Anudeep

కిమ్ కి ఏమైంది..మొన్నటి వరకు బాగానే ఉన్నాడు కదా..కరోనా వచ్చిందో లేదో తెలియకముందే దగ్గినా తుమ్మినా ,ఎక్కడివాళ్లనక్కడ చంపేస్తూ లెక్కసెటిల్ చేస్తూ..(అదెంత వరకు నిజమో తెలీదు)..మన దగ్గర నాయకులు కూడా ఇలాగే ఉండాలి, అప్పుడే ప్రజలు వింటారని అందరి చేత భేష్ అనిపించుకుంటూ, ఎన్నో ట్రోల్స్ లో నానుతూ..మరి హఠాత్తుగా ఈ వార్తలేంటి? కిమ్ కి ఏమైంది? ఒకవేళ కిమ్  పోతే తన తర్వాత స్థానం ఎవరిది??

ఉత్తర కొరియా పాలకుడు కిమ్ జాంగ్ ఉన్ గుండెకు శస్త్ర చికిత్స చేయించుకున్న తర్వాత తీవ్ర అనారోగ్యానికి గురయ్యారిన, ఆయనకు బ్రెయిన్ డెడ్ అయ్యిందని రకరకాల వార్తలు వస్తున్నాయి. ధూమపానం, అధిక బరువు వలన సమస్యలు ఎదుర్కొంటున్నారని కొందరు వ్యాఖ్యానించారు. అసలు ఈ వార్తలెలా వచ్చాయంటే.. ఇటీవల ఏప్రిల్ 15న కిమ్ తాత, ఉత్తర కొరియా వ్యవస్థాపకుడు కిమ్ ఇల్ సంగ్ జయంతి వేడుకలు జరిగాయి.దేశంలా ఏటా జరిగే అతిపెద్ద వేడుకల్లో ఈ కార్యక్రమం కూడా ఒకటి. దీనికి కిమ్ జాంగ్ హాజరు కాలేదు.ఇదివరకు ఎప్పుడూ ఆయన కిమ్ ఇల్ సంగ్ జయంతికి హాజరు కాకుండా లేరు.దీంతో ఆయన ఈసారి వేడుకలకు రాకపోవడంపై అనేక వదంతులు పుట్టాయి.

గత వారం ఉత్తర కొరియా క్షిపణి పరీక్షలు నిర్వహించింది. అప్పుడు కిమ్ ఎక్కడున్నారనేది ఎవరికి తెలీదు. చివరిగా ఏప్రిల్ 12న ఒక కార్యక్రమంలో పాల్గొన్నట్టు మాత్రమే  ఆ దేశ మీడియాలో వార్తలొచ్చాయి. తర్వాత ఎలాంటి కార్యక్రమాల్లోనూ కిమ్ కనపడలేదు. ఇప్పుడు ఇలాంటి వార్తలొస్తున్నప్పటికి కిమ్ బయటకి రాకపోవడంతో ఈ వార్తలకు బలం చేకూరుస్తున్నట్టుంది. ఒక వేళ కిమ్ ఆరోగ్య పరిస్థితి విషమంగా ఉండడం నిజమైతే, పుటుక్కున ఏమైనా జరిగి పోయాడనుకో అప్పుడు ఆ దేశ బాధ్యతలు తీసుకునేది ఎవరు? కిమ్ తర్వాత స్థానం ఎవరిది అంటే అతడి చిన్నచెల్లెలు కిమ్ యో జాంగ్.

అదేంటి దేశాన్ని గడగడలాడించిన కిమ్ స్థానంలోకి అతడి చెల్లెలా అని తక్కువ అంచనా వేయకండి..ఈమె అన్నకంటే నాలుగాకులు ఎక్కువే చదివింది.కిమ్ కంటే నాలుగేళ్లు చిన్న అయిన 31ఏళ్ల కిమ్ యో జాంగ్  అన్నకంటే కఠినాత్మురాలు . కిమ్ కి అత్యంత సన్నిహితురాలు, తనని ఎప్పుడు కలవాలనుకుంటే అప్పుడు కలవగలిగే ఏకైక్ వ్యక్తి కిమ్ యో జాంగ్ . ఇప్పటికే కిమ్ ఈమెకి అన్ని రకాలుగా ఎంకరేజ్ చేస్తూ అన్ని విషయాల పట్ల అవగాహన కలిగేలా చేశాడు.ఇతర దేశాలతో సంబంధాలు, మిలటరి వ్యవహారాలు అన్నతో సమానంగా చూస్తుంది కిమ్ యో జంగ్.

స్విట్జర్లాండ్లో పేరు మార్చుకుని చదువుకుంది. కిమ్ వార్తల్లోకి రావడం ఇది మొదటిసారి కాదు . 2012 నుండి తను వార్తల్లో వ్యక్తి గా ఉంది. అప్పుడు కూడా కిమ్ ఆరోగ్యం విషమించిదని వార్తలు రావడంతో తన తర్వాత స్థానం ఎవరు అనేదానిపై ఎక్కువగా వినపడిన పేరు కిమ్ యో జంగ్ దే. అప్పటి నుండి కూడా తను అన్నతో పాటుగా పరిపాలన వ్యవహారాలు చూస్కుంటూ అన్నకు తోడుగా ఉంది.  కిమ్ గురించిన వార్తలు ట్రంప్ నోట , మీడియా నోట తప్ప ఆ దేశ మీడియాలో కాని, అధికారికంగా కాని ఎక్కడా వెళ్లడి కాలేదు..కాబట్టి ఆలు లేదు చూలు లేదు కొడుకు పేరు సోమలింగం అన్నట్టు..

మందుబాబులం..మేము మందుబాబులం..మందుకొడితే మాకు మేమే మహారాజులం.. లాక్ డౌన్ వేళ ఒక్కొక్కరిది ఒక్కో లొల్లి . తాగుబోతులది మరో లొల్లి.. లాక్ డౌన్ ఎప్పుడెత్తేస్తారా? మందు ఎప్పుడు అందుబాటులోకి వస్తుందా అని కొందరు మందుబాబులు ఎదురుచూస్తుంటే , మరికొందరు ఏకంగా ఇంట్లోనే మందు తయారు చేసుకోవడం గురించి ఆలోచిస్తున్నారు.ఇది మేం చెప్పట్లేదు..గూగుల్ తల్లే చెప్తుంది.

లిక్క‌ర్ షాపులు క్లోజ్ చేసేయడంతో, ఎలా అయినా మందుచుక్కతో నోరు తడుపుకోవడానికి రకరకాల ప్రయత్నాలు చేస్తున్నారు మందుబాబులు. లాక్ డౌన్ తొలిరోజుల్లో బ్లాక్లో కొనుక్కుని తాగారు. కానీ ఎంతకాలం అలా తాగగలరు.  బ్లాక్ లో ఒక్కో బాటిల్ ఏకంగా మూడు నాలుగు రెట్లు ఎక్కువ చేసి అమ్ముతుంటే, అదికూడా కష్టమైపోయింది . ఇక చేసేదేం లేక ఒక మార్గం ఆలోచించారు. ఇంట్లో మందు తయారు చేసుకోవాలని ఫిక్సయ్యారు.ఇది మేం చెప్పట్లేదండి.. మందు తయారు చేసుకోవడం ఎలా అని గూగుల్లో వెతకడం మొదలు పెట్టారు. “How to make alcohol at home” ఇది ఇప్పుడు ట్రెండింగ్లో ఉంది.

లాక్ డౌన్ పెట్టిన ఫస్ట్ వీక్ లోనే  అంటే మార్చి 22 నుంచి 28 మ‌ధ్య ఈ సెర్చ్ పీక్ లోకి వెళ్లింది. మార్చి 22 నుంచి ఏప్రిల్ 15 వరకు కూడా గూగుల్ ట్రెండ్స్ లో ఈ సెర్చ్ టాప్ ప్లేస్ లోనే ఉంది. ఇలా సెర్చ్ చేసిన స్టేట్స్లో మణిపూర్ ఫస్ట్ ప్లేస్ కాగా,ఆ త‌ర్వాత జ‌మ్ము క‌శ్మీర్, ఉత్త‌రాఖండ్, జార్ఖండ్, అస్సాం ఉన్నాయి. ఆరో స్థానంలో ఏపీ, ప‌దో స్థానంలో తెలంగాణ ఉన్నాయి.

కేవలం ఆల్కహాల్ కోసమే కాదు,  ఆల్క‌హాల్ త‌యారీ కోసం సెర్చ్ చేసిన‌ట్లుగానే బీర్ ఇంట్లోనే ఎలా చేసుకోవాల‌న్న దాని కోసం కూడా దేశంలో లాక్ డౌన్ పెట్టిన త‌ర్వాత జ‌నాలు విప‌రీతంగా సెర్చ్ చేశారు. మార్చి 29న “how to make beer at home” అన్న సెర్చ్ పీక్ లోకి వెళ్లింది. బీర్ కోసం సెర్చ్ చేసిన వారిలో తెలంగాణా టాప్ ఫైవ్ లో ఉంది.. అదీ సంగతి.. మొన్నీ మధ్య ఎవరో ఇలాగే సొంతంగా మందు తయారు చేసుకుని వికటించి చనిపోయారు. కాబట్టి లాక్ డౌన్ ఎత్తేశాక బతికుంటే బడ్వైజర్ తాగొచ్చు కాని..ఇప్పుడు ప్రయోగాలు చేయకండి.

కరోనా వ్యాప్తిని అరికట్టడానికి దేశవ్యాప్తంగా లాక్ డౌన్ విధించిన విషయం తెలిసిందే . లాక్ డౌన్ నిబందనలు పాటించని వారిపై పోలీసులు తమ ప్రతాపం చూపిస్తున్నారు. కొన్ని చోట్ల పోలీసులు ప్రజల్ని బతిమిలాడుతుంటే, మరికొన్ని చోట్ల తమ లాఠీలకు పనిచెప్తున్నారు. తాజాగా లాక్ డౌన్ వేళ ఆంధ్రాలో ఒక అపశృతి దొర్లింది. పోలీసుల తీరుకు ఒక యువకుడు ప్రాణాలు కోల్పోయాడు.

గుంటూరు జిల్లా సత్తెనపల్లికి చెందిన గౌస్ పాషా ఇటీవల రోడ్డుపైకి వచ్చాడు. పోలీసుల రోడ్డు మీదకి ఎందుకొచ్చావంటూ కొట్టారు. నిజానికి పాషా గుండె జబ్బుతో బాధపడుతున్నాడు. రోజు మందులు వేసుకోవాలి. మందులు అయిపోవడంతో మెడికల్ షాప్ కి వెళ్లడానికి బయటికి వచ్చాడు.అతడిని ఆపారు..బయటకి ఎందుకు వచ్చావు అని అడిగారు. దాంతో పాషా ఒక్కసారిగా కుప్పకూలిపోయాడు. పోలీసులు వెంటనే పాషాను ఆస్పత్రికి తీసుకెళ్తుండగా, మార్గమధ్యలోనే పాషా మృతిచెందాడు.

పాషా మృతితో సత్తెనపల్లిలో ఒక్కసారిగా ఘర్షణ వాతావరణం ఏర్పడింది.  పోలీసులు కొట్టడం వల్లే  పాషా చనిపోయాడని అతని కుటుంబసభ్యులు, బంధువులు ఆరోపిస్తున్నారు. పాషా మృతదేహంతో అతని బంధువులు భారీగా పోలీస్ స్టేషన్ ముందు ధర్నాకు దిగారు. పాషా బందువులను ఆపే క్రమంలో జరిగిన చిన్నపాటి ఘర్షణలో బంధువులు సిఐని కొట్టారు.

representative image only

విషయం తెలిసిన గుంటూరు రేంజ్ ఐజీ ప్రభాకర్ రావు వెంటనే రంగంలోకి దిగారు. ఘటనకు కారణమైన సత్తెనపల్లి ఎస్సై రమేష్ ను సస్పెండ్ చేస్తూ ఆదేశాలిచ్చారు.ఇదిలా ఉండగా “ తాము పాషాను కొట్టలేదని అంటున్నారు. నిబంధనలు పాటించకుండా రోడ్డు మీదకు ఎందుకొచ్చావని అడగగానే,భయపడి కిందపడిపోయాడని,  హాస్పిటల్ కి తీస్కెళ్తుండగా చనిపోయాడని” పోలీసులు అంటున్నారు.. నిజం ఏంటనేది తేలాల్సి ఉంది.

లాక్ డౌన్ లో ఎవడి గోల వారికుంటే.. ఇలాంటి ఛాన్స్ పోతే మళ్లీ రాదనుకున్నారో ఏమో ఆ జంట మాత్రం దొరికిందే ఛాన్స్  అనుకుని పెళ్లి చేసేసుకున్నారు .మరేం చేస్తారు , పెద్దలు ఒప్పుకోవట్లేదు, ఇప్పుడైతే అందరూ బయటకి వచ్చే పరిస్థితి లేదు.. సో పెళ్లి చేసుకుని పోలీస్ స్టేషన్ కి వెళ్లారు. తర్వాత వచ్చిన పెద్దలు ఒప్పుకోకతప్పలేదు.. తమిళనాడులో జరిగిన ఈ సంఘటన వివరాలు..

తిరుచ్చికి చెందిన వినోద్ వయసు 25 , ఐటిఐ పూర్తి చేసాడు. ఇతను తిరుచ్చి అరియమంగళంలో బస్సు, లారీలకు బాడీ తయారు చేసే షెడ్‌లో పని చేస్తున్నాడు . ఇతడి ప్రేయసి పేరు జీవిత, వయసు 20. బియస్సీ ఫైనల్ ఇయర్ చదువుతుంది . జీవిత తన కాలేజ్ కి దగ్గర లో ఫ్రెండ్ ఇంటికి వెళ్తూ ఉండేది. అక్కడే వినోద్‌ పరిచయం అయ్యాడు. ఇద్దరూ ప్రేమించుకున్నారు. ఇద్దరివి వేరు వేరు కులాలు, ఇంకేముంది పెద్దలు వీరి ప్రేమకు నో చెప్పారు. అయినప్పటికి వారిద్దరూ పెద్దల మాట వినకుండా కలుసుకుంటూనే ఉండేవారు.

ఇప్పుడు లాక్ డౌన్ తో ఇద్దరూ ఒకరినొకరు కలుసుకోవడం కష్టం అయింది. ఎడబాటు భరించలేకపోయారు. ఎలాగు పెద్దలు వారి ప్రేమకి,పెళ్లిక అంగీకరించరు. దాంతో పెళ్లి చేసుకోవడానికి ఇదే సరైన సమయం అని భావించారు. తిరుచ్చిలో 144సెక్షన్ అమలులో ఉంది. ఎవరూ బయటికి రాకూడని పరిస్థితి. ఈ పరిస్తితుల్లో జీవిత ఇంటి నుండి బయటకి వచ్చి వినోద్ ని కలిసింది. ఇద్దరూ దగ్గరలోని గుడిలో పెళ్లి చేసుకుని నేరుగా పోలీసుల దగ్గరికి వెళ్లారు.

ఇద్దరూ మేజర్లు కావడంతో పోలీసులు వారికి అండగా నిలిచారు. ఇద్దరి కుటుంబ సభ్యులను పిలిచి మాట్లాడారు. కులాలు ముఖ్యం కాదని, పిల్లల సంతోషం ముఖ్యమని పెద్దలకి నచ్చచెప్పి పంపించారు. సోషల్ మీడియాలో వైరలవుతున్న  ఈ న్యూస్ చూసిన చాలామంది ఇదే మంచి టైం , పేరెంట్స్ కూడా ఏం చేయలేరు అంటూ కామెంట్స్ చేస్తున్నారు..పేరెంట్స్ ఏం చేయకపోవచ్చు తమ్ముడు, కరోనా ఊరుకోదుగా..కాబట్టి ఎలాంటి ప్లాన్స్ వేయకుండా జాగ్రత్తగా ఉండండి.