేసుకోవాలని ఫిక్సయ్యారు.ఇది మేం చెప్పట్లేదండి.. మందు తయారు చేసుకోవడం ఎలా అని గూగుల్లో వెతకడం మొదలు పెట్టారు. “How to make alcohol at home” ఇది ఇప్పుడు ట్రెండింగ్లో ఉంది.

లాక్ డౌన్ పెట్టిన ఫస్ట్ వీక్ లోనే  అంటే మార్చి 22 నుంచి 28 మ‌ధ్య ఈ సెర్చ్ పీక్ లోకి వెళ్లింది. మార్చి 22 నుంచి ఏప్రిల్ 15 వరకు కూడా గూగుల్ ట్రెండ్స్ లో ఈ సెర్చ్ టాప్ ప్లేస్ లోనే ఉంది. ఇలా సెర్చ్ చేసిన స్టేట్స్లో మణిపూర్ ఫస్ట్ ప్లేస్ కాగా,ఆ త‌ర్వాత జ‌మ్ము క‌శ్మీర్, ఉత్త‌రాఖండ్, జార్ఖండ్, అస్సాం ఉన్నాయి. ఆరో స్థానంలో ఏపీ, ప‌దో స్థానంలో తెలంగాణ ఉన్నాయి.

కేవలం ఆల్కహాల్ కోసమే కాదు,  ఆల్క‌హాల్ త‌యారీ కోసం సెర్చ్ చేసిన‌ట్లుగానే బీర్ ఇంట్లోనే ఎలా చేసుకోవాల‌న్న దాని కోసం కూడా దేశంలో లాక్ డౌన్ పెట్టిన త‌ర్వాత జ‌నాలు విప‌రీతంగా సెర్చ్ చేశారు. మార్చి 29న “how to make beer at home” అన్న సెర్చ్ పీక్ లోకి వెళ్లింది. బీర్ కోసం సెర్చ్ చేసిన వారిలో తెలంగాణా టాప్ ఫైవ్ లో ఉంది.. అదీ సంగతి.. మొన్నీ మధ్య ఎవరో ఇలాగే సొంతంగా మందు తయారు చేసుకుని వికటించి చనిపోయారు. కాబట్టి లాక్ డౌన్ ఎత్తేశాక బతికుంటే బడ్వైజర్ తాగొచ్చు కాని..ఇప్పుడు ప్రయోగాలు చేయకండి.

కిమ్ కి ఏమైంది..మొన్నటి వరకు బాగానే ఉన్నాడు కదా..కరోనా వచ్చిందో లేదో తెలియకముందే దగ్గినా తుమ్మినా ,ఎక్కడివాళ్లనక్కడ చంపేస్తూ లెక్కసెటిల్ చేస్తూ..(అదెంత వరకు నిజమో తెలీదు)..మన దగ్గర నాయకులు కూడా ఇలాగే ఉండాలి, అప్పుడే ప్రజలు వింటారని అందరి చేత భేష్ అనిపించుకుంటూ, ఎన్నో ట్రోల్స్ లో నానుతూ..మరి హఠాత్తుగా ఈ వార్తలేంటి? కిమ్ కి ఏమైంది? ఒకవేళ కిమ్  పోతే తన తర్వాత స్థానం ఎవరిది??

ఉత్తర కొరియా పాలకుడు కిమ్ జాంగ్ ఉన్ గుండెకు శస్త్ర చికిత్స చేయించుకున్న తర్వాత తీవ్ర అనారోగ్యానికి గురయ్యారిన, ఆయనకు బ్రెయిన్ డెడ్ అయ్యిందని రకరకాల వార్తలు వస్తున్నాయి. ధూమపానం, అధిక బరువు వలన సమస్యలు ఎదుర్కొంటున్నారని కొందరు వ్యాఖ్యానించారు. అసలు ఈ వార్తలెలా వచ్చాయంటే.. ఇటీవల ఏప్రిల్ 15న కిమ్ తాత, ఉత్తర కొరియా వ్యవస్థాపకుడు కిమ్ ఇల్ సంగ్ జయంతి వేడుకలు జరిగాయి.దేశంలా ఏటా జరిగే అతిపెద్ద వేడుకల్లో ఈ కార్యక్రమం కూడా ఒకటి. దీనికి కిమ్ జాంగ్ హాజరు కాలేదు.ఇదివరకు ఎప్పుడూ ఆయన కిమ్ ఇల్ సంగ్ జయంతికి హాజరు కాకుండా లేరు.దీంతో ఆయన ఈసారి వేడుకలకు రాకపోవడంపై అనేక వదంతులు పుట్టాయి.

గత వారం ఉత్తర కొరియా క్షిపణి పరీక్షలు నిర్వహించింది. అప్పుడు కిమ్ ఎక్కడున్నారనేది ఎవరికి తెలీదు. చివరిగా ఏప్రిల్ 12న ఒక కార్యక్రమంలో పాల్గొన్నట్టు మాత్రమే  ఆ దేశ మీడియాలో వార్తలొచ్చాయి. తర్వాత ఎలాంటి కార్యక్రమాల్లోనూ కిమ్ కనపడలేదు. ఇప్పుడు ఇలాంటి వార్తలొస్తున్నప్పటికి కిమ్ బయటకి రాకపోవడంతో ఈ వార్తలకు బలం చేకూరుస్తున్నట్టుంది. ఒక వేళ కిమ్ ఆరోగ్య పరిస్థితి విషమంగా ఉండడం నిజమైతే, పుటుక్కున ఏమైనా జరిగి పోయాడనుకో అప్పుడు ఆ దేశ బాధ్యతలు తీసుకునేది ఎవరు? కిమ్ తర్వాత స్థానం ఎవరిది అంటే అతడి చిన్నచెల్లెలు కిమ్ యో జాంగ్.

అదేంటి దేశాన్ని గడగడలాడించిన కిమ్ స్థానంలోకి అతడి చెల్లెలా అని తక్కువ అంచనా వేయకండి..ఈమె అన్నకంటే నాలుగాకులు ఎక్కువే చదివింది.కిమ్ కంటే నాలుగేళ్లు చిన్న అయిన 31ఏళ్ల కిమ్ యో జాంగ్  అన్నకంటే కఠినాత్మురాలు . కిమ్ కి అత్యంత సన్నిహితురాలు, తనని ఎప్పుడు కలవాలనుకుంటే అప్పుడు కలవగలిగే ఏకైక్ వ్యక్తి కిమ్ యో జాంగ్ . ఇప్పటికే కిమ్ ఈమెకి అన్ని రకాలుగా ఎంకరేజ్ చేస్తూ అన్ని విషయాల పట్ల అవగాహన కలిగేలా చేశాడు.ఇతర దేశాలతో సంబంధాలు, మిలటరి వ్యవహారాలు అన్నతో సమానంగా చూస్తుంది కిమ్ యో జంగ్.

స్విట్జర్లాండ్లో పేరు మార్చుకుని చదువుకుంది. కిమ్ వార్తల్లోకి రావడం ఇది మొదటిసారి కాదు . 2012 నుండి తను వార్తల్లో వ్యక్తి గా ఉంది. అప్పుడు కూడా కిమ్ ఆరోగ్యం విషమించిదని వార్తలు రావడంతో తన తర్వాత స్థానం ఎవరు అనేదానిపై ఎక్కువగా వినపడిన పేరు కిమ్ యో జంగ్ దే. అప్పటి నుండి కూడా తను అన్నతో పాటుగా పరిపాలన వ్యవహారాలు చూస్కుంటూ అన్నకు తోడుగా ఉంది.  కిమ్ గురించిన వార్తలు ట్రంప్ నోట , మీడియా నోట తప్ప ఆ దేశ మీడియాలో కాని, అధికారికంగా కాని ఎక్కడా వెళ్లడి కాలేదు..కాబట్టి ఆలు లేదు చూలు లేదు కొడుకు పేరు సోమలింగం అన్నట్టు..

కరోనా కారణంగా లాక్ డౌన్ విధించడంతో  ఇప్పటికే నిశ్చితార్థం చేసుకున్న వారి పెళ్లిళ్లు వాయిదా పడగా కొత్తగా వివాహం చేసుకుందాం అనేవారికీ నిరాశే మిగిలింది ..ఈ లాక్ డౌన్ తర్వాత కూడా ముహుర్తాలు లేకపోవడంతో ఇంకా చాలా కాలం వేచి ఉండాల్సి ఉంది . ఇది ఒక స్టోరీ. అయితే కరెక్ట్ గా లాక్ డౌన్ కి ముందు పెళ్ళై. బంధువులంతా పెళ్లి ఇంట్లో చిక్కుకుకపోయిన సంఘటనలు కూడా ఉన్నాయి.

సంగారెడ్డి జిల్లాలో పెళ్ళికి వచ్చి చిక్కుకుపోయిన ఒరిస్సా వాసులు. నెల రోజులుగా పెళ్ళికొడుకు ఇంట్లోనే ఉంటున్న 40 మంది. వారిని పోషించలేక ఇబ్బంది పడుతున్న పెళ్ళికొడుకు కుటుంభం. సొంత రాష్ట్రానికి పంపించాలి అంటున్న అమ్మాయి తరుపు బంధువులు. పెళ్ళికి చుట్టాలు అందరు ఉంటె బాగానే ఉంటుంది. ఎంతో ఆనందంగా గడుపుతాము. కానీ వచ్చిన చుట్టాలు అలా పాతుకుపోయి పరిస్థితి వస్తే మన జేబుకి చిల్లు పడ్డట్టే. ఈ విషయంపై సోషల్ మీడియాలో వచ్చిన ట్రోల్ల్స్ చూసి నవ్వుకోండి. 

ప్రస్తుతం కరోనా వైరస్ మహమ్మారి ప్రపంచ వ్యాప్తంగా కలకలం సృష్టిస్తున్న సంగతి అందరికీ తెలిసిందే. అయితే ఈ కరోనా వైరస్ వ్యాప్తిని అరికట్టేందుకు ఇప్పటికే పలు దేశాలు తమ దేశ ప్రజలను సామాజిక దూరం పాటించమని, ఇతరులతో మాట్లాడే సమయంలో నోటికి మాస్కులు ధరించాలని సూచిస్తున్నాయి. అంతేగాక జనసాంద్రత ఎక్కువగా ఉన్నటువంటి ఉన్నటువంటి ప్రదేశాలనే కాక మొత్తం దేశంలోనే లాక్ డౌన్ విధించడంతో ఎక్కడ జనసాంద్రత అక్కడే నిలిచిపోయింది. ప్రజలకి అవసరమయిన సదుపాయాలు తప్ప మిగిలిన ఏ ఇతర సదుపాయాలను కూడా మూసివేశారు.

అయితే చైనా దేశంలో క్రమ క్రమంగా కరోనా వైరస్ ప్రభావం తగ్గుముఖం పడుతుండంతో లాక్ డౌన్ ఎట్టి వేశారు. దీంతో తాజాగా ఓ ఫర్నిచర్ సంస్థ తమ కార్యకలాపాలను తిరిగి పునః ప్రారంభించింది. ఇందులో భాగంగా వినియోగదారులను ఆకట్టుకునేందుకు తమ సంస్థలో పని చేసేటువంటి ఉద్యోగులకు ముద్దుల పోటీలను నిర్వహించిది. అయితే ప్రస్తుతం ఉన్నటువంటి కరోనా వైరస్ కారణంగా ఈ ముద్దుల పోటీలను కొంచెం డిఫరెంట్ గా నిర్వహించింది.

ఇందులో ముద్దు పెట్టుకునెటువంటి వారి మధ్యలో ఓ పలుచటి అద్దాన్ని ఉంచుతూ ఈ పోటీలను నిర్వహించింది. అంతేగాక ఈ పోటీలకు సంబంధించినటువంటి కొన్ని ఫోటోలను కూడా తన అధికారిక ట్విట్టర్ ఖాతాలో షేర్ చేసింది. ఇందులో భాగంగా తమ ఉద్యోగులు ప్రశాంతంగా పని చేసుకోవడానికి ఈ ముద్దుల పోటీలు నిర్వహించినట్లు సంస్థ అధికారులు పేర్కొన్నారు. ప్రస్తుతం ఈ ట్వీట్ సోషల్ మీడియాలో తెగ వైరల్ అవుతోంది. అంతేగాక కొందరి నెటిజన్లు ఫర్నిచర్ కంపెనీ అధికారులపై ఆగ్రహం వ్యక్తం చేస్తున్నారు.

source

ప్రపంచం మొత్తం కరోనా వైరస్ తో అల్లాడుతుంటే ఇలాంటి సమయంలో ముద్దుల పోటీలు నిర్వహించడం ఏమిటని ఫర్నిచర్ కంపెనీ అధికారులను ప్రశ్నిస్తున్నారు. మరికొందరైతే మాత్రం ఏకంగా సామాజిక దూరం పాటించండని ప్రభుత్వం చెబుతున్నప్పటికీ వినకుండా ఇలాంటివి చేస్తున్న వారిపై కఠిన చర్యలు తీసుకోవాలంటూ ప్రభుత్వానికి సూచిస్తున్నారు. దీంతో పబ్లిసిటీ కోసం ముద్దుల పోటీలు నిర్వహించినటువంటి ఫర్నిచర్ సంస్థకు ప్రస్తుతం తీవ్ర విమర్శలు ఎదురవుతున్నాయి.