Anudeep

ఆ అమ్మాయి అబ్బాయిని ప్రేమించింది. పెళ్లి చేసుకోవాలనుకుంది . ఇంట్లో వాళ్లు  ఒప్పుకోలేదు. అతన్నే చేస్కుంటానని పట్టుపట్టింది. చివరికి తల్లిదండ్రుల్ని ఒప్పించి పెళ్లిచేసుకుంది. ఏముంది విశేషం . ఇవాళ రేపు ఇలాంటి పెళ్లిల్లు చాలనే జరుగుతున్నాయి కదా . కానీ ఈ పెళ్లికి ఒక విశేషం ఉంది. ఆ అమ్మాయి ప్రేమలో ఒక నిజాయితి ఉంది. అందుకో సోషల్ మీడియాలో హాట్ టాపిక్ గా మారి దేశంమొత్తం చేత శెభాష్ అనిపించుకుంటుంది. ప్రేమించిన వాడు, పెళ్లి చేసుకోబోయే వాడు దివ్యాంగుడని తెలీసి ముందడుగు వేయడం మామూలు విషయం కాదు.

ప్రణవ్ ది కేరళలోని త్రిసూర్ కి 25కిలోమీటర్ల దూరంలో ఉన్న తాజేఘాట్ . చదువుకునే రోజుల్లో బైక్ యాక్సిడెంట్ కి గురై, తుంటి కింద భాగం దెబ్బతిని నడవలేని పరిస్థితి వచ్చింది. దాంతో పక్షవాతంతో చక్రాల కుర్చీకే పరిమితమయ్యాడు. అన్నింటికీ ఇతరుల సాయంపై ఆధారపడాల్సి వస్తోంది. అయినప్పటికీ నిరుత్సాహపడని ప్రణవ్ అందరు యువకుల్లానే ఉండాలని అనుకునేవాడు. అందులో భాగంగా అక్కడి ఆలయాల్లో జరిగే ఉత్సవాలకు వెళ్తుండేవాడు. పండుగల్ని కళ్లారా చూసేవాడు. ఫ్రెండ్స్ తో పాటు తను కూడా డ్యాన్స్ చేస్తూ ఎంజాయ్ చేసేవాడు.  ప్రణవ్ ఫ్రెండ్ అతని వీడియోలు తీసి , సోషల్ మీడియాలో పోస్టు చేసేవాడు.ప్రణవ్ తల్లి తన కొడుకుకి అన్నం తినిపిస్తున్న వీడియోలు కూడా సోషల్ మీడియాలో షేర్ చేసేవాళ్లు. ఈ వీడియోలు వైరల్ గా మారాయి.

వైరలైన వీడియోస్ ఒకరోజు అనుకోకుండా షహానా అనే అమ్మాయి చూసింది. షహానాది తిరువనంతపురం. ఆ వీడియోస్ లో ప్రణవ్ కాన్పిడెన్స్ షహానాకి ఎంతో నచ్చింది. తన వైకల్యానికి కృంగిపోకుండా అందరిలానే ఉండాలనే ప్రణత్ తత్వం నచ్చింది. ఫ్లైట్ ఎక్కి నేరుగా అతని దగ్గరికి వెళ్లింది. తర్వాత సోషల్ మీడియాలో అతడితో ఇంటరాక్ట్ అయింది. కొన్ని నెలల తర్వాత ప్రణవ్ ఫోన్ నంబర్ తీసుకుంది. అతనిని ఫోన్‌ చేసి మాట్లాడింది. అలా ఇద్దరూ పరిచయమయ్యారు. కొన్ని రోజుల తర్వాత ప్రణవ్‌కు తన ప్రేమ విషయాన్ని చెప్పిన షహానా, పెళ్లి చేసుకుందామంది.

షహానా ప్రపోజల్ కి ప్రణవ్ ఒప్పుకోలేదు. నా లాంటి వాణ్ని చేసుకొని నువ్వు సుఖంగా ఉండలేవు. ఇంకెవరినైనా చేసుకో హాయిగా ఉండు అన్నాడు. ప్రణవ్ మాటకి  షహానా ఒప్పుకోలేదు. పెళ్లంటూ చేసుకుంటే నిన్నే చేసుకుంటా లేదంటే ఇలాగే ఉండిపోతా ,నేనంటే నీకు ఇష్టమా కాదా అని అడిగింది.దానికి సమాధానంగా నువ్వంటే ప్రాణం , కానీ ఏదో చెప్పబోయాడు. అంతే నీ సందేహం నాకు అర్దం అయింది. మా పేరెంట్స్ ని నేను ఒప్పిస్తా అంది.

కానీ షహానా పేరెంట్స్ ఒప్పుకోలేదు. చూస్తూ చూస్తూ ఏ అమ్మాయి జీవితాన్ని నాశనం చేయాలనుకోరు. మొదట కోప్పడ్డారు. తర్వాత వద్దు తల్లీ అని బతిమలాడారు. తల్లిదండ్రుల మాటకి షహానా ఒప్పుకోలేదు. నాకు లేని బాధ మీకెందుకు అని తల్లిదండ్రుల్ని ప్రశ్నించింది.పెళ్ళంటూ చేస్కుంటే ప్రణవ్ నే చేస్కుంటానని తెగేసి చెప్పింది.

ప్రేమంటే భౌతిక రూపంతో పనిలేదనీ, మనసులు కలిసేదే నిజమైన ప్రేమ అని చాటిచెప్పింది. ఆమె అంతలా ఇష్టపడుతుండటంతో ఇక తల్లిదండ్రులు కూడా ఒప్పుకున్నారు. అలా ఓ ఆలయంలో ఫిబ్రవరి 3న ఈ ప్రేమ జంట పెళ్లి చేసుకొని ఒక్కటైంది.

సహజ నటి సౌందర్య,శ్రీకాంత్ నటించిన ‘‘కలిసి నడుద్దాం’’సినిమాలో ఒక సన్నివేశం ఉంటుంది. శ్రీకాంత్, సౌందర్య పెళ్లి సీన్లో పెళ్లి కూతురైన సౌందర్య, పెళ్లికొడుకైన శ్రీకాంత్ పక్కన నడుస్తుంది. అప్పుడు పురోహితుడు “అమ్మా నువ్వు అమ్మాయివి. అబ్బాయి పక్కన నడవకూడదు కాస్త వెనగ్గా నడవాలి” అని చెపుతాడు. ఆధునిక భావాలున్న సౌందర్య ఆ మాటకు నొచ్చుకుంటుంది. కానీ కమలా శ్రీపాద,యోగ్నిక్ జంట ఆ సంప్రదాయానికి చెల్లు చీటీ ఇచ్చి కొత్తపద్ధతికి శ్రీకారం చుట్టారు. ‘‘సమానత్వం’’గా పెళ్లి చేసుకున్నారు. ఇదేం పెళ్లి అనుకుంటున్నారా మీరే చదవండి.

స్త్రీ పురుషుల సమానత్వం గురించి ఉపన్యాసాలిచ్చేవాళ్లే కానీ, ఆచరణలో చూపేవాళ్లు బహు తక్కువ మంది. కానీ కమల శ్రీపాద, యోగ్నిక్ తమ పెళ్లి ఎలా జరగాలో ముందే అంతా ప్లాన్ చేసుకున్నారు . అభిరుచులతో పాటు ఆలోచనలను పంచుకున్న ఈ ఇద్దరు. పెళ్లిలో ఆడపిల్ల ఇలా ఉండాలి..ఆడపెళ్లివారు మగపెళ్లివారికి ఇటువంటి మర్యాదల్ని చేయాలి. అనే కొన్ని పద్దతులకు స్వస్తి చెప్పి ఆడ,మగా ఇద్దరూసమానమే అని చాటి చెప్పారు.

ప్రకృతిలో స్త్రీపురుషులు ఇద్దరూ సమానం. అటువంటి ప్రకృతిసహజమైన పెళ్లిని ‘‘సమానత్వ’’మైన పెళ్లి చేసుకోవాలనుకున్నారు. దీంతో పెళ్లి బట్టలు కొనటం నుంచి అన్ని పనులు ఇద్దరూ సమానంగా చేసుకున్నారు. పంజాబీ సంప్రదాయాలల్లో నాలుగు పద్దతులను వీరు తమ పెళ్లినుంచి నిషేధించారు. దీంట్లో భాగంగా  తమ పెళ్లిలో ‘‘కన్యాదానం’’ ఉండకూడదనుకున్నారు.

‘‘వరుడు కాళ్లు కడిగి’’ఇదిగో బాబూ ఇప్పటివరకూ ఆమె మా బిడ్డ ఇక నుంచి నీది అంటూ దానం ఇవ్వటం ఏంటీ ? అటువంటి పద్దతి వద్దు అని నిర్ణయించుకున్నారు . దీంతో పెళ్లిలో ‘‘కన్యాదానం’’ ఘట్టం లేదు.  అలాగే పెళ్లిలో మంత్రాలు చదివినప్పుడు “మమా” అనుకోవటం కష్టాల్లోను సుఖాల్లోను ఆమెను విడిచిపెట్టనని వరుడు ప్రమాణం చేసినట్లుగా వధువు కూడా ప్రమాణం చేసింది.

అంతేకాదు..వివాహాంలో అతి ముఖ్యమైన ఘట్టం వధూవరులిద్దరూ అగ్నిసాక్షిగా సప్తపది వేయటం. ఏడడుగులు నడిచేప్పుడు వధువు వరుడి వెనకాల నడవాలి, అది కూడా తలదించుకుని , కానీ కమలా శ్రీపాదా యోగ్నిక్ లిద్దరూ పెళ్లిలో అతి ముఖ్యమైన ఈ తంతును చాలా ఆధునికంగా,ఆదర్శవంతంగా చేశారు. యోగ్నిక్ వెనుకగా కాకుండా పక్కనే నడిచింది.

“ భార్యాభర్తలిద్దరూ జీవితంలో కష్టసుఖాలను పంచుకుంటూ ఒకరి అండగా మరొకరు నిలవాలి. అటువంటప్పుడు ఒకరి వెనకాల కాకుండా పక్క పక్కనే నడిస్తే ఎంత బాగుంటుందో కదా..అందుకే మేము ఇలా చేయాలని అనుకున్నామని, ‘‘సమానంగా’’చేతిలో చేయి వేసుకుని నడవటంతో ఎంత ఆనందముంటుంది..అని నూతన దంపతులు సంతోషంతో కూడిన సగర్వంగా చెప్పారు.

ఈ కాలం పిల్లలకు ఏం తెలుసండి కుర్రకుంకలు అని తక్కువగా అంచనా వేయకండి . వాళ్లు తల్లిదండ్రులకంటే ఉన్నతంగా ఆలోచించవచ్చు . అప్పుడప్పుడు ఇలాంటి పనులతో సమాజాన్నే ఆశ్చర్యపరచవచ్చు . కాబట్టి ముందు మీ పిల్లలు చెప్పేది వినండి అందులో మంచి ఉంటే ఆహ్వానించండి, చెడు ఉంటే వివరించి చెప్పండి. అంతేకాని ముందే ఒక డెసిషన్ కి వచ్చేయకండి.